එක්සත් ජනපද ජනපති ඩොනල්ඩ් ට්රම්ප් රුසියාවේ දැවැන්ත ඉන්දන සමාගම් දෙකකට එරෙහි සම්බාධක පනවයි.
ඒ සමග ලෝක වෙළඳපොළ තෙල් මිල අද (23), 3%කින් ඉහළ ගියේය.
ජනපති ට්රම්ප් ගේ බලපෑම මත ඉන්දියාව ද රුසියානු ඉන්දන ආනයන කපා හැරීමට සූදානම් වන බව, විදෙස් මාධ්ය සඳහන් කරයි.
යුක්රේනයට එරෙහි යුද්ධය අවසන් කිරීමට රුසියානු ජනපති, ව්ලැඩිමීර් පුටින් (Vladimir Putin) මැලි වීම, එම සම්බාධක පැනවීමට හේතුවයි.
ගැටුම අවසන් කර සාමය උදා කිරීම පිණිස, රුසියානු නායකයා කැමැත්ත පළ කරන තෙක්, එරට ආර්ථිකයට සහ ආරක්ෂක කර්මාන්තයට දැඩි බලපෑම් එල්ල කළ යුතු බවත්, යුක්රේනයට අවැසි සම්පත් ලබා ගැනීමට රුසියාව සතු නිශ්චල ස්වෛරී වත්කම් හි පූර්ණ අගය උපයෝජනය උදෙසා, සැලසුම් සකස් කෙරෙමින් ඇති බවත්, බ්රිතාන්යය, ප්රංශය, ජර්මනිය, යුක්රේනය සහ යුරෝපා සංගමය ඉකුත් අඟහරුවාදා (21), විශේෂ ඒකාබද්ධ නිවේදනයක් නිකුත් කරමින් දන්වා සිටියේය.
එහි මුල් පියවරක් ලෙස, රුසියාවේ දැවැන්ත තෙල් සමාගම් දෙකක් වන රොස්නෙෆ්ට් (Rosneft) සහ ලූක්ඔයිල් (Lukoil) බොරතෙල් නිෂ්පාදකයින් වෙත මෙසේ, එක්සත් ජනපද සම්බාධක පනවා තිබේ.
යුක්රේන යුද්ධය නතර කරන ලෙස ඉල්ලා, තමා නුදුරේදීම බුඩාපෙස්ට් (Budapest) නුවරදී ජනපති පුටින් සමග විශේෂ සමුළුවකට සහභාගී වන බව, ජනපති ට්රම්ප් පසුගිය සතියේ නිවේදනය කළේය.
එහෙත්, දැන් "එහෙම" අදහසක් නැතැයි, ඊයේ (22) ධවල මන්දිරයට රැස්වූ මාධ්යවේදීන් අමතා ට්රම්ප් කියා සිටියේය.
එම හමුවෙන් තමා අපේක්ෂා කළ ප්රතිඵලය නොලැබෙන බවට අනුමාණ කෙරෙන බැවින්, එම සාකච්ඡා අවලංගු කරන බව ඔහු පැවසීය.
ජනපති පුටින් සමග මීට පෙර සිදු කළ,"ඉතා හොඳ" කතාබහ "ගිය අතක්" නැතැයි, පැමිණ සිටි මාධ්යවේදීන් ඇමතූ හෙතෙම වැඩි දුරටත් ප්රකාශ කළේය. "වෙන දවසක බලමු," ජනපති ට්රම්ප් කියා සිටියේය.
රුසියාවට එරෙහි එක්සත් ජනපද සම්බාධක ඵලදායී නොවන බව, ජනපති පුටින් පවසයි. යුක්රේන යුද්ධය සම්බන්ධ සිය තීරණය නොවෙනස් බව, ඔහු අවධාරණය කරයි. එවැනි සම්බාධකවලට ඔරොත්තු දෙන ශක්තිමත් 'ප්රතිශක්තීකරණ පද්ධතියක්' රුසියාව සතු බව එරට විදේශ අමාත්යංශ ප්රකාශිකා මාරියා සඛරෝවා (Maria Zakharova ) පවසයි.
යුක්රේනයට ආධාර ලබා දීම සම්බන්ධයෙන් සාකච්ඡා කිරීමට යුරෝපා සංගම් නායකයෝ අද බ්රසල්ස් ( Brussels ) නුවරදී රැස් වූහ.
රුසියාව සතු නිශ්චල ස්වෛරී වත්කම් තහනම් කළහොත්, ඊට එරෙහිව අතිශය වේදනාකාරී ප්රතිචාර දක්වන බව ජනපති පුටින් තර්ජනය කර සිටී.
අදත්, අඛණ්ඩ දෙවන දින රාත්රිය පුරාවට යුක්රේන අගනුවරට රුසියානු ඩ්රෝන ප්රහාර එල්ල විය. රුසියානු අගනුවර ඇතුළු අනෙකුත් ප්රදේශ වෙත ප්රහාර එල්ල කිරීම පිණිස පැමිණි යුක්රේන ඩ්රෝන යානා 139ක් අහසේ දී විනාශ කල බව, රුසියානු ගුවන් ආරක්ෂක බලකාය පවසයි.
(සටහන | Reuters ඇසුරින්; හර්ෂ උදයකාන්ත පීරිස්)
(
10/23/2025
මුලාශ්රය :
US sanctions Russian oil majors over Ukraine, prompting India jitters and Moscow fury
