පලස්තීන සන්නද්ධ සටන්කරුවන්ගේ ප්රාණ ඇපයේ සිටිය දී ජීවිතක්ෂයට පත් තවත් ඊශ්රායල ජාතිකයකුගේ මළ සිරුරක්
ඊයේ (25) රතු කුරුස සංවිධානය ඔස්සේ ලද බව, එරට රජය අද (26) නිවේදනය කළේය. එම භාරයේ පවතින ජීවිතක්ෂයට පත් තවත් ප්රාණ ඇපකරු මළ සිරුරු දෙකක් සොයා තවදුරටත් සෝදිසි සිදු කෙරෙන බව හමාස් සංවිධානය පවසයි.
"වහා ගිනි ඇවිලෙන සුළු" ගාසා සටන් විරාමය සති හයක් ඉක්මවා තිබේ.
නෙතන්යාහු රජය, ඊයේ ලද මළ සිරුර කාගේ දැයි මෙතෙක් ප්රකාශ කර නැත. එය හැඳිනීම පිණිස වෝහාරික වෛද්ය විද්යාව පිලිබඳ ජාතික මධ්යස්ථානය වෙත භාර දී ඇතැයි, අග්රාමාත්ය කාර්යාලය පැවසීය.
දෙවසරක ඉමහත් ව්යසනකාරී ගාසා යුද්ධයට සටන් විරාමය උදා වීමත් සමග හමාස් භාරයේ ජීවග්රහයෙන් පසු වූ, ඉතිරි ප්රාණ ඇපකරුවන් 20 දෙනාම නිදහස් කිරීමට එම සංවිධානය විසින් කටයුතු කෙරිණි. ඊට ප්රතිචාර වශයෙන් ඊශ්රායල අත්අඩංගුවේ සිටි පලස්තීන සිරකරුවන් සහ යුද සමයේ රැඳවියන් 2000ක් ද නිදහස ලදහ.
සටන් විරාමයේ පළමු අදියර යටතේ පලස්තීන සටන්කාමීන් භාරයේ සිටියදී ජීවිතක්ෂයට පත් ප්රාණ ඇපකරුවන් 28 දෙනකුගේ මළ සිරුරු ද ඊශ්රායලය වෙත භාරදීමට නියමිත විය. හුවමාරු ලෙස ඊශ්රායල හමුදා භාරයේ සිටියදී ජීවිතක්ෂයට පත් පලස්තීන සන්නද්ධ සටන්කරුවන් 360කගේ මළ සිරුරු රතු කුරුසය ඔස්සේ එම පාර්ශ්වය වෙත ලබා දෙනු ඇත.
මේ අතර, ඊජිප්තු රජය කයිරෝ හිදී ගාසා සටන් විරාමයේ මැදහත් සහ වගකීම් පාර්ශ්ව අතර පසු විපරම් සාකච්ඡා පැවැත්වීය. ඊට ඊජිප්තු බුද්ධි අංශ ප්රධානී, කටාර් අග්රාමාත්ය සහ තුර්කි බුද්ධි අංශ ප්රධානී ද සහභාගී වූහ. සටන් විරාමයේ දෙවන අදියර ක්රියාත්මක කිරීම පිලිබඳ එහිදී අවධානය යොමු විය. පවතින සටන් විරාමය උල්ලංඝනය කිරීමේ සිදුවීම් ද සාකච්ඡාවට ලක් විය.
ගාසා තීරයෙන් පහ කෙරුණු හමාස් ප්රධානී, ඛලිල් අල්-හයියා (Khalil al-Hayya) ඇතුළු එම සංවිධාන සමාජිකයින් පිරිසක් සහ ඊජිප්තු නිලධාරීන් අතර ඉකුත් දෙදින තුළ සටන් විරාමයේ දෙවන අදියර පිලිබඳ සාකච්ඡා සිදු කෙරිණි. ගාසා තීරයේ සංක්රාන්ති බල අධිකාරයක් පිහිටුවීම සහ බහුජාතික ආරක්ෂක බලකායක් ස්ථාපනය කිරීම ද ඊට ඇතුළත් විය.
(සටහන | Reuters ඇසුරින්; හර්ෂ උදයකාන්ත පීරිස්)
(
11/26 /2025
Israel receives remains of hostage held in Gaza as Cairo hosts follow-up talks
