එයාර් ඉන්ඩියා ගුවන් සේවය අනාරක්ෂිත වැඩ කරලා; යන්නේ බලාගෙනයි..!

නිසි ගුවන් යෝග්‍යතා සමාලෝචන සහතිකයක් නොමැතිව ගුවන් යානා පුන පුනා පියාසර කරවීම සම්බන්ධයෙන් එයාර් ඉන්ඩියා

ගුවන් සේවය පිලිබඳ විමර්ශන දියත් කෙරේ.  එම ගුවන් සේවයට අයත් ගුවන් යානයක් යෝග්‍යතා  සහතිකයෙන් තොරව, අට වරක් අඛණ්ඩ පියාසැරියේ යොදවා ඇති බවට පසු ගිය දා අනාවරණය විය.  ඉන්දීය ගුවන් ගමන් නියාමන අධිකාරිය විසින් ඊට එරෙහි  විමර්ශන ආරම්භ කර තිබේ.

අදාළ ගුවන් යානය කුමක් දැයි නිශ්චිතව අනාවරණය නොවතත්, එය, එයාර්බස්  A320 වර්ගයට අයත් එකක් බව රොයිටර්ස් පුවත් සේවය පවසයි. එයාර්බස් සමාගම මෙතෙක් ඒ පිලිබඳ ප්‍රකාශයක් නිකුත් කර නැත.

ඉකුත් ජුනි මස ඉන්දියාවේ සිදුවූ  බොයිඞ්  ඩ්‍රීම්ලයිනර් ගුවන් අනතුරින් පසු, ඉන්දීය ගුවන් යානා පිලිබඳ විමර්ශන  ඇරඹිණි. එම අනතුරින් මගීන් සහ කාර්යමණ්ඩලයේ 260 දෙනෙක් ජීවිතක්ෂයට පත් වූහ.  අනතුරින් පසු ඉන්දීය ගුවන් ගමන් ක්ෂේත්‍රයට දැඩි මූල්‍ය හානි සිදු විය. මේ වන විට,  ඉන්දීය ගුවන් යානා සඳහා පාකිස්ථාන ගුවන් කලාපය ද තහනම් කර තිබේ. ඉන්දීය ගුවන් සේවයේ පවතින අනාරක්ෂිත තත්ත්වය පිලිබඳ,  එරට සිවිල් ගුවන් සේවා අධ්‍යක්ෂ ජනරාල් කාර්යාලය විසින්, මෙම වසරේ  අවස්ථා රැසකදී අනතුරු ඇඟවීම්  නිකුත් කර ඇත.

අනාරක්ෂිත බවට සැක කෙරෙන ප්‍රශ්න ගත  ගුවන් යානය සේවයේ යෙදවීම තහනම් කළ බවත්, ඒ සම්බන්ධ වග කිව යුතු   කාර්යමණ්ඩල සාමාජිකයින් වෙනුවට නව කාර්යමණ්ඩල පත් කළ බවත්, ඉන්දීය  සිවිල් ගුවන් සේවා අධ්‍යක්ෂ ජනරාල් කාර්යාලය කියයි.

ඉන්දීය ගුවන් සේවය එරට දෙවන විශාලතම ගුවන් සේවය වේ. අදාළ ගුවන් යානයේ පවතින ආරක්ෂක දෝෂ පිළිබඳව නොවැම්බර 26 දාතමින් යුක්තව ගුවන් ගමන් නියාමනය දැනුම්වත් කළ බව, එම ගුවන් සේවය පවසයි. අදාළ සහතික නොමැතිව එම ගුවන් යානය සේවයේ යෙදවීමට වගකිව යුතු කාර්ය මණ්ඩල සාමාජිකයින්ගේ සේවය අත්හිටවූ බවද එය කියා සිටී.  

සිය ගුවන් සේවයට අයත් මගී යානයක්, ගුවන් යෝග්‍යතා සමාලෝචන සහතිකයකින් තොරව පියාසැරියේ යෙදවීම කණගාටුවට  කරුණක් බව,  එයාර් ඉන්ඩියා ගුවන් සේවය පවසයි.

ගුවන් යානා කාර්ය මණ්ඩල කළමනාකරණය සහ ප්‍රමාණවත් නොවන පුහුණුව සම්බන්ධයෙන්ද ගුවන් නියාමනය විසින් ඉකුත් ජුලි මස එම ගුවන් සේවයට අනතුරු අඟවා නිවේදන නිකුත් කෙරිණි.

එම ගුවන් සේවය සම්බන්ධයෙන් සිදු කෙරුණු  වාර්ෂික විගණන පරීක්ෂාවකදී ඊට අයත් ආරක්ෂක දෝෂ 51ක් වාර්තා විය. ඇතැම් ගුවන් නියමුවන්ට ලබාදුන් පුහුණුව ප්‍රමාණවත් නොවීම, අනුමැතියෙන් තොර සිමියුලටර  හා  දුර්වල ප්‍රතිස්ථාපන පද්ධති භාවිතය වැනි කරුණු රැසක් ඊට ඇතුළත් විය.

ගුවන් යානයක් වෙත ගුවන් යෝග්‍යතා සමාලෝචන සහතිකයක් නිකුත් කෙරෙන්නේ, එහි  නඩත්තු වාර්තා, භෞතික තත්ත්වය  මෙන්ම, ගුවන් නියාමන රෙගුලාසිවලට අනුගතවීම පිලිබඳ දැඩි පරීක්ෂාවකින් අනතුරුවය.   ඉන්දීය සිවිල් ගුවන් සේවා අධ්‍යක්ෂ ජනරාල් කාර්යාලය විසින්, එයාර් ඉන්ඩියා ගුවන්සේවය වෙත ඊට අයත්  ගුවන් යානා සම්බන්ධයෙන් එම යෝග්‍යතා සහතික නිකුත්  කිරීමේ බලය පවරා තිබේ. කෙසේ වෙතත්, පසු ගිය වසරේ විස්තාරා ගුවන් සේවය, එයාර්  ඉන්ඩියා  ගුවන් සේවය සමග ඒකාබද්ධ වීමෙන් අනතුරුව, විස්තාරා ගුවන් සේවයට අයත් ගුවන් යානා සඳහා පළමු යෝග්‍යතා සහතිකය නිකුත් කිරීමේ අධිකාරි බලය නියාමන අධිකාරිය සතු බවට තීරණය කෙරිණි.

සිද්ධිය සම්බන්ධයෙන් ප්‍රශ්න ගත ගුවන් යානයේ යෝග්‍යතා සහතිකය කල් ඉකුත් වී ඇති බව අනාවරණය වූයේ, එහි  එන්ජිම මාරු කිරීමට යවා තිබු අවස්ථාවකය.  කෙසේ වුව, අදාළ කටයුතුවලින් අනතුරුව, එම යෝග්‍යතා සහතිකය යාවත්කාලීන නොකරම, යානය යළි සේවය වෙත මුදා හැරීමට පියවර ගෙන තිබිණි.

(සටහන | Reuters ඇසුරින්; හර්ෂ උදයකාන්ත පීරිස්)

මුලාශ්‍රය :

India investigates Air India after plane flown repeatedly without safety certificate