ඉරානය සහ එක්සත් ජනපදය අතර තීරණාත්මක 'සිකුරාදා සාකච්ඡා' අද (6) ඕමානයේ, මස්කට් නුවර දී පැවැත්වේ.
ටෙහෙරානයේ න්යෂ්ටික වැඩපිළිවෙළ එහි ප්රධාන මාතෘකාවයි.
කෙසේ වෙතත්, සාකච්ඡා න්යාය පත්රය පිලිබඳ තවදුරටත් ගැටළු පවතී. ඉරානයේ බැලස්ටික් මිසයිල වැඩසටහන, කලාපයේ සන්නද්ධ කැරළි හා ත්රස්ත සංවිධාන වෙත සහාය ලබා දීම සහ එරට අභ්යන්තර ජන අරගලය හා සමූලඝාතන සම්බන්ධයෙන් ද එහිදී ඉරානයෙන් ප්රශ්න කෙරෙන බවට වූ එක්සත් ජනපද යෝජනා ටෙහෙරානය තරයේ ප්රතික්ෂේප කර සිටී.
සාකච්ඡා අන්තර්ගතය ඉරාන න්යෂ්ටික වැඩපිළිවෙළ පිලිබඳ පමණකැයි එරට අවධාරණය කරයි.
අර්බුදය, රාජ්ය තාන්ත්රිකව විසඳා ගැනීම දෙපසේම මූලික අවශ්යතාව සේ පෙනුන ද, සාකච්ඡා න්යාය පත්රයේ මෙතෙක් නොවිසඳුණු ගැටළු හේතුවෙන් තවමත් ඇත්තේ අවිනිශ්චිත තත්ත්වයකි.
මස්කට් සාකච්ඡා අන්තර්ගතය සිය න්යෂ්ටික වැඩපිළිවෙළ සම්බන්ධයෙන් බවත්, එම සාකච්ඡා ඉරාන විදේශ අමාත්ය, අබ්බාස් අරඛ්චි සහ එක්සත් ජනපද මැද පෙරදිග විශේෂ නියෝජිත, ස්ටීව් විට්කොෆ් ගේ සහභාගිත්වයෙන් සිදු කළ යුතු බවත් ටෙහෙරානය විසින් දන්වා තිබේ. රාජ්ය අධිකාරීත්වයෙන් යුත් එම සාකච්ඡාහිදී අන්යොන්ය වශයෙන් සාධාරණ, පිළිගතහැකි සහ ගෞරවාන්විත විසඳුමක් වෙත පිවිසීම අපේක්ෂාව බව ද එහි සඳහන්ය.
"මෙම ක්රියාවලියේ දී එක්සත් ජනපද පාර්ශ්වය ද, තත්ත්වයේ බරපතල බව හැඳින යථාර්ථවාදීව, වගකීමෙන් ඊට සහභාගී වනු ඇතැයි අප උදක්ම විශ්වාස කරනවා," යි ඉරාන විදේශ අමාත්යංශ ප්රකාශක, එස්මයිල් බඝෙයි ඊයේ (5) පැවසීය.
සාකච්ඡා අභිමුව වුව, ඉරානය තවමත් එක්සත් ජනපද ප්රහාරයක් පිලිබඳ ඉමහත් සැකයේ පසුවේ.
(සටහන |Reuters ඇසුරින්; හර්ෂ උදයකාන්ත පීරිස්)
මුලාශ්රය :
Iran, US to negotiate in Oman amid deep rifts and mounting war fears
