ශ්‍රී ලංකාව කඩුලු 10කින් ඇෆ්ගනිස්තානය පරදවයි

ප්‍රභාත් ජයසූරියගේ දඟ පන්දුව හමුවේ අසරණ වූ ඇෆ්ගනිස්තානය දෙවැනි ඉනිමේදී ලකුණු 296කට දැවී ගිය අතර ඒ අනුව ශ්‍රී ලංකාව ට ජයග්‍රහණය සඳහා අවශ්‍යව තිබුනේ ලකුණු 56ක් පමණ යි.

දිමුත් කරුණාරත්න හා නිශාන් මදුෂ්ක ඕවර 7යි පන්දු 2ක් ඇතුළත එම ඉලක්කය සපුරා ගත්තා. කරුණාරත්න තරගය අවසන් කළේ කයිස් අහමඩ් ට පිට පිට හතරේ පහර දෙකක් එල්ල කරමින්. කරුණාරත්න හතරේ පහර 3ක් සහ හයේ පහරක් සමග නොදැවී ලකුණු 32ක් ලබා ගත් අතර නිශාන් මදුෂ්ක හතරේ පහර 4ක් සමග නොදැවී ලකුණු 22ක් වාර්තා කළා.

ජයසූරිය ලකුණු 107කට කඩුලු 5ක් ලබා ගැනීමට සමත් වූ අතර අසිත ප්‍රනාන්දු ලකුණු 63කට කඩුලු 3ක් ද, කසුන් රාජිත ලකුණු 59කට කඩුලු 2ක් ද ලබා ගත්තා.

 

මේ අනුව, සමස්ත තරගයේදී ජයසූරිය ලකුණු 174කට කඩුලු 8ක් ලබා ගැනීමට සමත් වූ අතර ඔහු ‘තරගයේ වීරයා’ ලෙස නම් කෙරුනා. අසිත ප්‍රනාන්දු මුළු තරගයේදී කඩුලු 6ක් ලබා ගත්තා.

ඇෆ්ගනිස්තානය පළමු හා දෙවැනි කඩුලු වෙනුවෙන් ශතක සබඳතා ඇති කර ගත්ත ද දෙවැනි කඩුල්ල අහිමි වීමෙන් පසුව ඔවුන්ගේ අනෙක් කඩුලු 8 ලකුණු 82කට බිඳ වැටුනා.

 
ඇෆ්ගනිස්තානයේ කඩුලු 6ක් ලකුණු 52කට අද උදය වරුවේ බිඳ වැටුනේ ඕවර 24ක් ඇතුළත.

80 වැනි ඕවරය අවසානයේ ශ්‍රී ලංකාව දෙවැනි නව පන්දුව ලබා ගත්තා. සිවුවැනි දින තරගයේ 6 වැනි ඕවරයේ නව පන්දුව ලබා ගන්නා විට ඇෆ්ගන් දෙවැනි ඉනිමේ මුළු ලකුණු ප්‍රමාණය 211ක් වී තිබුනා.

නව පන්දුව ලබා ගෙන දෙවැනි ඕවරයේ දෙවැනි පන්දුවෙන් ම ඇෆ්ගනිස්තානයේ දෙවැනි කඩුල්ල බිඳ වැටුනා. කසුන් රාජිතගේ පන්දුවට කඩුලු රකින සදීර සමරවික්‍රම අතට උඩ පන්දුවක් දෙමින් අහමට් ෂා දැවී යාමත් සමග දෙවැනි කඩුල්ල වෙනුවෙන් පිහිටුවා ගෙන ආ සබඳතාව ලකුණු 108කින් අවසන් වුනා. මේ සබඳතාව වෙනුවෙන් ෂා සහ ඉබ්‍රහිම් සඩ්රාන් පන්දු 231කට මුහුණ දුන්නා. පන්දු 119කට මුහුණ දීමෙන් පසුව ෂා ලකුණු 54කට දැවී ගියේ හතරේ පහර 5ක් සිය ඉනිමට ඇතුළත් කරගෙන. මේ අනුව පෙර දිනයේ ලකුණු 46ක් රැස්කර ගෙන සිටි රහමට් ෂා ට අද ලබා ගත හැකිවූයේ තවත් ලකුණු 8ක් පමණයි. දෙවැනි කඩුල්ල බිඳ වැටුනේ මුළු ලකුණු 214දී.

 

ඉබ්‍රහිම් සඩ්රාන් ලකුණු 109ක් රැස්කර ගෙන සිටියදී කසුන් රාජිතගේ පන්දුවට දුන් උඩ පන්දුවක් හතරේ සීමාව අසල රැක ගැනීමට දිනේෂ් චන්දිමාල් අසමත් වුනා. ඒ වන විට මුළු ලකුණු සංඛ්‍යාව වුනේ 225ක්.

ඇෆ්ගන් තෙවැනි කඩුල්ල ලෙසින් ආරම්භක පිතිකරු ඉබ්‍රහිම් සඩ්රාන් දැවී ගියේ ප්‍රභාත් ජයසූරියගේ දර්ශනීය වමත් දඟ පන්දුවකින්. පිත්ත පරදවා පන්දුව කෙළින් ම කඩුල්ලේ ගැටෙන විට සඩ්රාන් ලකුණු 114ක් රැස්කර ගෙන සිටියා. පන්දු 259ක ඔහුගේ ඉනිම හතරේ පහර 12කින් සමන්විතව තිබුනා. තෙවැනි කඩුල්ල 90 වැනි ඕවරයේ බිඳ වැටුනේ මුළු ලකුණු 237දී.

තරගයේ පළමු ඉනිමේ පරතරය වූ ලකුණු 241 ලබා ගෙන ඇෆ්ගනිස්තානය තරගයේ සම මට්ටමට පැමිණියේ 91 වැනි ඕවරයේදී.
සිවුවැනි කඩුල්ල ලබා ගත්තේත් ජයසූරිය. මෙවර ඔහු ට ගොදුරු වූයේ ලකුණු 18ක් රැස්කර ගෙන සිටි හෂ්මතුල්ලා සෂාහිඩි. කඩුලු රකින සමරවික්‍රම අතට උඩ පන්දුවක් දෙමින් ඔහු දැවී ගියේ මුළු ලකුණු 246දී. ඕවරය 94.

ඉන්පසුව ලකුණු 2ක් ඇතුළත කඩුලු 2ක් බිඳ වැටුනා. අසිත ප්‍රනාන්දු සහ ප්‍රභාත් ජයසූරිය මේ කඩුලු 2 ලබා ගත් අතර ඉක්රම් අලිඛිල් සහ කයිස් අහමඩ් යන දෙදෙනා ම දැවී ගියේ කුසල් මෙන්ඩිස් හා ධනංජය ද සිල්වා යන ස්ලිප් ක්‍රීඩකයන් වෙත උඩ පන්දු ලබා දෙමින්.

මුළු ලකුණු 250දී හත්වැනි කඩුල්ල බිඳ වැටෙමින් සියා උර් රෙහ්මාන් දැවී ගියේ ජයසූරියගේ පන්දුව නිදැල්ලේ යාමට ඉඩ හැරීමෙන් පසුව එය කඩුල්ලේ වැදීමෙන්. 

 

දිවා ආහාරය සඳහා තරගය නතර කරන විට ඇෆ්ගනිස්තානය දෙවැනි ඉනිමේ කඩුලු 7ක් දැවී ලකුණු 251ක් රැස්කර ගෙන සිටියා.

දිවා ආහාරයෙන් පසුව යැවුනු පස්වැනි ඕවරයේදී ඇෆ්ගන් 8 වැනි කඩුල්ල බිඳ වැටෙමින් නවීඩ් සඩ්රාන් (4) දැවී ගියා. ඒ කඩුල්ල ලබා ගත්තේත් ප්‍රභාත් ජයසූරිය. එය මේ ඉනිමේ ඔහු ලබා ගත් පස්වැනි කඩුල්ල යි. සඩ්රාන් හා නසීර් ජමාල් 8 වැනි කඩුල්ල වෙනුවෙන් ලකුණු 21ක් රැස් කළ අතර 8 වැනි කඩුල්ල බිඳ වැටුනේ මුළු ලකුණු 271දී.

නිජාට් මසූඩ් බින්දුවත් මොහමඩ් සලීම් ලකුණු 2කටත් දැවී ගිය අතර එම කඩුලු ලබා ගත්තේ කසුන් රාජිත හා අසිත ප්‍රනාන්දු. ඇෆ්ගනිස්තානය දෙවැනි ඉනිමේදී මුහුණ දුන්නේ ඕවර 112යි පන්දු 3කට පමණයි.

 

 

සබැඳි පුවත් :

ඇෆ්ගනිස්තානය ලකුණු 251කට කඩුලු 7ක් බිඳ වැටී පරාජය අභියස

ඉබ්‍රහිම් සඩ්රාන්ගෙන් මංගල ටෙස්ට් ශතකයක් ඇෆ්ගනිස්තානය දෙවැනි ඉනිමේ එක් කඩුල්ලක් දැවී ලකුණු 199

 

සවස තේ පානයේදී ඇෆ්ගනිස්තානය කිසිවෙකු නොදැවී 97යි

 

චාමික ගුණසේකර : මංගල ටෙස්ට් තරගයෙන් රෝහලට

 

ශ්‍රී ලංකාව 439ක් රැස්කර ගෙන ලකුණු 241ක් ඉදිරියෙන් - දිවා ආහාරයේදී ඇෆ්ගනිස්තානය කිසිවෙකු නොදැවී ලකුණු 35 යි