බෞද්ධයන් මෙන්ම හින්දුන් ද අයිතිය කියා පාන වන්නියේ පුරා විද්‍යා භුමියක සිදු කරන ආගමික කටයුතු වලදී බෞද්ධයන්ට නොපැනවූ
කොන්දේසී හින්දුන්ට පැනවීමට පුරා විද්‍යා දෙපාර්තමේන්තුව කටයුතු කර තිබේ.
අගෝස්තු 18 වැනිදා කුරුන්තුර්මලේ පුරාවිද්‍යා භුමියේ සිදු කිරීමට නියමිත පොංගල් උත්සවයේ සංවිධායකයන් වෙත අගොස්තු 17 වැනිදා කොන්දේසි හතක් පනවා ඇති වව්නියාව, මන්නාරම, මුලතිව් ප්‍රාදේශිය පුරාවිද්‍යා සහකාර අධ්‍යක්ෂ ආර්.ජී ජයතිලක තෙදිනක් පුරා පැවැත්වෙන බෞද්ධ ආගමික කටයුතු වලට එවැනි කිසිදු කොන්දේසියක් පනවා නොමැති බවයි පළාත් බද වාර්තාකරුවන් පවසන්නේ.
පුරාවිද්‍යා බලධාරීන් එම කොන්දේසි පනවා ඇත්තේ සහකාර අධ්‍යක්ෂ විසින් කරන ලද පැමිණිල්ලක් අනුව මුලතිව් පොලිසිය අධිකරණයෙන් තහනම් නියෝගයක් ඉල්ලීමෙන් අනතුරුවය.
පොංගල් වතාවත් නිසා ගැටුම් ඇතිවේ යයි බිය පල කරමින් හිටපු උතුරු පළාත් සභා මන්ත්‍රී තුරෙයිරාසා රවිහරන්, දේශපාලන ක්‍රියාධර පීටර් ඉලන්චේලියන්, ගල්ගමුවේ ශාන්තබෝධි හිමි සහ අරුන් සිද්ධාර්ථන් ට එරෙහිව එම පැමිණිල්ල ගොනු කර ඇතත්, බෞද්ධ පාර්ශවයට කිසිදු සීමාවක් පැනවූ බවක් දැනගන්නට නැත.
පොංගල් උත්සවය සදහා ඒකරාශි කරන ජනතාවගෙන් ස්ථානය වැදුම් පිදුම් කිරීමට සෙසු පාර්ශවයන්ට කරදර හිරිහැර නොවන ආකාරයට කටයුතු කළ යුතු බවද මුලතිව් පොලීසිය හරහා සහකාර අධ්‍යක්ෂ ආර්.ජී ජයතිලක පොංගල් සංවිධායකයන්ට දැනුම් දීමට කටයුතු කර තිබේ.
අගෝස්තු 18,19, සහ 20 යන තෙදින තුළ කුරුන්තුර්මලේ පුරාවිද්‍යා භුමියේ මහා අසිරිමත් පිංකම් මාලාවක් පැවැත්වෙන බව පවසන කුරුන්තුර්මලේ පුරාවිද්‍යා භුමියේ අධිකරණ නියෝග නොතකා බෞද්ධ විහාරයක් ඉදිකරමින් එහි පදිංචි වී සිටින ගල්ගමුවේ සාන්ත බෝධි හිමියන් සමාජ මාධ්‍ය ඔස්සේ බෞද්ධයන් බිය ගන්වා ඇත්තේ අගෝස්තු 18 වැනිදා ‘අන්තවාදීන්’ විසින් කුරුන්දි පිළිමගේ ප්‍රතිමා ගෘහය කෝවිලක් කරන්නට සැරසෙන බව පවසමිනි.
ජාතිවාදය ඇවිස්සෙන අයුරින් “බෞද්ධයිනි නැගිටිවු!” යනුවෙන් සඳහන් පෝස්ටර් ඇලවීමක්ද ප්‍රදේශයේ සිදු කර ඇති බව පළාත් බද වාර්තාකරුවෝ වැඩි දුරටත් පවසති.
මතබේදකාරී ලෙස බෞද්ධ විහාරයක් ඉදිකර ඇති කුරුන්තුර්මලේ පුරාවිද්‍යා භුමියේ හින්දු වතාවත් කිරීමට කිසිදු තහනමක් නොමැති බව නීතිපති දෙපාර්තමේන්තුව නියෝජනය කළ රජයේ නීතිඥයෙකු මගින් පුරාවිද්‍යා දෙපාර්තුමේන්තුව පසුගියදා මුලතිව් අධිකරණයට දන්වා තිබුනි.
කුරුන්තුර්මලේ ආදීසිවන් අයියනාර් කෝවිලේ පරිපාලක සභාව වෙනුවෙන් පෙනීසිටින නීතිඥ වී එස්. ධනන්ජයන් පසුගියදා කියා තිබුනේ පොංගල් පුජා පැවැත්වීමට පුරාවිද්‍යා දෙපාර්තමේන්තුවෙන් කිසිදු බාධාවක් නොමැති බවට උසාවියට වාර්තාවක් ඉදිරිපත් වූ බවයි.
සබැඳි පුවත් :
ආගමික ඇදහිල්ලට බාධා කළ පොලිසියට විරුද්ධව ‘පියවර ගන්නවා’ - ජනපති
සිව දේවාලයක පුද පූජාවලට එරෙහි පොලිස් ප්‍රචණ්ඩත්වය ගැන පැමිණිලි
‘මේක බෞද්ධ රටක්’ බව උසාවියට කියා දීමට ගිය රියර් අද්මිරාල්ට නීතිඥ විරෝධය
විනිසුරුගේ දෙමළ කම හෙලා දුටු සරත් වීරසේකරට උතුරේ විරෝධය
කොළඹ ඉන්න මන්ත්‍රීවරු වන්නි යන්නේ 'ජාතිවාදය අවුස්සන්නයි'
