ගාසා තීරයේ, හමාස් සංවිධානයට එරෙහි යුද්ධයට දෙවසරක් සපිරෙන අද (07) දිනයේත්, ඊශ්රායල හමුදා, ගොඩ බිමින්, දිය මතින් සහ ගුවනින් ඒ වෙත දැවැන්ත ෂෙල් ප්රහාරයක් එල්ල කළේය.
එක්සත් ජනපද ජනපති, ට්රම්ප් ගේ නියමයෙන්, ගාසා යුද්ධය අවසන් කිරීමට සටන් විරාම සාකච්ඡා පැවැත්වෙන අතර වාරයේ එල්ල කෙරෙන මෙම ප්රහාර හේතුවෙන් සාම ප්රයත්නය අභියෝගයට ලක් කර තිබේ.
ඊජිප්තුවට රැස් වූ ඊශ්රායල සහ හමාස් නිලධාරීන් අතර වක්ර සාකච්ඡා ඊයේ (06) ආරම්භ විය. ගාසා තීරයෙන් ඊශ්රායල හමුදා පූර්ණ ලෙස ඉවත් වීම සහ හමාස් සංවිධානය නිරායුධකරණය වැනි සංවේදී කරුණු ඊට ඇතුළත් වූ බව වාර්තා වේ.
දකුණු ගාසා තීරයේ ඛාන් යූනිස් ( Khan Younis) සහ ගාසා නගරය ද දරුණු ඊශ්රායල ප්රහාරවලට ලක් වූ බව විදෙස් මාධ්ය සඳහන් කරයි.
ගාසා තීරයේ දිස්ත්රික්ක ගණනාවක් වෙත ගොඩ බිමින්, දිය මතින් සහ ගුවනින් ඊශ්රායල හමුදා ප්රහාර එල්ල කළහ. අද අළුයම හමාස් සටන් කාමීහු දේශ සීමාවට ඉහළින් ඊශ්රායලය දෙසට රොකට් ප්රහාරයක් එල්ල කළහ.
යුදෙව් සතුරාට විරෝධය පා, එක්ව නැගී සිටීම එකම විසඳුම බව, හමාස්, ඉස්ලාමීය ජිහාඩ් සහ ඊශ්රායල විරෝධී කුඩා මුස්ලිම් එකමුතුවක්, දෙවසරක යුද සැමරුම වෙනුවෙන් ඒකාබද්ධ නිවේදනයක් නිකුත් කරමින් කියා සිටිති.
පලස්තීන ජනයා නිරායුධාකරණයට කිසිවකුට අයිතිය නොමැති බවත්, සිය නිජ බිම සහ පූජනීය ස්ථාන සතුරාගෙන් නිදහස් කරගන්නා තෙක්, එම සටන පරපුරෙන් පරපුරට උරුම කරන බවත්, එම නිවේදනයේ දැක්වේ.
(සටහන | Reuters ඇසුරින්; හර්ෂ උදයකාන්ත පීරිස්)
(
10/7/2025
මුලාශ්රය :
Israeli forces shell Gaza on war anniversary, Hamas and Israel discuss Trump plan
