*රුසියානු ඉදිකිරීම් අංශයේ ශ්‍රී ලාංකිකයින්ට නව රැකියා අවස්ථා පාද ගැනීමටත් අවධානය
ශ්‍රී ලංකාව සහ රුසියානු සමූහාණ්ඩුව අතර ද්විපාර්ශ්වික ආර්ථික සහයෝගීතාව තවදුරටත් ශක්තිමත් කිරීමේ අරමුණින් රුසියානු ජාතික ඉදිකිරීම්කරුවන්ගේ සංගමයේ (NOSTROY) ඉහළ මට්ටමේ ව්‍යාපාරික නියෝජිත පිරිසක් සිව්දින නිල සංචාරයක් සඳහා දිවයිනට පැමිණ සිටිති.
රුසියානු සමූහාණ්ඩුවේ ශ්‍රී ලංකා තානාපති කාර්යාලයේ සහාය ඇතිව සිදු කෙරුණු මෙම සංචාරයට ප්‍රමුඛ පෙළේ රුසියානු ඉදිකිරීම් සමාගම්වල ජ්‍යෙෂ්ඨ නියෝජිතයින් සහ තාක්ෂණික විශේෂඥයින් 24 දෙනෙකු ඇතුළත් වෙති.
ඉහළ මට්ටමේ රාජ්‍ය සාකච්ඡා
රුසියානු දූත පිරිසේ උප සභාපති ඇන්ටන් මොරොස් ගේ නායකත්වයෙන් යුත් මෙම නියෝජිත පිරිස, විදේශ කටයුතු, විදේශ රැකියා සහ සංචාරක වැඩබලන අමාත්‍ය අරුන් හේමචන්ද්‍ර සහ සංචාරක නියෝජ්‍ය අමාත්‍ය රුවන් රණසිංහ හමුවී සාකච්ඡා පැවැත්වූහ.
දෙරට අතර පවතින දිගුකාලීන සුහද සබඳතා සිහිපත් කළ වැඩබලන අමාත්‍ය හේමචන්ද්‍ර, යටිතල පහසුකම් සංවර්ධනය, ආයෝජන සහ කුසලතා සහිත ශ්‍රම හුවමාරුව හරහා දෙරටටම ප්‍රත්‍යක්ෂ ආර්ථික ප්‍රතිලාභ අත්කර ගත හැකි බව පෙන්වා දුන්නේය.
සංචාරක නියෝජ්‍ය අමාත්‍ය රුවන් රණසිංහ මෙහිදී අවධාරණය කළේ, මෙරට සංචාරක යටිතල පහසුකම් සහ හෝටල් ක්ෂේත්‍රයේ ආයෝජන සඳහා රුසියානු ආයෝජකයින්ට පවතින පුළුල් අවස්ථා පිළිබඳවයි. ශ්‍රී ලංකා සංචාරක සංවර්ධන අධිකාරිය (SLTDA) සහ ආයෝජන මණ්ඩලය (BOI) වැනි රාජ්‍ය ආයතන හරහා මෙම ආයෝජන අවස්ථා ලබාගත හැකි ආකාරය පිළිබඳව ද මෙහිදී පැහැදිලි කෙරිණි.
නගර සංවර්ධනය සහ රැකියා අවස්ථා
මෙම නිල සංචාරය අතරතුර රුසියානු දූත පිරිස, ප්‍රවාහන, මහාමාර්ග සහ නාගරික සංවර්ධන අමාත්‍යාංශය, නාගරික සංවර්ධන අධිකාරිය (UDA) මෙන්ම ආයෝජන මණ්ඩලයේ උසස් නිලධාරීන් හමුවී යටිතල පහසුකම් සහ නාගරික සංවර්ධන ව්‍යාපෘති පිළිබඳව දීර්ඝ වශයෙන් අදහස් හුවමාරු කරගෙන තිබේ.
එසේම, ශ්‍රී ලංකා විදේශ රැකියා නියුක්ති කාර්යාංශයේ (SLBFE) නිලධාරීන් හමුවූ නියෝජිත පිරිස, රුසියානු සමූහාණ්ඩුවේ ඉදිකිරීම් ක්ෂේත්‍රය තුළ සුදුසුකම් ලත් ශ්‍රී ලාංකික ඉදිකිරීම් වෘත්තිකයින්ට සහ ශ්‍රමිකයින්ට පවතින රැකියා අවස්ථා පුළුල් කිරීම පිළිබඳව ද විශේෂ අවධානය යොමු කර ඇත.
NOSTROY සංගමයේ කාර්යභාරය
රුසියානු සමූහාණ්ඩුවේ ජාතික ඉදිකිරීම්කරුවන්ගේ සංගමය (NOSTROY) යනු රුසියාව තුළ මෙන්ම ජාත්‍යන්තරව ක්‍රියාත්මක වන ඉදිකිරීම් සමාගම්වලින් අඩකටත් වඩා නියෝජනය කරන එරට විශාලතම ඉදිකිරීම් සංගමයයි. රුසියානු ඉදිකිරීම් කර්මාන්තයේ නවෝත්පාදන, ප්‍රමිතීන් සහ ජාත්‍යන්තර සබඳතා ප්‍රවර්ධනය කිරීමෙහිලා මෙම සංගමය ප්‍රමුඛ කාර්යභාරයක් ඉටු කරයි.
දෙරට අතර ආයෝජන, සංචාරක සහ විදේශ රැකියා ක්ෂේත්‍රයන්හි පවතින සබඳතා තවදුරටත් පුළුල් කරගැනීමට මෙම සංචාරය ප්‍රබල පිටිවහලක් වනු ඇතැයි විදේශ කටයුතු අමාත්‍යාංශය අපේක්ෂා කරයි.
වර්තමාන ආර්ථික පසුබිම හමුවේ විදේශීය සෘජු ආයෝජන (FDI) ආකර්ෂණය කරගැනීම සහ විදේශ රැකියා වෙළෙඳපොළ බහුඅංගීකරණය කිරීම ශ්‍රී ලංකාවට අත්‍යවශ්‍ය කරුණක් වී ඇත. රුසියාව වැනි බලවත් රාජ්‍යයන් සමඟ පවත්නා ද්විපාර්ශ්වික ආර්ථික සබඳතා වර්ධනය කරගැනීම මඟින් ඉදිකිරීම් සහ සංචාරක ක්ෂේත්‍රයන්හි නව පිබිදීමක් ඇතිවනු ඇතැයි ආර්ථික විශ්ලේෂකයෝ පෙන්වා දෙති.
