*'ශ්‍රී ලංකා මාධ්‍ය කොමිෂන් සභාව' ඇතුළු විකල්ප යෝජනා ඉදිරිපත් කරද්දී රජය තනිපෙළට කටයුතු කරන බවට චෝදනා
රජය විසින් ඉදිරිපත් කිරීමට සූදානම් වන ‘ශ්‍රී ලංකා වෘත්තීය ජනමාධ්‍යවේදීන්ගේ වරලත් ආයතන පනත් කෙටුම්පත’ මඟින් මාධ්‍යයේ ස්වාධීනත්වයට සහ නිදහසට බරපතල තර්ජනයක් එල්ල වන බව පවසමින් ශ්‍රී ලංකා පුවත්පත් ආයතනය (SRI LANKA PRESS INSTITUTE) සහ මෙරට ප්‍රධාන පෙළේ මාධ්‍ය සංවිධාන ගණනාවක් එක්ව රජයට සිය කනස්සල්ල සහ දැඩි විරෝධය පළ කර සිටියි.
ශ්‍රී ලංකා පුවත්පත් ප්‍රකාශකයින්ගේ සංගමය, ශ්‍රී ලංකා කර්තෘ සංසදය, නිදහස් මාධ්‍ය ව්‍යාපාරය, ශ්‍රී ලංකා වෘත්තීය ජනමාධ්‍යවේදීන්ගේ සංගමය යන පාර්ශවකාර සංවිධාන මෙන්ම මුස්ලිම් මාධ්‍ය සංසදය, දෙමළ මාධ්‍ය සන්ධානය, මාධ්‍ය සේවක වෘත්තීය සමිති සම්මේලනය සහ දකුණු ආසියානු මාධ්‍ය සංගමයේ ශ්‍රී ලංකා ශාඛාව යන අනුබද්ධ ආයතන එක්ව විශේෂ මාධ්‍ය නිවේදනයක් නිකුත් කරමින් මෙම විරෝධතාව සටහන් කර ඇත.
රාජ්‍ය මැදිහත්වීම සහ වෘත්තීය අයිතිය
මෙම පනත් කෙටුම්පතට එරෙහි ප්‍රධානතම චෝදනාව වන්නේ එය මාධ්‍ය ක්ෂේත්‍රයේ පාර්ශවකරුවන්ගේ මූලිකත්වයෙන් තොරව රජය විසින්ම මෙහෙයවනු ලබන ව්‍යාපෘතියක් වීමයි. ඉංජිනේරු ආයතනය හෝ ගෘහ නිර්මාණ ශිල්පීන්ගේ ආයතනය වැනි මෙරට සසු සම්ප්‍රදායික වෘත්තීය ආයතන පාර්ලිමේන්තුව හරහා සම්මත කර ගැනීමට පෙර අදාළ වෘත්තිකයන් විසින්ම ආරම්භ කර කෙටුම්පත් කළ බව පෙන්වා දෙන මාධ්‍ය සංවිධාන, මෙම පනත මාධ්‍ය ප්‍රජාවේ විරෝධතා නොසලකා හරිමින් සෞඛ්‍ය හා ජනමාධ්‍ය අමාත්‍යවරයාගේ නියෝගයෙන් ප්‍රකාශයට පත් කිරීමට යෑම අනුමත කළ නොහැකි බව සඳහන් කරයි.
ස්වාධීනව පැවතිය යුතු ජනමාධ්‍ය වෘත්තිය මත රාජ්‍යය විසින් පාලනය වන නියාමන රාමුවක් පැටවීමට දරන උත්සාහයක් ලෙස මෙය නිරීක්ෂණය වන බව එම සංවිධාන වැඩිදුරටත් පෙන්වා දෙයි.
විකල්ප යෝජනා සහ රජයට කළ ඉල්ලීම
වෘත්තීය මාධ්‍ය ප්‍රමිතීන් යනු අමාත්‍යවරයෙකුගේ අධීක්ෂණය යටතේ නීතියෙන් පනවන්නක් නොව, මාධ්‍ය ප්‍රජාව විසින්ම මෙහෙයවනු ලබන ස්වයං-නියාමන (Self-Regulation) ක්‍රියාවලියක් විය යුතු බව අදාළ නිවේදනයෙන් අවධාරණය කෙරේ. මේ සඳහා ස්වයං-නියාමන මූලධර්ම මත පදනම් වූ ‘ශ්‍රී ලංකා මාධ්‍ය කොමිෂන් සභාව’ නමැති විකල්ප යාන්ත්‍රණය ශ්‍රී ලංකා පුවත්පත් ආයතනය විසින් මේ වන විටත් ඉදිරිපත් කර තිබේ.
එසේම, රජයට සැබවින්ම මාධ්‍ය වෘත්තීයභාවය ප්‍රවර්ධනය කිරීමට අවශ්‍ය නම්, දශක දෙකකට වැඩි කාලයක් ජනමාධ්‍යවේදීන් පුහුණු කිරීම සම්බන්ධයෙන් ක්ෂේත්‍රයේ ඇගයීමට ලක්ව ඇති ‘ශ්‍රී ලංකා ජනමාධ්‍ය විද්‍යාලය’ (Sri Lanka College of Journalism) රජයේ මූල්‍ය ප්‍රතිපාදන සහිතව ප්‍රමිතීන් ගොඩනැගීමේ විකල්ප මාර්ගයක් ලෙස භාවිත කළ හැකි බවද පෙන්වා දී ඇත.
ප්‍රජාතන්ත්‍රවාදී රාමුවක් තුළ මාධ්‍යයේ ස්වාධීනත්වයට හා නිදහසට ගරු කරමින්, මෙම පනත් කෙටුම්පත වහාම ඉවත් කරගෙන අදාළ සියලු පාර්ශවකරුවන් සමඟ සැබෑ සංවාදයක යෙදෙන ලෙස මාධ්‍ය සංවිධාන එකමුතුව රජයෙන් ඉල්ලා සිටියි.
ජාත්‍යන්තර ප්‍රමිතීන්ට අනුව ජනමාධ්‍ය ක්ෂේත්‍රයේ නිදහස සහ වගවීම පවත්වාගෙන යනු ලබන්නේ ආණ්ඩුවලින් තොර ස්වයං-නියාමන ක්‍රමවේදයන් හරහාය. රාජ්‍ය පාලනය යටතේ පවතින නියාමන ආයතන මඟින් මාධ්‍ය මර්දනයට මඟපෑදිය හැකි බවට ජාත්‍යන්තර මාධ්‍ය නිරීක්ෂණ සංවිධාන ද දිගින් දිගටම අනතුරු අඟවා තිබේ.
