විෂමද්‍රව්‍ය පනත, බන්ධනාගාර ඩිජිටල්කරණය සහ බන්ධනාගාර තුළ ජීවිත අහිමිවීම් පිළිබඳව පාර්ලිමේන්තුව උණුසුම් වෙයි
අධිකරණ පද්ධතියේ පවතින නඩු ප්‍රමාදයන් අවම කිරීමට නම් සිදුකළ යුත්තේ විනිසුරුවරුන්ගේ විශ්‍රාම යෑමේ වයස් සීමාව ඉහළ නැංවීම නොව, අධිකරණ සංඛ්‍යාව වැඩි කිරීම සහ නව විනිසුරුවරුන්ට අවස්ථාව ලබාදීම බව ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ප්‍රකාශ කළේය.
2026 ජූලි 24 වන දින පාර්ලිමේන්තුවේ පැවැති විවාදයට එක්වෙමින් මන්ත්‍රීවරයා මෙම අදහස් පළ කළේය.
අධිකරණ පද්ධතිය සහ විනිසුරු විශ්‍රාම වයස
විනිසුරුවරුන්ගේ විශ්‍රාම වයස ඉහළ නැංවීමට ආණ්ඩුව ගෙන එන යෝජනාව විවේචනය කරමින් නාමල් රාජපක්ෂ පෙන්වා දුන්නේ මෙරට අධිකරණ පද්ධතියට එක්වීමට සුදුසුකම් ලත් විශාල පිරිසක් සිටින බවයි.
"නඩු අහන්න, ඉක්මන් කරන්න, අධිකරණ වල ප්‍රමාණය වැඩි කරන්න. විනිශ්චයකාරවරුන්ගේ වයස් සීමාව වැඩි කරා කියලා අධිකරණ ප්‍රමාණය වැඩි වෙන්නේ නැහැනේ? අධිකරණ පද්ධතියට බැඳෙන්න බලාගෙන විශාල පිරිසක් ඉන්නවා. හැම අවුරුද්දෙම නීතිඥවරු 1,000කට, 1,500කට ආසන්න ප්‍රමාණයක් දිවුරුම් දෙනවා. අපේ රටේ අධිකරණ පද්ධතියට මේ නීතිඥවරුන්ගේ, ගරු විනිශ්චයකාරවරුන්ගේ අඩුවක් නැහැ. අවස්ථාව දෙන්නයි තියෙන්නේ," යැයි මන්ත්‍රීවරයා පැවසීය.
එමෙන්ම, නීතිඥ සංගමයේ සභාපතිවරයා විපක්ෂ නායකවරයා හමුවීම සම්බන්ධයෙන් ආණ්ඩු පාර්ශවය එල්ල කරන චෝදනා පිළිබඳව අධිකරණ අමාත්‍යවරයාගේ සහ නියෝජ්‍ය අමාත්‍යවරයාගේ ස්ථාවරය කුමක්දැයි ඔහු ප්‍රශ්න කර සිටියේය.
බන්ධනාගාර අර්බුදය, නීති ප්‍රතිසංස්කරණ සහ ආරක්ෂාව
බන්ධනාගාර පද්ධතිය තුළ මෑතකදී සිදු වූ සිදුවීම් සහ පුද්ගල මරණ සම්බන්ධයෙන් ද අදහස් දැක්වූ මන්ත්‍රීවරයා, එම තත්ත්වයන් පාලනය කිරීමට ආණ්ඩුව අපොහොසත් වී ඇති බවට චෝදනා කළේය. අදාළ සිදුවීම් සම්බන්ධයෙන් බුද්ධි අංශ වාර්තා ලැබුණේද යන්නත්, ඒ පිළිබඳ ජනාධිපතිවරයා සහ ආරක්ෂක කවුන්සිලය ගත් පියවර කවරේද යන්නත් ආණ්ඩුව පැහැදිලි කළ යුතු බව ඔහු සඳහන් කළේය.
මීට අමතරව, බන්ධනාගාර පද්ධතියේ පවතින තදබදය අවම කිරීම සඳහා ගතහැකි ක්‍රියාමාර්ග ප්‍රමාද කර ඇති බවටද නාමල් රාජපක්ෂ චෝදනා කළේය.
විෂමද්‍රව්‍ය පනත:
මාස හයකට පෙර සංශෝධනය කිරීමට තිබූ විෂමද්‍රව්‍ය පනත පාර්ලිමේන්තුවට ඉදිරිපත් නොකිරීම හේතුවෙන් බන්ධනාගාරගත සැකකරුවන් 15,000කට ආසන්න සංඛ්‍යාවකගේ නීතිමය තීන්දු ප්‍රමාද වී ඇති බව ඔහු පැවසීය.
ඩිජිටල්කරණය:
පසුගිය රජය සමයේ ආරම්භ කළ බන්ධනාගාර ඩිජිටල්කරණ ප්‍රසම්පාදන ක්‍රියාවලිය වත්මන් රජය විසින් අඛණ්ඩව ඉදිරියට ගෙන නොයාම පිළිබඳව ද මන්ත්‍රීවරයා ප්‍රශ්න කළේය.
බන්ධනාගාර තුළ ඇති වී තිබෙන තදබදය, ඖෂධ හිඟය සහ ඩෙංගු ව්‍යාප්තිය පාලනය කිරීමට නිලධාරීන්ට චෝදනා නොකර ආණ්ඩුව සෘජුව වගකීම භාරගත යුතු බව මන්ත්‍රීවරයා වැඩිදුරටත් අවධාරණය කළේය.
ශ්‍රී ලංකාවේ අධිකරණ පද්ධතිය තුළ දැනට ලක්ෂ 11කට අධික නඩු සංඛ්‍යාවක් ගොඩගැසී පවතින අතර, බන්ධනාගාර පද්ධතියේ ධාරිතාව 10,000ක් පමණ වුවද රැඳවියන් 40,000කට අධික සංඛ්‍යාවක් පසුවෙති. නඩු ප්‍රමාදය අවම කිරීම සහ බන්ධනාගාර තදබදය පාලනය කිරීම සඳහා විනිසුරු පුරප්පාඩු පිරවීම, ව්‍යවස්ථාපිත ප්‍රතිසංස්කරණ සහ යටිතල පහසුකම් ඩිජිටල්කරණය කිරීම පිළිබඳව පාර්ලිමේන්තුව තුළ දීර්ඝකාලීන සංවාදයක් පවතියි.
