උපාධිධාරීන්, ගොවීන් සහ ධීවරයින් අසරණ වෙද්දී විපක්ෂය මර්දනය කිරීමට ආණ්ඩුව උත්සාහ කරන බවට චෝදනා
ශ්‍රේෂ්ඨාධිකරණ විනිසුරුවරුන්ගේ විශ්‍රාම යන වයස් සීමාව දීර්ඝ කිරීම සඳහා ආණ්ඩුව සූදානම් වන්නේ නම්, ඊට අදාළ ව්‍යවස්ථා සංශෝධනය වෙනුවෙන් ජනමත විචාරණයකට යන ලෙස ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ ආණ්ඩුවට අභියෝග කරයි.
ජාඇළ ප්‍රදේශයේ පැවැති ජනරැලියක් අමතමින් මන්ත්‍රීවරයා කියා සිටියේ ජනතාවගේ දෛනික ජීවන පීඩනය සහ ආර්ථික ගැටලු පසෙකලා මෙවැනි සංශෝධන ගෙන ඒම පිළිබඳව අවසාන තීරණය රටේ ජනතාව සතු විය යුතු බවයි.
ජීවන වියදම, බදු බර සහ ආර්ථික කළමනාකරණය
ආණ්ඩුව බලයට පැමිණීමට ලබාදුන් පොරොන්දු ඉටුකිරීමට අපොහොසත් වී ඇති බව පෙන්වා දුන් නාමල් රාජපක්ෂ, අසීමිත බදු බර සහ ජීවන වියදම හමුවේ සාමාන්‍ය ජනතාව දැඩි ලෙස පීඩාවට පත්ව සිටින බව සඳහන් කළේය.
ගොවීන්ට සහ ධීවරයින්ට මුහුණ දීමට සිදුව ඇති අර්බුද, පොහොර හිඟය, සහ නිසි මිලක් නොලැබීම පිළිබඳව රජයේ අවධානය යොමු නොවන්නේ යැයි ද, කර්මාන්තශාලා වැසී යාම සහ ආයෝජකයන් ඉවත්වීම හේතුවෙන් තරුණ තරුණියන්ගේ රැකියා අහිමිවීමේ තත්ත්වයක් නිර්මාණය වී ඇති බවත් ඔහු පෙන්වා දුන්නේය.
එමෙන්ම, පෞද්ගලික බැංකුවකින් සිදු වූවා යැයි කියන මුදල් අතුරුදහන් වීම් සහ මූල්‍ය පද්ධතියේ පවතින ගැටලු සම්බන්ධයෙන් මුදල් අමාත්‍යාංශය සහ මහ බැංකුව නිසි පරිදි ක්‍රියාත්මක වී නොමැති බවට ද ඔහු චෝදනා කළේය.
නීතිය, බන්ධනාගාර සහ විනිසුරුවරුන්ගේ වයස් සීමාව
විශේෂයෙන්ම ශ්‍රේෂ්ඨාධිකරණ විනිසුරුවරුන්ගේ විශ්‍රාම වයස ඉහළ නැංවීමේ යෝජනාවට ලංකා නීතිඥ සංගමය, ආසියානු නීතිඥ සංගමය සහ පොදුරාජ්‍ය මණ්ඩලීය නීතිඥ සංගමය වැනි වෘත්තීය ආයතන විරුද්ධත්වය පළ කර ඇති බව පෙන්වා දුන් නාමල් රාජපක්ෂ, මෙම පනත සම්බන්ධයෙන් අධිකරණය හමුවට යාමේදී විනිසුරුවරුන් පවා අසරණ වන බැවින්, ආණ්ඩුව තමන්ගේ මතය නිවැරදි යැයි සිතන්නේ නම් ජනමත විචාරණයකින් මහජන මතය විමසිය යුතු බව අවධාරණය කළේය.
නව සංවර්ධන මාදිලියක් සහ තරුණ නියෝජනය
ඉදිරියේදී ශ්‍රී ලංකා පොදුජන පෙරමුණ නූතන පරම්පරාවේ අපේක්ෂාවන් ඉටුකළ හැකි, වෛරය සහ කුහකත්වයෙන් තොර නව දේශපාලන බලවේගයක් ලෙස ගම්මට්ටමින් සංවිධානය වන බවත්, ඊට එකතු වන ලෙසත් මන්ත්‍රීවරයා ජනතාවගෙන් ඉල්ලා සිටියේය.
ජාඇළ පැවැති ශ්‍රී ලංකා පොදුජන පෙරමුණේ ජනරැලියේදී නාමල් රාජපක්ෂ දැක්වූ අදහස් ඇතුළත් වීඩියෝ දර්ශන මතු පළවේ.
