වාහන ආනයන සීමා සාර්ථකයි: විදේශ විනිමය පිටතට යාම පාලනය වෙයි!

මෝටර් රථ සහ රත්රන් සඳහා වන ණය පහසුකම් තද කිරීමට මහ බැංකුව පියවර ගනී: තාවකාලික සීමා දීර්ඝ කිරීම රජයේ තීරණයක් මත

මෙරටින් විදේශ විනිමය අනවශ්‍ය ලෙස පිටතට ගලායාම පාලනය කිරීමේ අරමුණින් රජය සහ ශ්‍රී ලංකා මහ බැංකුව එක්ව ක්‍රියාත්මක කළ සංශෝධිත ප්‍රතිපත්තිමය තීරණ සාර්ථක වී ඇති බව වෙළෙඳ හා ආයෝජන ප්‍රතිපත්ති දෙපාර්තමේන්තුව ප්‍රකාශ කරයි.

වාහන ආනයනය සඳහා පැනවූ 50%ක තාවකාලික රේගු බදු අධිභාරය (Customs Import Duty Surcharge) සහ මහ බැංකුව මඟින් වාහන ණය පහසුකම් සඳහා ලබාදෙන LTV (Loan-to-Value) අනුපාතය සීමා කිරීම හේතුවෙන් වාහන ආනයනය සැලකිය යුතු ලෙස පහත බැස ඇති බව එම දෙපාර්තමේන්තුවේ අධ්‍යක්ෂ ජෙනරාල් අයි.ජේ. අබේරත්න සඳහන් කළාය.

රේගු බදු අධිභාරය සහ LTV අනුපාත තද කිරීම

මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය විසින් රේගු ආඥා පනතේ 10A වගන්තිය ප්‍රකාරව, 2026 මැයි 16 වනදා සිට බලපැවැත්වෙන පරිදි මාස 3ක කාලයකට ක්‍රියාත්මක වන සේ මෝටර් රථ, බස් රථ, ත්‍රිරෝද රථ, ගිලන් රථ, වෑන් රථ සහ වෙනත් විශේෂිත වාහන සඳහා අදාළ රේගු ආනයන බද්ද මත 50%ක අධිභාරයක් පනවන ලදී.

එමෙන්ම, මැයි 25 වනදා සිට ක්‍රියාත්මක වන පරිදි ශ්‍රී ලංකා මහ බැංකුව විසින් වාහන ණය පහසුකම් සඳහා වන උපරිම LTV අනුපාත සියයට 10ක ප්‍රමාණයකින් පහත හෙළීමට පියවර ගත්තේය. ඒ අනුව, ලියාපදිංචි නොකළ හෝ වසරකට වඩා අඩුවෙන් භාවිත කළ වාහන සඳහා වාණිජ වාහන වෙනුවෙන් 60%ක් ලෙසද, මෝටර් රථ, SUV, වෑන් සහ ත්‍රිරෝද රථ සඳහා 40%ක් ලෙසද උපරිම LTV සීමාවන් සංශෝධනය විය. මෙයට අමතරව, රත්රන් ඇපයට තබා ලබාගන්නා ණය පහසුකම් සඳහා ද 70%ක උපරිම LTV සීමාවක් හඳුන්වා දෙන ලදී.


මහ බැංකුවේ මූල්‍ය ස්ථාවරත්ව දැක්ම

ගෝලීය භූ-දේශපාලනික සහ භූ-ආර්ථික නොසන්සුන්තාවන් හමුවේ විදේශ විනිමය අනුපාතික සහ රත්රන් ඇතුළු වත්කම්වල මිල ගණන්හි සිදුවන වෙනස්වීම් හමුවේ මුල්‍ය පද්ධතියේ ස්ථාවරත්වය තහවුරු කරගැනීම මෙම පියවරයන්හි ප්‍රධාන අරමුණ බව මහ බැංකුව පෙන්වා දෙයි.

වාහන ආනයන සීමා කිරීම් සහ විදේශ විනිමය අනුපාත වෙනස්වීම් හේතුවෙන් වාහනවල වෙළෙඳපොළ මිල ගණන් තාවකාලිකව ඉහළ යාම මත ණය අවදානම කළමනාකරණය කරගැනීමට මෙම පියවර අත්‍යවශ්‍ය වූ බව මහ බැංකුව වැඩිදුරටත් සඳහන් කරයි.

මැයි මාසයේ සිට මාස තුනක කාලයකට පැනවූ මෙම 50%ක රේගු බදු අධිභාරය ඉදිරියටත් දීර්ඝ කරන්නේද යන්න පිළිබඳව මෙතෙක් අවසන් තීරණයක් ගෙන නොමැති අතර, එය ඉදිරියේදී රජය විසින් ගනු ලබන ප්‍රතිපත්තිමය තීරණයක් මත පදනම් වනු ඇත.

ශ්‍රී ලංකා මහ බැංකුවේ මූල්‍ය ස්ථාවරත්ව රාමුවට අනුව, එකවර වාහන සහ රත්රන් ඇපයට තබා ගනු ලබන ණය ප්‍රමාණය ඉහළ යාම මඟින් බැංකු සහ මූල්‍ය පද්ධතිය තුළ පද්ධතිමය අවදානමක් (Systemic risk) නිර්මාණය විය හැක. Loan-to-Value (LTV) අනුපාතය යනු වත්කමක වෙළෙඳපොළ වටිනාකමෙන් කොපමණ ප්‍රතිශතයක් ණය ලෙස ලබාදිය හැකිද යන්න තීරණය කරන මාපකයයි. එම අනුපාතය පහත හෙළීම මඟින් ණය ලබාගන්නා පුද්ගලයා විසින් දැරිය යුතු මූලික පිරිවැය (Down payment) ඉහළ යන අතර, ඒ හරහා ණය ඉල්ලුම සහ විදේශ විනිමය පිටතට යාම සීමා කෙරේ.

මුලාශ්‍රය :
Forex curbs slash vehicle imports