: ආචාර්ය ප්‍රභාත් වීරසිංහගෙන් රතු එළියක්
මහ බැංකුව සහ කෘෂිකර්ම අමාත්‍යාංශය එක්ව නියාමන වැඩපිළිවෙලක් හඳුන්වා දීමේ දැඩි අවශ්‍යතාවයක්
සැබෑ ලෙසම වගා ව්‍යාපෘති හරහා කෘෂිකර්මාන්තය දියුණු කිරීමට සහ අතමිට සරුකර ගැනීමට කටයුතු කරන කෘෂි කාර්මික කටයුතු නියාමනයට රජය විසින් වහාම විධිමත් වැඩපිළිවෙලක් හඳුන්වා දිය යුතු බව විද්වත්හු ප්‍රකාශ කරති.
මහජනතාවගේ ආයෝජන භාර ගනිමින් කිසිදු නියාමනයක් සිදු නොවන කෘෂි ව්‍යාපෘති වහාම නතර කිරිමට රජය ක්‍රියා කළ යුතු බව රුහුණු විශ්ව විද්‍යාලයේ ජ්‍යේෂ්ඨ කථිකාචාර්ය, ආචාර්ය ප්‍රභාත් වීරසිංහ පවසයි.
කෘෂිකර්ම අමාත්‍යංශය හෝ ශ්‍රී ලංකා මහ බැංකුව හෝ නොමැතිනම් මෙම ආයතන දෙකම එක්ව මෙම කෘෂිව්‍යාපෘති නියාමනය කළ යුතු බව ආචාර්යවරයා යෝජනා කොට සිටී.
සක්විති පන්නයේ වගා සමාගම්වලින් ජනතාව ආරක්ෂා කරගැනීමට මූල්‍ය බුද්ධි අංශ දැඩි ක්‍රියාමාර්ග ගත යුතු යැයිද ඔහු කියයි.
විවිධ වගාක්‍රම සඳහා ආයෝජන ලබාගන්නා මුවාවෙන් ජනතාව රවටමින් මූල්‍ය වංචාවල නියැළෙන වගා සමාගම්වලට එරෙහිව බලධාරීන් විසින් දැඩි ක්‍රියාමාර්ග ගත යුතුව ඇති බව ප්‍රභාත් වීරසිංහ පවසයි.
සක්විති රණසිංහ, හුංගම දඬුවම් මුදලාලි වැන්නන්ගේ මූල්‍ය වංචාවන් ආකාරයෙන්ම මෙකී වගා සමාගම් ද ක්‍රියාත්මක වන බව පෙන්වා දුන් ආචාර්ය ප්‍රභාත් වීරසිංහ, මේවා ග්‍රාමීය ජනතාවගේ ජන ජීවිතය විනාශ කරමින් ඔවුන් බංකොලොත්භාවයට ඇද දමමින් දැවැන්ත සමාජ ඛේදවාචක නිර්මාණය කිරීමේ බරපතළ අනතුරක් පවතින බවද අවධාරණය කරයි.
මේ වංචනික වගා සමාගම්වලට එරෙහිව දැඩි ක්‍රියාමාර්ග ගැනීමේ බරපතළ වගකීමක් ශ්‍රී ලංකා මහ බැංකුවේ මූල්‍ය බුද්ධි ඒකකය (FIU) සහ අනෙකුත් මූල්‍ය අපරාධ විමර්ශන අංශ වෙත පැවරී ඇති බවත් හෙතෙම සඳහන් කළේය.
(සටහන | ජේ.මුණසිංහ)
