ලංකාවේ සංචාරක ක්ෂේත්‍රයේ සම්ප්‍රදායික මතවාද වෙනස් කරමින් ඉන්දියානු සංචාරකයන්ගෙන් ඉහළ ආදායමක්!

ගුවන් ගමන් බාධා හමුවේ වුවද 2026 වසරේ මේ දක්වා මෙරටට පැමිණි සමස්ත සංචාරකයන් සංඛ්‍යාව ලක්ෂ 12 ඉක්මවයි


දීර්ඝ කාලයක් තිස්සේ ශ්‍රී ලංකාවේ සංචාරක ක්ෂේත්‍රයේ ප්‍රධාන උපායමාර්ගය වී තිබුණේ වැඩිම වියදමක් දරන පිරිස ලෙස සැලකෙන යුරෝපීය සංචාරකයන් මෙරටට ආකර්ෂණය කර ගැනීමයි. කෙසේ වෙතත්, ශ්‍රී ලංකා සංචාරක සංවර්ධන අධිකාරියේ (SLTDA) නවතම දත්තයන් පෙන්වා දෙන්නේ ඉන්දියානු සංචාරකයන්ගේ පැමිණීම මෙන්ම ඔවුන් දරන අධික පිරිවැය හේතුවෙන් සංචාරක ආදායමේ සහ පැමිණීමේ ක්ෂේත්‍රයේ දැවැන්ත සංකේතාත්මක වෙනසක් සිදුවෙමින් පවතින බවයි.

ශ්‍රී ලංකා සංචාරක සංවර්ධන අධිකාරිය ලබා දී ඇති නවතම දත්තයන්ට අනුව, මැදපෙරදිග පවතින භූ-දේශපාලනික ආතතීන් සහ නොසන්සුන්තා නිසා ඇතිවූ ගුවන් ගමන් බාධාවන් හමුවේ වුවද, 2026 වසරේ මේ දක්වා කාලය තුළ සංචාරකයන් 1,280,000කට (ලක්ෂ 12.8කට) වැඩි පිරිසක් ශ්‍රී ලංකාවට පැමිණ තිබේ.

මින් ප්‍රධානතම දායකත්වය ලබාදී ඇත්තේ ඉන්දියාව වන අතර, සංචාරකයන් 325,417 දෙනෙකු පැමිණෙමින් සමස්ත සංචාරක පැමිණීමෙන් සියයට 25ක ප්‍රතිශතයක් හිමිකර ගැනීමට ඉන්දියාව සමත්ව ඇත. ජූලි මාසයේ මුල් දින 22 තුළ පමණක් ඉන්දියානු සංචාරකයන් 31,734 දෙනෙකු පැමිණ තිබේ.

වියදම් කිරීමේ රටාවේ පැහැදිලි වෙනසක්

සංචාරකයන් සංඛ්‍යාවට වඩා මෙම සංඛ්‍යාලේඛනවල ඇති විශේෂම කරුණ වන්නේ ඉන්දියානු සංචාරකයන්ගේ වියදම් කිරීමේ රටාවේ සිදුව ඇති වෙනසයි. ශ්‍රී ලංකා සංචාරක ප්‍රවර්ධන කාර්යාංශයේ සභාපති බුද්ධික හේවාවසම්  සඳහන් කරන පරිදි, ඉන්දියානු සංචාරකයෙකු දැනට දිනකට සාමාන්‍යයෙන් ඇමෙරිකානු ඩොලර් 154ක මුදලක් මෙරට තුළ වියදම් කරයි. මෙය මෙරට සංචාරකයෙකුගේ ජාතික දෛනික සාමාන්‍යය වන ඩොලර් 148 අභිබවා යාමක් වන අතර, බොහෝ අවස්ථාවල යුරෝපීය සංචාරකයන් දරන වියදමට ද වඩා වැඩි අගයකි.

වනජීවී නරඹගැනීම, සාගර සංචාරක ව්‍යාපාරය, සුඛෝපභෝගී නවාතැන් සහ විශේෂිත සංචාරක පැකේජ තෝරාගන්නා ඉහළ මට්ටමේ ඉන්දියානු සංචාරකයන් දිනකට ඩොලර් 160ත් 170ත් අතර මුදලක් වැය කරන බව සංචාරක ක්ෂේත්‍රයේ නිලධාරීහු පෙන්වා දෙති. මින් පෙන්නුම් කරන්නේ අඩු පිරිවැය සංචාරකයන් වෙනුවට ඉහළ වටිනාකමකින් යුත් සංචාරකයන් ශ්‍රී ලංකාව වෙත වැඩි වශයෙන් ආකර්ෂණය වන බවයි.

ගෝලීය වාතාවරණය සහ ජූලි පැමිණීම්

මැදපෙරදිග කලාපයේ පවතින ගැටුම්කාරී තත්ත්වයන් හමුවේ ප්‍රධාන ගුවන් සංක්‍රමණික මධ්‍යස්ථානවල සිදුවූ ගුවන් ගමන් සීමා කිරීම් නිසා යුරෝපීය සංචාරකයන්ගේ පැමිණීමට බාධා එල්ල විය. එසේ වුවද ජූලි මාසයේ මුල් දින 22 තුළ සංචාරකයන් 138,730 දෙනෙකු පැමිණ ඇති අතර, පසුගිය වසරේ අදාළ කාල සීමාවට සාපේක්ෂව පැමිණීමේ අඩුවීම සියයට 0.4ක් වැනි සුළු මට්ටමකට සීමා කරගැනීමට හැකිවී තිබේ. ජූලි මාසය තුළ දෙවනුව වැඩිම සංචාරකයන් සංඛ්‍යාවක් පැමිණ ඇත්තේ එක්සත් රාජධානියෙන් (14,959) වන අතර, චීනය, නෙදර්ලන්තය සහ ඕස්ට්‍රේලියාව පිළිවෙලින් ඊළඟ ස්ථාන ලබාගෙන ඇත.

මෙම නව ප්‍රවණතාවත් සමඟ, ඉදිරියේදී සාම්ප්‍රදායික යුරෝපීය වෙළඳපොළ කෙරෙහි පමණක් අවධානය යොමුකරනවාද, නැතහොත් ඉහළ ආදායම් ලබන ඉන්දියානු සංචාරකයන් ඉලක්ක කරගනිමින් විශේෂිත සංචාරක නිෂ්පාදන ප්‍රවර්ධනය කරනවාද යන්න පිළිබඳව ප්‍රතිපත්ති සම්පාදකයන්ගේ අවධානය යොමු විය යුතුව තිබේ. Current spending trends අනුව යමින් ඉන්දියාව හුදෙක් වැඩිම සංචාරකයන් සංඛ්‍යාවක් පැමිණෙන රට පමණක් නොව, ශ්‍රී ලංකාවට වැඩිම ආර්ථික වටිනාකමක් ලබාදෙන සංචාරක වෙළඳපොළ බවට පත්වීමේ ප්‍රවණතාවක් මතුව ඇත.

(සටහන | සම්පත් ධීරසේකර )

මුලාශ්‍රය :

High-Spending Indian Visitors Rewrite Sri Lanka Tourism Recovery Narrative