අසීමිත බදු බර, හැකර් ප්‍රහාර සහ දේශපාලන මර්දනය හමුවේ ජනතාව දැඩි අසරණභාවයකට පත්ව ඇති බවට ප්‍රකාශයක්
ප්‍රතිපත්තිමය වශයෙන් සහ ප්‍රායෝගික ක්‍රියාකාරීත්වයෙන් වත්මන් රජය අසමත්ව ඇති බවත්, අවම වශයෙන් සංස්කෘතික උත්සවයක් හෝ පෙරහැරක් සඳහා ආරක්ෂාව ලබාදීමට නොහැකි තරමට රටේ නීතිය හා සාමය පිරිහී ඇති බවත් ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ පවසයි.
පාදුක්ක ප්‍රදේශයේ පැවති ජන හමුවක් අමතමින් ඔහු මෙම අදහස් පළ කළේය.
සංස්කෘතික උත්සව සහ ආරක්ෂාව පිළිබඳ ගැටලු
දෙවිනුවර දේවාලයේ සහ කුඩාවැල්ල ප්‍රදේශයේ පෙරහැරවල සංස්කෘතික අංගයක් වන කාවඩි නැටුම් පොලිස්පතිවරයාගේ නියෝග මත නවත්වා ඇති බව පෙන්වා දුන් මන්ත්‍රීවරයා, එය දැඩි ලෙස විවේචනයට ලක් කළේය. ඓතිහාසික යුධ සමයේදී සහ එල්ටීටීඊ ත්‍රස්තවාදී තර්ජන පැවති අසීරුම කාලවකවානුවලදී පවා ආරක්ෂාව සපයමින් පෙරහැරවල් සහ කාවඩි ගමන් කළ බව සිහිපත් කළ හෙතෙම, අද වන විට ආණ්ඩුවට සහ පොලිසියට එවැනි අවම ආරක්ෂාවක් හෝ සැපයීමට නොහැකි වී ඇති බව සඳහන් කළේය.
ආණ්ඩුව ජනතාවගේ ආරක්ෂාව තහවුරු කරනවා වෙනුවට විපක්ෂය මර්දනය කිරීම සඳහා පමණක් තම කාලය වැය කරන බවත්, එහි ප්‍රතිඵලයක් ලෙස පාතාල කණ්ඩායම් සහ සංවිධානාත්මක අපරාධකරුවන් හිස ඔසවා ඇති බවත් මන්ත්‍රීවරයා වැඩිදුරටත් කියා සිටියේය.
ආර්ථික අර්බුද සහ බදු බර
රටේ ව්‍යාපාරිකයන් සහ සාමාන්‍ය ජනතාව මත අසීමිත බදු බරක් පටවා ඇති බව පෙන්වා දුන් නාමල් රාජපක්ෂ, එම බදු මුදල් නිසි ලෙස ජනතා සුබසාධනයට හෝ ආර්ථික සංවර්ධනයට යොදවන බවට විශ්වාසයක් නොමැති බව සඳහන් කළේය. රජයේ මූල්‍ය පද්ධතිය තුළ සිදුවූ බව කියන මූල්‍ය වංචා සහ වැරදි ගිණුම්ගත කිරීම් පිළිබඳව දැඩි ප්‍රශ්න මතු කළ හෙතෙම, ආණ්ඩුවේ අකාර්යක්ෂමතාව හේතුවෙන් ගොවීන්, ධීවරයන් මෙන්ම සමස්ත පාරිභෝගික ජනතාවම දැඩි ආර්ථික පීඩනයකට ලක්ව සිටින බව අවධාරණය කළේය.
නව දේශපාලන බලවේගයක් ගොඩනැගීමේ අරමුණින් බලයට පත්වූ වත්මන් පාලනය මේ වන විට ගතානුගතික හා පීඩාකාරී ප්‍රතිපත්ති අනුගමනය කරමින් සිටින බවත්, ඊට එරෙහිව ගම් මට්ටමින් සියලු දෙනා එක්වන ලෙසත් ඔහු මෙහිදී වැඩිදුරටත් ඉල්ලා සිටියේය.
