වතුකරයේ සෞඛ්‍ය සහ අධ්‍යාපනික ගැටලු විසඳීමට ජනාධිපති කාර්ය සාධන බලකායක් පිහිටුවීමට යෝජනා
වතුකරයේ ජනතාව හුදෙක් වතු කම්කරුවන් ලෙස පමණක් තැබීම වෙනුවට ඔවුන් ඉඩම් හිමිකම සහිත වතු ව්‍යවසායකයන් සහ කුඩා තේ වතු හිමියන් ලෙස බලමුළු ගැන්වීමට සමගි ජන බලවේග රජයක් යටතේ කටයුතු කරන බව විපක්ෂ නායක සජිත් ප්‍රේමදාස පවසයි.
බලංගොඩ සන්සිටි හෝටලයේදී පාර්ලිමේන්තු මන්ත්‍රී සුජිත් සංජය පෙරේරා විසින් සංවිධානය කරන ලද සමගි වතු සේවක සංගමයේ වාර්ෂික සම්මේලනය අමතමින් විපක්ෂ නායකවරයා මේ බව ප්‍රකාශ කළේය.
වතුකරයේ ආර්ථිකය සහ ඉඩම් හිමිකම
මැතිවරණ සමයන්හිදී විවිධ පාර්ශ්වයන් විසින් ලබාදෙන වැටුප් පොරොන්දු ප්‍රායෝගිකව ඉටු නොවන බවත්, අදටත් වතුකරයේ අතිමහත් බහුතරයක් ජනතාව ලැයිම් කාමරවල ජීවත් වන බවත් විපක්ෂ නායකවරයා පෙන්වා දුන්නේය. මෙරට තේ ඉඩම්වලින් සියයට 60ක් මහා පරිමාණ ව්‍යාපාරිකයන් සතුව පැවතුණද ඔවුන්ගෙන් ජාතික තේ නිෂ්පාදනයට ලැබෙන්නේ සියයට 30ක පමණ දායකත්වයකි. නමුත් සියයට 40ක ඉඩම් ප්‍රමාණයක් හිමි කුඩා තේ වතු හිමියන් ජාතික තේ නිෂ්පාදනයට සියයට 70ක දායකත්වයක් ලබාදෙන බව හෙතෙම සඳහන් කළේය.
ඒ අනුව, වතුකරයේ වැටුප් ගැටලුවට ඇති එකම විසඳුම හුදෙක් දෛනික වැටුප වැඩි කිරීම පමණක් නොවන බවත්, රාජ්‍ය සහ පෞද්ගලික වතුවල තේ වගා නොකර පවතින මුඩු ඉඩම් වතු ප්‍රජාවට ලබාදී ඔවුන් කුඩා තේ වතු හිමියන් සහ ව්‍යවසායකයන් බවට පත්කිරීමට සමගි ජන බලවේගය සූදානම් බවත් සජිත් ප්‍රේමදාස පැවසීය.
අධ්‍යාපනය, සෞඛ්‍යය සහ නීතිමය සුරක්ෂිතතාව
වතුකරයේ පවතින අධ්‍යාපන සහ සෞඛ්‍ය ක්ෂේත්‍රවල මානව සහ භෞතික සම්පත් හිඟයට විසඳුම් ලබාදීම වෙනුවෙන් සියලු අංශ ඒකාබද්ධ කරමින් විශේෂ ජනාධිපති කාර්ය සාධන බලකායක් ස්ථාපිත කරන බවද විපක්ෂ නායකවරයා මෙහිදී අවධාරණය කළේය.
එමෙන්ම 1889 අංක 13 දරන ඉන්දියානු වතුකම්කරු ආඥා පනතේ 24(1) වගන්තිය ප්‍රකාරව වතු ප්‍රජාවට නිවාස පහසුකම් හිමිවන බව පෙන්වා දුන් හෙතෙම, ඇතැම් පිරිස් 1979 වසරේ පැරණි නීති උපයෝගී කරගනිමින් වතුකරයේ ජනතාව පන්නා දැමීමට ගන්නා උත්සාහයන් නීතිවිරෝධී බව ප්‍රකාශ කළේය. එවැනි අසාධාරණයන්ට ලක්වන ජනතාව වෙනුවෙන් නීතිමය පියවර ගැනීම සඳහා සමගි ජන බලවේගය හරහා විශේෂ නීතිඥ මණ්ඩලයක් පත්කිරීමට කටයුතු කරන බවද විපක්ෂ නායකවරයා වැඩිදුරටත් කියා සිටියේය.
