විනිසුරු විශ්‍රාම වයස වැඩි කිරීමට අදාළ ව්‍යවස්ථා සංශෝධනය හදිසියේ නොගෙනෙන ලෙස ‘ෆ්‍රී ලෝයර්ස්’ සංවිධානයෙන් ඉල්ලීමක්!

නීතියේ ප්‍රමාදය නැවැත්වීමට විනිසුරුවන්ගේ විශ්‍රාම වයස දීර්ඝ කිරීම විසඳුමක් නොවන බවත්, පුළුල් පාර්ශ්වකරුවන්ගේ සහභාගීත්වයෙන් සාකච්ඡා ඇරඹිය යුතු බවත් අවධාරණය කෙරේ


උපරිමාධිකරණ විනිසුරුවරුන්ගේ විශ්‍රාම යන වයස දීර්ඝ කිරීමට අදාළ ව්‍යවස්ථා සංශෝධන යෝජනාව හදිසියේ අමාත්‍ය මණ්ඩලයට ඉදිරිපත් කිරීමට රජය ගන්නා උත්සාහයට සිය තදබල විරෝධය පළකරන බව 'ෆ්‍රී ලෝයර්ස්' (Free Lawyers Sri Lanka) සංවිධානය නිවේදනයක් නිකුත් කරමින් සඳහන් කරයි.

තවත් මාස හතරකින් පමණ විශ්‍රාම යාමට නියමිත වත්මන් අගවිනිසුරුවරයාගේ ධුර කාලය දීර්ඝ කිරීමේ අරමුණින්, විනිවිදභාවයකින් හෝ නිසි පාර්ශ්වකරුවන්ගේ සහභාගීත්වයකින් තොරව මෙම පියවර ගැනීමට උත්සාහ කිරීම අධිකරණයේ ස්වාධීනත්වය සහ අපක්ෂපාතීත්වය කෙරෙහි මහජනතාව තබා ඇති විශ්වාසය බිඳවැටීමට හේතුවන බව එම සංවිධානය පෙන්වා දෙයි.

ජනාධිපතිවරයාගේ දේශපාලන උරුමයට විය හැකි බලපෑම

ශ්‍රී ලංකා නීතිඥ සංගමයේ (BASL) හිටපු සභාපති, ජ්‍යෙෂ්ඨ නීතිඥ සාලිය පීරිස් ගේ අදහස් උපුටා දක්වමින් 'ෆ්‍රී ලෝයර්ස්' සංවිධානය සඳහන් කරන්නේ, පූර්ව පාලකයන් මෙන්ම අධිකරණයේ ස්වාධීනත්වයට අතපෙවීමට දැරූ මෙවැනි දුරදිග නොබලන ක්‍රියාමාර්ග මගින් ජනාධිපති අනුර කුමාර දිසානායක ගේ දේශපාලන උරුමයට සහ ප්‍රතිරූපයටද දැඩි හානියක් සිදුවීමේ අවදානමක් පවතින බවයි.  

විනිසුරුවරුන්ගේ ධුර කාලය පාලනය වන ව්‍යවස්ථාපිත ප්‍රතිපාදන අධිකරණ ස්වාධීනත්වයේ ප්‍රධානතම පදනමකි. පාර්ශවකරුවන්ගේ අදහස් විමසීමකින් තොරව රහසිගතව මෙවැනි සංශෝධන සිදුකිරීම මගින් අනාගත ආණ්ඩුවලටද තම දේශපාලන වුවමනාවන් මත විනිසුරුවරුන්ගේ සේවා කාලය හිතුමනාපයේ වෙනස් කිරීමට නරක පූර්වාදර්ශයක් සැපයෙන බව අදාළ නිවේදනයේ වැඩිදුරටත් දැක්වේ.

විධිමත් සංවාදයක අවශ්‍යතාව

නීති පද්ධතිය තුළ පවතින නඩු ප්‍රමාදය සහ ව්‍යුහාත්මක දුර්වලතාවන්ට විසඳුම් සෙවීමේ හදිසි අවශ්‍යතාව පිළිගන්නා නමුත්, තනි පුද්ගලයෙකුගේ විශ්‍රාම යාම ඉලක්ක කරගනිමින් කෙරෙන හදිසි ව්‍යවස්ථා සංශෝධන හරහා එම ගැටලුවලට පිළියම් යෙදිය නොහැකි බව සංවිධානය අවධාරණය කරයි. විනිසුරුවරුන්ගේ විශ්‍රාම වයස දීර්ඝ කිරීමෙන් පමණක් නීතියේ ප්‍රමාදයන් නැවැත්විය නොහැකි බැවින්, අදාළ යෝජනාව වහාම අත්හිටුවා නීතිඥ සංගමය, අධිකරණය, සිවිල් සමාජය සහ මහජනතාව සම්බන්ධ කරගනිමින් විනිවිදභාවයෙන් යුතු පුළුල් සංවාදයක් ආරම්භ කරන ලෙස රජයෙන් ඉල්ලා සිටී.

'ෆ්‍රී ලෝයර්ස්' සංවිධානය වෙනුවෙන් ජනාධිපති නීතිඥ මෛත්‍රී ගුණරත්න සහ එම සංවිධානයේ ප්‍රධාන විධායක නිලධාරී, ඌව, දකුණ සහ මධ්‍යම පළාත් හිටපු ආණ්ඩුකාර රජිත් කීර්ති තෙන්නකෝන් ගේ අත්සනින් මෙම නිවේදනය නිකුත් කර ඇත.