නව සංශෝධන කෙටුම්පත ඉදිරියේදී පාර්ලිමේන්තුවට: අල්ලස් සහ දූෂණ මර්දන රාමුව තවදුරටත් ශක්තිමත් කිරීමට පියවර
2023 අංක 9 දරන දූෂණ විරෝධී පනත සංශෝධනය කිරීම සඳහා වන නව පනත් කෙටුම්පතක් ගැසට් පත්‍රය මගින් ප්‍රකාශයට පත් කිරීමට රජය පියවර ගෙන තිබේ.
ජනාධිපති අනුර කුමාර දිසානායක විසින් ඉදිරිපත් කරන ලද අදාළ සංශෝධිත පනත් කෙටුම්පත ඊයේ (ජූලි 27) දින රජයේ අතිවිශේෂ ගැසට් පත්‍රය මගින් ප්‍රකාශයට පත්කර ඇති බව වාර්තා වේ.
මෙම පියවර මගින් දැනට බලාත්මකව පවතින දූෂණ විරෝධී නීති රාමුව තුළ පවතින ප්‍රායෝගික ගැටලු නිරාකරණය කරමින්, අල්ලස්, දූෂණ සහ වත්කම් බැරකම් ප්‍රකාශ කිරීමට අදාළ විමර්ශන හා නීතිමය ක්‍රියාමාර්ග වඩාත් කාර්යක්ෂම කිරීම අරමුණු කරයි.
නව සංශෝධනවල අරමුණු සහ පාර්ලිමේන්තු ක්‍රියාවලිය
2023 වසරේදී සම්මත කරන ලද දූෂණ විරෝධී පනත මගින් අල්ලස් හෝ දූෂණ චෝදනා විමර්ශන කොමිෂන් සභාවේ (CIABOC) ස්වාධීනත්වය සහ බලතල පුළුල් කෙරුණු අතර, මහජන නියෝජිතයන් සහ ඉහළ රාජ්‍ය නිලධාරීන්ගේ වත්කම් බැරකම් ප්‍රකාශ කිරීමේ ක්‍රියාවලිය ද නවීකරණය කෙරිණි.
එලෙස හඳුන්වා දුන් පනත ප්‍රායෝගිකව ක්‍රියාත්මක කිරීමේදී මතු වූ නීතිමය හා තාක්ෂණික අවශ්‍යතාවලට අනුකූලව මෙම නව සංශෝධන හඳුන්වා දී ඇති බව සදහන් වේ.
අතිවිශේෂ ගැසට් පත්‍රය මගින් ප්‍රකාශයට පත්කරන ලද මෙම සංශෝධිත පනත් කෙටුම්පත ඉදිරි පාර්ලිමේන්තු සභා වාරයේදී නිල වශයෙන් පාර්ලිමේන්තුවට ඉදිරිපත් කිරීමට නියමිත අතර, ඉන් අනතුරුව විවාදයට ගෙන සම්මත කරගැනීමට නියමිතව තිබේ. ජාත්‍යන්තර මූල්‍ය අරමුදල (IMF) සහ ජාත්‍යන්තර මූල්‍ය ආයතන විසින් ශ්‍රී ලංකාවේ යහපාලනය සහ රාජ්‍ය මූල්‍ය විනිවිදභාවය වෙනුවෙන් ඉදිරිපත් කර ඇති නිර්දේශ ඉටුකිරීම කෙරෙහි ද මෙම නීතිමය සංශෝධන සෘජුවම බලපානු ඇත.
