සමගි ජන බලවේගයේ මන්ත්‍රී චමින්ද විජේසිරිට වසර එකහමාරක සිර දඬුවමක්!

ඇමති ආරක්ෂක අංශයේ නිලධාරියාට වසර 10කට අත්හිටවූ සිරදඬුවමක්: නඩුවේ පළමු විත්තිකරු වූ රියදුරා මියගොස්  


රාජකාරියේ නිරතව සිටි පොලිස් නිලධාරීන් දෙදෙනෙකුට අයුතු අවහිරය සිදුකිරීම, පහරදී තුවාල සිදුකිරීම සහ මරණීය තර්ජනය එල්ල කිරීම ඇතුළු චෝදනාවලට වැරදිකරු කෙරුණු සමගි ජන බලවේගයේ බදුල්ල දිස්ත්‍රික් පාර්ලිමේන්තු මන්ත්‍රී චමින්ද විජේසිරිට වසර එකහමාරක (1 1/2) සිර දඬුවමක් බදුල්ල මහාධිකරණය මගින් නියම කර තිබේ.  

බදුල්ල මහාධිකරණ විනිසුරු ජෙයරාම් ට්‍රොට්ස්කි විසින් මෙම නඩුවේ තීන්දුව ප්‍රකාශයට පත් කළ අතර, නඩුවේ තුන්වැනි විත්තිකරු වූ ඇමති ආරක්ෂක අංශයේ (MSD) පොලිස් නිලධාරී රසික කරුණාතිලකට වසර 10කට අත්හිටවූ සිරදඬුවමක් නියම කෙරිණි.  

මෙම නඩුවේ පළමු විත්තිකරු ලෙස නම් කර සිටි මන්ත්‍රීවරයාගේ රියදුරු බන්දුල රත්නායක නමැත්තා නඩු විභාගය අතරතුරදී මියගොස් ඇති බව ද අධිකරණය හමුවේ අනාවරණය විය.  

2019 බණ්ඩාරවෙල සිදුවීම  

මෙම නඩුවට පදනම් වී ඇත්තේ 2019 වසරේ පෙබරවාරි 10 වැනිදා හෝ ඒ ආසන්න දිනක පස්වරුවේ බණ්ඩාරවෙල නගරයේ වටරවුම අසලදී සිදුවූ සිදුවීමකි. පාර්ලිමේන්තු මන්ත්‍රී චමින්ද විජේසිරි ඇතුළු පිරිස ජීප් රථ පෙළකින් ගමන් කරමින් සිටියදී, පොලිස් මත්ද්‍රව්‍ය නාශක කාර්යාංශයට අයත් පොලිස් ජීප් රථයක් මන්ත්‍රීවරයාගේ රථය ඉස්සර කර යාම මුල් කරගනිමින් දෙපිරිස අතර තදබල බහින්බස්වීමක් හටගෙන තිබිණි.  

එහිදී තමන් පසුකර ගිය පොලිස් රථයට මඟහරස් කොට අයුතු ලෙස අවහිර කරමින්, එහි සිටි පොලිස් නිලධාරීන් දෙදෙනාට මරණීය තර්ජනය කර පහරදී බරපතල තුවාල සිදු කළ බවට පැමිණිල්ල විසින් අධිකරණය හමුවේ චෝදනා ගොනු කර තිබුණි.  

දීර්ඝ කාලයක් තිස්සේ පැවැති නඩු විභාගයෙන් අනතුරුව ඉදිරිපත් වූ සාක්ෂි සලකා බැලූ මහාධිකරණය, චමින්ද විජේසිරි මන්ත්‍රීවරයා සහ ඔහුගේ රියදුරු චෝදනා 4කටත්, ඇමති ආරක්ෂක අංශයේ පොලිස් නිලධාරියා චෝදනා 3කටත් වැරදිකරුවන් බවට ඉකුත් ජූනි මාසයේදී තීන්දු කළ අතර, ඊට අදාළ දඬුවම් නියම කිරීම මෙලෙස ප්‍රකාශයට පත් කරන ලදී.

 

තීන්දුව ප්‍රකාශයට පත් කරන අවස්ථාවේ දී, සමගි ජන බලවේගයේ නායක සජිත් ප්‍රේමදාස ද අධිකරණය තුළ රැඳී සිටි බව වාර්තා වේ.