'හරක් කටා' ආරක්ෂිත බන්ධනාගාරයකට යැවීමට කෝටි 12ක අල්ලසක් ගැනීමේ සිද්ධිය: විමර්ශන ප්‍රගතිය දෙසැම්බර් 8දා කැඳවයි
සංවිධානාත්මක අපරාධකරුවෙකු සහ ප්‍රබල මත්ද්‍රව්‍ය ජාවාරම්කරුවෙකු වන නඳුන් චින්තක නොහොත් 'හරක් කටා' නැමැත්තාගෙන් අල්ලස් ලබාගැනීමේ සිද්ධියකට අදාළව අත්අඩංගුවට ගෙන රක්ෂිත බන්ධනාගාරගත කර සිටි නීතීඥ රඛිත රාජපක්ෂ, චරිත් අබේසිංහ සහ අරුණ හැන්නදිගේ යන සැකකරුවන් තිදෙනා ඇප මත මුදාහැරීමට කොළඹ ප්‍රධාන මහේස්ත්‍රාත් අධිකරණය නියෝග කර තිබේ.
ඉකුත් නඩු දිනයේදී සැකකරුවන්ගේ නීතිඥවරුන් විසින් කරන ලද ඇප ඉල්ලීම සලකා බැලූ කොළඹ ප්‍රධාන මහේස්ත්‍රාත් අසංග එස්. බෝදරගම විසින් අද (ජූලි 28) මෙම ඇප නියෝගය ප්‍රකාශයට පත් කරන ලදී.
ඇප කොන්දේසි සහ විදේශ ගමන් තහනම
නියෝගයට අනුව, එක් එක් සැකකරු රුපියල් ලක්ෂයක මුදල් ඇප සහ රුපියල් ලක්ෂ 50 බැගින් වූ ශරීර ඇප දෙකක් මත මුදාහැරීමට නියම විය. ශරීර ඇපකරුවන් සතුව ඇපයේ වටිනාකම තහවුරු කෙරෙන ආකාරයේ ස්ථිර ආදායමක් හෝ දේපළ පවතින බවට තහවුරු කරන සහතික අධිකරණය වෙත ඉදිරිපත් කළ යුතු බව ද මහේස්ත්‍රාත්වරයා අවධාරණය කළේය.
මීට අමතරව, සැකකරුවන් තිදෙනාටම විදේශ ගමන් තහනම් කෙරුණු අතර ඔවුන්ගේ විදේශ ගමන් බලපත්‍ර අධිකරණය භාරයට ගන්නා ලෙස ද නියෝග කෙරිණි. මෙම සිද්ධියට අදාළ විමර්ශනවල ප්‍රගතිය ලබන දෙසැම්බර් මස 08 වැනිදා අධිකරණයට ඉදිරිපත් කරන ලෙස අල්ලස් හෝ දූෂණ විමර්ශන කොමිෂන් සභාවට මහේස්ත්‍රාත්වරයා වැඩිදුරටත් නියෝග කර ඇත.
අල්ලස් චෝදනාවේ පසුබිම
අත්අඩංගුවට පත් සැකකරුවන් අතර හිටපු අධිකරණ අමාත්‍ය විජයදාස රාජපක්ෂගේ පුත් නීතීඥ රඛිත රාජපක්ෂ, සමගි ජන බලවේගයේ හොරණ ආසනයේ හිටපු සංවිධායක චරිත් අබේසිංහ සහ සිවිල් ගුවන්සේවා අධිකාරියේ හිටපු අධ්‍යක්ෂවරයෙකු වන වරුෂ හැන්නදිගේ අරුණ ශ්‍රී චතුරංග යන අය වෙති.
අපරාධ පරීක්ෂණ දෙපාර්තමේන්තුව භාරයේ රැඳවුම් නියෝග මත රඳවා සිටි 'හරක් කටා' නැමැත්තා ඝාතනය කිරීම වැළැක්වීම, ඔහුගේ රැඳවුම් නියෝග ඉවත් කර ගාල්ල බූස්ස අධි ආරක්ෂිත බන්ධනාගාරය හැර වෙනත් ආරක්ෂිත බන්ධනාගාරයකට යොමු කිරීම සහ විමර්ශනවලින් නිදහස් කරදීම සඳහා මෙම අල්ලස් ඉල්ලා ඇති බවට චෝදනා එල්ල වී තිබේ.
ඒ වෙනුවෙන් 2023 වසරේදී ඩුබායි රාජ්‍යයේදී 'හරක් කටා'ගේ බිරිඳ වන මධුෂිකා මධුවන්ති නැමැත්තියගෙන් මුලින් රුපියල් කෝටි 50ක අල්ලසක් ඉල්ලා, පසුව එය රුපියල් කෝටි 20 දක්වා අඩුකරමින් ඉන් අත්තිකාරම් මුදලක් ලෙස රුපියල් කෝටි 12ක් ලබාගත් බවට අල්ලස් කොමිසම අධිකරණය හමුවේ කරුණු අනාවරණය කර ඇත. අදාළ විමර්ශනවලට අනුව රඛිත රාජපක්ෂ සහ චරිත් අබේසිංහ ඉකුත් ජූනි මස 25 වැනිදා අල්ලස් කොමිසම මගින් අත්අඩංගුවට ගන්නා ලදී.
