'හරක් කටා' අල්ලස් නඩුවේ විමර්ශන ප්‍රගතිය දෙසැම්බර් 8 වැනිදා අධිකරණයට
සංවිධානාත්මක අපරාධ කල්ලි නායකයෙකු වන 'හරක් කටා' නමැත්තාගෙන් රුපියල් කෝටි ගණනක අල්ලසක් ලබාගැනීමේ සිද්ධියට අදාළව අධිකරණය මගින් ඇප නියම කෙරුණු සමගි ජන බලවේගයේ හොරණ ආසනයේ හිටපු සංවිධායක චරිත් අබේසිංහ, නියමිත වේලාවට ඇප කොන්දේසි සපුරාලීමට නොහැකි වීම හේතුවෙන් යළිත් රක්ෂිත බන්ධනාගාර ගත කර තිබේ.
අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංගුවට ගෙන රක්ෂිත බන්ධනාගාර ගත කර සිටි හිටපු අමාත්‍ය විජයදාස රාජපක්ෂ ගේ පුත් නීතීඥ රඛිත රාජපක්ෂ, චරිත් අබේසිංහ සහ සිවිල් ගුවන් සේවා අධිකාරියේ හිටපු අධ්‍යක්ෂවරයෙකු වන වරුෂහැන්නැදිගේ අරුණ ශ්‍රී චතුරංග යන සැකකරුවන් තිදෙනාට කොළඹ ප්‍රධාන මහේස්ත්‍රාත් අසංග එස්. බෝදරගම විසින් අද (ජූලි 28) දහවල් ඇප නියෝග කරන ලදී.
දෙදෙනෙකු නිදහස් - චරිත් යළි බන්ධනාගාරයට
අධිකරණ නියෝගයට අනුව එක් එක් සැකකරු සඳහා රුපියල් ලක්ෂයක මුදල් ඇපයක් සහ රුපියල් ලක්ෂ 50 බැගින් වූ ශරීර ඇප දෙකක් බැගින් නියම විය. එමෙන්ම ශරීර ඇපකරුවන් සතුව ඇපයේ වටිනාකමට සරිලන ස්ථිර ආදායමක් හෝ දේපළ පවතින බවට තහවුරු කරන සහතික ඉදිරිපත් කළ යුතු බවට ද, සැකකරුවන්ගේ විදේශ ගමන් තහනම් කරමින් විදේශ ගමන් බලපත්‍ර අධිකරණය භාරයට ගන්නා ලෙසට ද නියෝග කෙරිණි.
අධිකරණය නියම කළ ඇප කොන්දේසි විවෘත අධිකරණයේදී සපුරාලීමට නීතීඥ රඛිත රාජපක්ෂ සහ අරුණ ශ්‍රී චතුරංග යන සැකකරුවන් දෙදෙනා කටයුතු කිරීම නිසා ඔවුන් බන්ධනාගාර භාරයෙන් මුදාහැරීමට නියෝග කෙරිණි.
කෙසේ වෙතත්, සැකකාර චරිත් අබේසිංහට නියමිත වේලාවට සිය ඇප කොන්දේසි සපුරා ගැනීමට නොහැකි වීම හේතුවෙන් පස්වරු 5.30ට පමණ බන්ධනාගාර නිලධාරීන් විසින් ඔහු නැවතත් බන්ධනාගාරය වෙත රැගෙන ගොස් ඇත.
චෝදනාවේ පසුබිම
අපරාධ පරීක්ෂණ දෙපාර්තමේන්තුව භාරයේ රැඳවුම් නියෝග මත සිටි නඳුන් චින්තක නොහොත් 'හරක් කටා' නමැත්තා ඝාතනය කිරීම වැළැක්වීම, ඔහුගේ රැඳවුම් නියෝග ඉවත් කර බූස්ස අධි ආරක්ෂිත බන්ධනාගාරය හැර වෙනත් ස්ථානයකට යොමු කිරීම ඇතුළු පහසුකම් සැලසීම වෙනුවෙන් 2023 වසරේදී ඩුබායිහිදී ඔහුගේ බිරිඳගෙන් රුපියල් කෝටි 50ක අල්ලසක් ඉල්ලා, පසුව එය කෝටි 20 දක්වා අඩු කර ඉන් අත්තිකාරම් ලෙස රුපියල් කෝටි 12ක් ලබාගත් බවට මොවුන්ට එරෙහිව චෝදනා එල්ල වී තිබේ.
මෙම සිදුවීමට අදාළ විමර්ශනවල ප්‍රගතිය ලබන දෙසැම්බර් මස 08 වැනිදා අධිකරණයට ඉදිරිපත් කරන ලෙස කොළඹ ප්‍රධාන මහේස්ත්‍රාත්වරයා අල්ලස් කොමිසමට නියෝග කර ඇත.
