විශේෂ තීරණයකට එළඹීමට නීතිඥ සංගමයේ සභාපති සහ අධිකරණ අමාත්‍යවරයා අතර සාකච්ඡා
විනිසුරුවරුන්ගේ විශ්‍රාම යෑමේ වයස් සීමාව දීර්ඝ කිරීම සඳහා ආණ්ඩුව ඉදිරිපත් කර ඇති යෝජනාවට ශ්‍රී ලංකා නීතිඥ සංගමයේ (BASL) ඒකමතික විරෝධය පළවී තිබේ.
අද (29) උදෑසන පැවැත්වුණු නීතිඥ සංගමයේ විශේෂ මහා සභා රැස්වීමේදී සාමාජිකයින්ගේ සම්පූර්ණ එකඟතාවයෙන් මෙම තීරණයට එළඹි බවත්, සභාගැබට පැමිණ සිටි මෙන්ම සූම් තාක්ෂණය ඔස්සේ සම්බන්ධ වූ සියලුම නීතිඥවරුන් ඊට විරෝධය පළකළ බවත් එම සංගමය සඳහන් කරයි.
මාධ්‍ය වෙත අදහස් දක්වමින් ශ්‍රී ලංකා නීතිඥ සංගමයේ සභාපති, ජ්‍යෙෂ්ඨ නීතිඥ රජීව් අමරසූරිය ප්‍රකාශ කළේ මෙම යෝජනාව අධිකරණ පද්ධතියේ ස්වාධීනත්වයට මෙන්ම සමස්ත අධිකරණ ක්‍රියාවලියේ පැවැත්මට එල්ල වන සෘජු බලපෑමක් බවයි. අධිකරණ ක්ෂේත්‍රයේ ප්‍රමුඛයින් මෙන්ම විනිසුරුවරුන් පවා මෙම පියවර සම්බන්ධයෙන් ප්‍රසාදයක් නොදක්වන බවත්, මෙවැනි අදූරදර්ශී තීරණ මගින් මුළු මහත් අධිකරණ පද්ධතියම අපහසුතාවයට පත්වන බවත් ඔහු පැවසිය.
මෙම අර්බුදකාරී යෝජනාව සම්බන්ධයෙන් පසුගිය මාස දෙක පුරාම නීතිඥ සංගමය දිගින් දිගටම විරෝධය පළකර තිබුණද, ඒ පිළිබඳ සාකච්ඡා කිරීමට රජය මෙතෙක් නිසි අවස්ථාවක් ලබාදී නොමැති බවද මෙහිදී ප්‍රකාශ විය. කෙසේ වෙතත්, නීතිඥ ප්‍රජාවගේ සහ විධායකයේ නියෝජිතයින් අතර ඉදිරි පියවර තීරණය කිරීම සඳහා අද පස්වරුවේ අධිකරණ අමාත්‍යවරයා හමුවී විශේෂ සාකච්ඡාවක් පැවැත්වීමට නියමිතව තිබේ.
මෙම අර්බුදය සම්බන්ධයෙන් නීතිඥ දයාසිරි ජයසේකර ඇතුළු තවත් ජ්‍යෙෂ්ඨ නීතිඥවරුන් කිහිපදෙනෙකුම අවධාරණය කළේ, රජය මෙම තීරණය නැවත සමාලෝචනය කර ඉවත් කර නොගන්නේ නම්, ජනමත විචාරණයකට යාම හෝ අධිකරණයේ ස්වාධීනත්වය සුරැකීම වෙනුවෙන් ගතහැකි සියලුම අභියෝගාත්මක නෛතික හා වෘත්තීය ක්‍රියාමාර්ග ගැනීමට ඉදිරියේදී කටයුතු කරන බවයි.
