තීන්දුවට එරෙහිව අභියාචනා කරන බවට සමගි ජන බලවේගයෙන් ප්‍රකාශයක්
2019 වසරේදී බණ්ඩාරවෙල නගරයේදී පොලිස් නිලධාරීන්ට අයුතු ලෙස අවහිර කිරීම, තර්ජනය කිරීම සහ පහරදී තුවාල සිදුකිරීම ඇතුළු චෝදනා සම්බන්ධයෙන් වරදකරු වූ සමගි ජන බලවේගයේ බදුල්ල දිස්ත්‍රික් පාර්ලිමේන්තු මන්ත්‍රී චමින්ද විජේසිරි ට බදුල්ල මහාධිකරණය මගින් වසර එකහමාරක (මාස 18) සිරදඬුවමක් සහ රුපියල් ලක්ෂයක දඩයක් නියම කළේය.
මහාධිකරණ විනිසුරු ජෙයරාම් ට්‍රොට්ස්කි විසින් මෙම නඩුවේ තීන්දුව ප්‍රකාශයට පත් කරමින්, වින්දිතයන් සඳහා රුපියල් 50,000 බැගින් වූ වන්දි මුදලක් ගෙවන ලෙසද නියෝග කළේය. 2019 පෙබරවාරි 10 වන දින බණ්ඩාරවෙල නගරයේ වටරවුම අසලදී මන්ත්‍රීවරයා ගමන් ගත් ජීප් රථය, පොලිස් ජීප් රථයක් විසින් ඉස්සර කර යෑම මුල් කරගනිමින් ඇතිවූ බහින්බස්වීමක් දුරදිග යෑමෙන් මෙම සිදුවීම සිදුව ඇති බව නඩු විභාගයේදී අනාවරණය විය.
මෙම නඩුවේ තෙවන විත්තිකරු වූ, මන්ත්‍රීවරයාගේ ආරක්ෂක නිලධාරියා ලෙස කටයුතු කළ ඇමැති ආරක්ෂක අංශයේ පොලිස් සැරයන්වරයාට වසර දහයකට අත්හිටුවූ සිරදඬුවමක් නියම වූ අතර, පළමු විත්තිකරු ලෙස සිටි මන්ත්‍රීවරයාගේ රියැදුරු නඩු විභාගය අතරතුරදී මියගොස් තිබිණි. තීන්දුව ප්‍රකාශයට පත්කරමින් විනිසුරුවරයා සඳහන් කළේ මහජන නියෝජිතයන් සහ ආරක්ෂක අංශ සාමාජිකයන් සමාජයට ආදර්ශමත්ව කටයුතු කළ යුතු බවත්, මෙවැනි ක්‍රියාවන් අනුමත කළ නොහැකි බවත්ය.
ආණ්ඩුක්‍රම ව්‍යවස්ථාව සහ මන්ත්‍රී ධූරයේ නීතිමය තත්ත්වය
ආණ්ඩුක්‍රම ව්‍යවස්ථාවේ 89(ඈ) වගන්තියට අනුව, අවුරුදු දෙකකට නොඅඩු කාලයක් සිරගත කළ හැකි වරදකට යම් තැනැත්තෙකු මාස හයකට නොඅඩු කාලයක සිරදඬුවමකට යටත් වුවහොත්, ඔහුට ඡන්දය ප්‍රකාශ කිරීමට මෙන්ම පාර්ලිමේන්තු මන්ත්‍රී ධූරයක් දැරීමට හෝ මැතිවරණයකට ඉදිරිපත්වීමට හිමිකම් අහිමි වෙයි. ඒ අනුව සාමාන්‍ය තත්ත්වය යටතේ මෙම දඬුවම හමුවේ මන්ත්‍රී ධූරය අහෝසි වී යෑමේ අවදානමක් පවතී.
කෙසේ වෙතත්, අදාළ තීන්දුවට එරෙහිව මන්ත්‍රීවරයා විසින් අභියාචනාධිකරණය වෙත අභියාචනයක් ඉදිරිපත් කරනු ලබන අවස්ථාවේ සිට, අභියාචන ක්‍රියාවලිය අවසන් වන තෙක් මන්ත්‍රී ධූරය අහෝසි වීමක් සිදු නොවන බව නීති ක්ෂේත්‍රයේ ප්‍රවීණයෝ පෙන්වා දෙති. මීට අමතරව ජනාධිපති පොදු සමාවක් හිමිවුවහොත් ද අදාළ නුසුදුසුකම් ඉවත් වන බව ආණ්ඩුක්‍රම ව්‍යවස්ථාපිත ප්‍රතිපාදනවල දැක්වේ.
දේශපාලන ප්‍රතිචාර
තීන්දුව ප්‍රකාශයට පත් කළ අවස්ථාවේදී විපක්ෂ නායක සජිත් ප්‍රේමදාස ඇතුළු සමගි ජන බලවේගයේ පාර්ලිමේන්තු මන්ත්‍රීවරු පිරිසක්ද බදුල්ල මහාධිකරණ පරිශ්‍රය වෙත පැමිණ සිටියහ.
අධිකරණ තීන්දුවෙන් අනතුරුව මාධ්‍ය වෙත අදහස් දැක්වූ විපක්ෂ නායක සජිත් ප්‍රේමදාස සඳහන් කළේ අධිකරණ පද්ධතිය කෙරෙහි ගෞරවය පවත්වා ගනිමින්, චමින්ද විජේසිරි මන්ත්‍රීවරයා වෙනුවෙන් ඉදිරි අභියාචනා ක්‍රියාවලිය හරහා නීතිමය වශයෙන් පෙනී සිටින බවයි. ඉහළ අධිකරණ හමුවේ සිදුවන නීතිමය ක්‍රියාවලිය තුළින් අදාළ මන්ත්‍රීවරයාට සාධාරණය ඉෂ්ට වනු ඇති බවට තමන් විශ්වාස කරන බවද විපක්ෂ නායකවරයා වැඩිදුරටත් පැවසීය.
