ඒකාධිපති වියරුව පරාජය කරන්න ජන බලවේගයක් සූදානම්
ආඥාදායකත්වයට පාරකපන ව්‍යවස්ථා සංශෝධනය
ව්‍යවස්ථා සංශෝධනයක් හරහා විධායක ජනාධිපති ක්‍රමය අහෝසි කිරීමට ජනවරමක් ලබාගත් වත්මන් රජය, එය පසෙකලා රට තුළ ඒකාධිපතීත්වයක් සහ තනි පක්ෂ පාලනයක් ස්ථාපිත කිරීමට කටයුතු කරමින් සිටින බව විපක්ෂ නායක සජිත් ප්‍රේමදාස පවසයි. විනිසුරුවන්ගේ විශ්‍රාම වයස වෙනස් කිරීම ඇතුළු පියවර හරහා අධිකරණය විධායකයේ අතකොළුවක් බවට පත්කර ගැනීමට රජය උත්සාහ කරන බවට හෙතෙම චෝදනා කරයි.
විශේෂ ප්‍රකාශයක් සිදුකරමින් විපක්ෂ නායකවරයා පවසන්නේ, ප්‍රජාතන්ත්‍රවාදයේ ප්‍රධාන කුළුණක් වන අධිකරණයේ ස්වාධීනත්වය විනාශ කිරීම නිර්ලජ්ජිත ක්‍රියාවක් බවයි. ව්‍යවස්ථාදායකය, විධායකය සහ අධිකරණය අතර පවතින බලය බෙදීයාම සහ සංවරණ හා තුලනයන් (Checks and Balances) පිළිබඳව අවබෝධයක් නැත්නම් මොන්ටෙස්ක්‍යුගේ 'The Spirit of Law' කෘතිය අධ්‍යයනය කරන ලෙසද ඔහු ජනාධිපතිවරයාගෙන් සහ අධිකරණ අමාත්‍යවරයාගෙන් ඉල්ලා සිටියේය.
ගෞරවයට හානියක් සහ ඉන්දීය තරුණ නැගිටීමේ ආදර්ශය
වත්මන් රජයේ ක්‍රියාකලාපය හේතුවෙන් ජනතාව තුළ අධිකරණය සහ විනිසුරුවන් කෙරෙහි පවතින විශ්වාසනීයත්වයට හා කීර්තිනාමයට දැඩි හානියක් සිදුවන බව විපක්ෂ නායකවරයා අවධාරණය කළේය. ලෝකයේ බොහෝ රටවල බලයේ සිටින දේශපාලන අධිකාරීන් අධිකරණයට හා ව්‍යවස්ථාදායකයට ඇඟිලි ගැසීමට උත්සාහ කළ අවස්ථාවලදී සිදුවූ අත්දැකීම් අමතක නොකළ යුතු බව ද ඔහු කියා සිටියේය.
මෑතකදී ඉන්දියාවේ රැකියා විරහිත තරුණයින්ට සිදුවූ අපහාස හමුවේ මිලියන සංඛ්‍යාත තරුණ පිරිසක් වීදි බැසීමට කටයුතු කළ ආකාරය සිහිපත් කළ සජිත් ප්‍රේමදාස , එමගින් අධ්‍යාපන අමාත්‍යවරයාට ධුරයෙන් ඉල්ලා අස්වීමට පවා සිදුවූ බව සඳහන් කළේය. එලෙසම මෙරට අධිකරණයේ ස්වාධීනත්වය වෙනුවෙන්ද මෙරට තරුණයින්, සිවිල් සමාජය සහ ජනතාව මහා ජන බලවේගයක් ලෙස එකතු වී මෙම ඒකාධිපති සංශෝධන පරාජය කිරීමට සූදානමින් සිටින බව හෙතෙම කියා සිටියේය.
නිතියේ ආධිපත්‍යය සුරැකීමට විපක්ෂයේ කැපවීම
කාර්යක්ෂම යුක්තිය පසිඳලීමේ නාමයෙන් රජය ගෙන ඒමට සූදානම් වන ඒකාධිපති ක්‍රියාමාර්ග වහා නතර කළ යුතු බවත්, නිදහස් මාධ්‍ය, සිවිල් ප්‍රජාව සහ නීතියේ ආධිපත්‍යය ආරක්ෂා කරමින් ප්‍රජාතන්ත්‍රවාදය පණටත් වඩා සුරක්ෂිත කළ යුතු බවත් විපක්ෂ නායකවරයා වැඩිදුරටත් සඳහන් කළේය.
රජය මැතිවරණ සමයේ ලබාදුන් 'පොහොසත් රටක් ලස්සන ජීවිතයක්' සමාජ ගිවිසුම අමතක නොකළ යුතු බව පෙන්වා දුන් ඔහු, වගකිවයුතු විපක්ෂයක් ලෙස සමගි ජන බලවේගය අධිකරණයේ ස්වාධීනත්වය සහ ප්‍රජාතන්ත්‍රවාදය සුරැකීම වෙනුවෙන් ඕනෑම කැපකිරීමක් කිරීමට සූදානම් බවද අවධාරණය කළේය.
