*විපක්ෂයේ නැවත එකතු වීම ආණ්ඩුවට තර්ජනයක් නොවන බවටත්, එහි යටි අරමුණ නඩුවලින් බේරීම බවටත් චෝදනාවක්
විනිසුරු විශ්‍රාම වයස සහ අධිකරණ ක්ෂේත්‍රයේ ප්‍රතිසංස්කරණ
ශ්‍රේෂ්ඨාධිකරණය සහ අභියාචනාධිකරණය ඇතුළු අධිකරණ පද්ධතියේ විනිශ්චයකාරවරුන්ගේ විශ්‍රාම යවන වයස් සීමාව දීර්ඝ කිරීමට රජය ගෙන ඇති තීරණය හදිසියේ ගත් එකක් නොවන බවත්, එය සමස්ත අධිකරණ පද්ධතිය විධිමත් කිරීම වෙනුවෙන් ක්‍රියාත්මක කෙරෙන පුළුල් වැඩපිළිවෙලෙහි එක් පියවරක් පමණක් බවත් අමාත්‍ය සුසිල් රණසිංහ ප්‍රකාශ කරයි.
'නෙත් නිවුස්' යූ ටියුබ් නාලිකාව සංවිධානය කළ 'රතු කට්ට' දේශපාලන සංවාදයට එක්වෙමින් අමාත්‍යවරයා මේ බව සඳහන් කළේය.
නීතියේ සහ විධානයේ ආධිපත්‍යය තහවුරු කිරීම මෙන්ම වංචා දූෂණවලට එරෙහිව නීතිය ක්‍රියාත්මක කිරීම වත්මන් රජයට ලැබුණු ප්‍රධාන ජනවරම බව පෙන්වා දුන් අමාත්‍යවරයා, අධිකරණවල නඩු ගොඩගැසීම සහ අකාර්යක්ෂමතාව මගහැරවීම සඳහා පනත් ගණනාවක් සම්මත කරමින් පියවර ගෙන ඇති බව පැවසීය. රස පරීක්ෂක දෙපාර්තමේන්තුවට නව නිලධාරීන් බඳවා ගැනීම, නව උපකරණ ලබාදීම, පොලිස් මෙහෙයුම් ශක්තිමත් කිරීම, අධිකරණ පහසුකම් ප්‍රවර්ධනය කිරීම සහ විනිසුරුවරුන් සංඛ්‍යාව ඉහළ නැංවීම වැනි ක්‍රියාමාර්ග රැසක් අතරට මෙම විශ්‍රාම වයස් සීමාව ඉහළ නැංවීමේ යෝජනාවද ඇතුළත් වන බව හේ පැහැදිලි කළේය.
යෝජිත වෙනස්කම් හමුවේ මතුවන විවේචන
ආණ්ඩුව විසින් ගනු ලබන මෙවැනි ප්‍රතිපත්තිමය තීරණවලදී විවිධ පාර්ශ්වයන්ගෙන් විවේචන සහ විරුද්ධත්වයන් මතුවීම සාමාන්‍ය තත්ත්වයක් බව අමාත්‍ය සුසිල් රණසිංහ වැඩිදුරටත් සඳහන් කළේය. රටක ජනගහනය මිලියන 20ක් වන විට විවිධ මතවාද දරන කණ්ඩායම් සිටින බවත්, යම් යම් තීරණවලට විරුද්ධ වන පිරිස් මෙන්ම ඊට ආශීර්වාද කරන පිරිස්ද සමාජයේ සිටින බවත් අමාත්‍යවරයා පෙන්වා දුන්නේය.
කෘෂිකාර්මික හෝ ජල සම්පාදන වැනි ඕනෑම ක්ෂේත්‍රයක තීන්දු ගැනීමේදී විවිධ පදනම් මත විවේචන එල්ල වන අතර, අධිකරණ ක්ෂේත්‍රයේ යෝජිත වෙනස්කම් සම්බන්ධයෙන්ද විවිධ අදහස් පළවීම පුදුමයට කරුණක් නොවන බව අමාත්‍යවරයා එහිදී ප්‍රකාශ කළේය.
විපක්ෂයේ එකමුතුව සහ නෛතික ක්‍රියාමාර්ග
පසුගිය දිනවල විපක්ෂයේ ප්‍රධාන දේශපාලන නායකයන් සහ කණ්ඩායම් නැවත එකට එකතු වීම සම්බන්ධයෙන් අදහස් දැක්වූ අමාත්‍යවරයා, එය කිසිසේත්ම ආණ්ඩුවට තර්ජනයක් නොවන බව පැවසීය. අතීතයේදී එකිනෙකාට දැඩි ලෙස චෝදනා කරගත් දේශපාලන පක්ෂ සහ චරිත මෙලෙස එක්වීමේ පොදු සාධකය වන්නේ, පසුගිය පාලන සමයන්හි සිදුවූ බවට කියැවෙන රාජ්‍ය බලය හා මහජන ධනය අවභාවිත කිරීම් සම්බන්ධයෙන් දැනට සිදුවන පරීක්ෂණ සහ නෛතික ක්‍රියාමාර්ගවලින් බේරීම බව අමාත්‍යවරයා චෝදනා කළේය.
තමන් පක්ෂයක් ලෙස හෝ ඇමතිවරුන් ලෙස පුද්ගලයන්ට එරෙහිව පෞද්ගලිකව ක්‍රියාමාර්ග නොගන්නා බවත්, ස්වාධීන කර ඇති නීතිය පසිඳලන ආයතනවලට සහ පරීක්ෂණ යාන්ත්‍රණයට බාධාවකින් තොරව ස්වාධීනව කටයුතු කිරීමට ඉඩකඩ සලසා දී ඇති බවත් අමාත්‍යවරයා වැඩිදුරටත් අවධාරණය කළේය.
අමාත්‍ය සුසිල් රණසිංහ සහභාගී වූ නෙත් නිවුස් රතු කට්ට විශේෂාංගයේ සම්පූර්ණ විඩියෝව මතු පළවේ.
