ප්‍රමුඛ ව්‍යවස්ථා ප්‍රතිසංස්කරණ පසෙකලා අවස්ථානුකූල සංශෝධන ගෙන ඒම සදාචාරාත්මක නීත්‍යානුකූලභාවයෙන් තොර බවට චෝදනා
යෝජිත ව්‍යවස්ථා සංශෝධනය සහ ලංකා සභාවේ ස්ථාවරය
අභියාචනාධිකරණ විනිසුරුවරුන්ගේ විශ්‍රාම වයස ඉහළ නැංවීම සඳහා ආණ්ඩුක්‍රම ව්‍යවස්ථාව සංශෝධනය කිරීමට අමාත්‍ය මණ්ඩලය ගෙන ඇති තීරණය පිළිබඳව සිය දැඩි කනස්සල්ල සහ අපේක්ෂාභංගත්වය පළ කරමින් ශ්‍රී ලංකා ඇංග්ලිකන් සභාව (Church of Ceylon) විශේෂ නිවේදනයක් නිකුත් කර තිබේ. කොළඹ රදගුරු දුෂාන්ත රුද්‍රිගු හිමිපාණන් ඇතුළු නායකත්වයේ අත්සනින් නිකුත් කර ඇති මෙම නිවේදනය මගින් යෝජිත ව්‍යවස්ථා සංශෝධනය වහාම ඉල්ලා අස්කර ගන්නා ලෙස ජනාධිපතිවරයාගෙන් සහ අමාත්‍ය මණ්ඩලයෙන් ඉල්ලා සිටියි.
ශ්‍රී ලංකා නීතිඥ සංගමය (BASL), නීති ප්‍රජාව සහ සිවිල් සමාජ සංවිධාන විසින් මෙම සංශෝධනය මගින් නීතියේ ආධිපත්‍යයට සහ අධිකරණයේ ස්වාධීනත්වයට එල්ල විය හැකි බරපතළ තර්ජන පෙන්වා දී තිබියදීත්, රජය එම කරුණු කෙරෙහි අවධානය යොමු නොකිරීම කණගාටුදායක බව ලංකා සභාව පෙන්වා දෙයි.
නඩු ප්‍රමාදය සහ සැබෑ අරමුණ පිළිබඳ සැකය
ගොඩගැසී ඇති නඩු කඩිනමින් විසඳීමේ අරමුණින් මෙම සංශෝධනය ගෙන එන බවට රජය ඉදිරිපත් කරන සාධාරණීකරණය ලංකා සභාව විසින් තරයේ ප්‍රතික්ෂේප කරනු ලබයි. අභියාචනාධිකරණවල දැනටමත් පවතින පුරප්පාඩු රැසක් කිසිදු තාර්කික හෝ ප්‍රතිපත්තිමය හේතුවකින් තොරව පූර්ණය නොකර තබා ඇති පසුබිමක, විශ්‍රාම වයස දීර්ඝ කිරීමට උත්සාහ කිරීම මගින් මෙහි සැබෑ අරමුණ පිළිබඳව සාධාරණ සැකයක් මතුවන බව නිවේදනයේ සඳහන් වේ.
විපක්ෂයේ සිටින විට ස්වාධීන ආයතනවල ස්වාධීනත්වය වෙනුවෙන් පෙනී සිටින දේශපාලනඥයන්, බලයට පත්වූ පසු විධායකයේ පහසුව සහ ස්වකීය දේශපාලන අභිමතාර්ථයන් වෙනුවෙන් කටයුතු කිරීමේ අවස්ථාපිත දේශපාලන රටාව හේතුවෙන් මහජනතාව දැඩි ලෙස කලකිරීමට පත්ව සිටින බවද ලංකා සභාව අවධාරණය කරයි.
ව්‍යවස්ථාපිත නීත්‍යානුකූලභාවය සහ රාජ්‍ය ආයතනවල වගකීම
විධායක ජනාධිපති ක්‍රමය අහෝසි කිරීම, අනුපාතික සහ වගවීම සහිත මැතිවරණ ක්‍රමයක් හඳුනාගැනීම, ස්වාධීන ආයතන ශක්තිමත් කිරීම සහ සුළුතර ජනකොටස්වල ගැටලුවලට විසඳුම් දීම වැනි පුළුල් ආණ්ඩුක්‍රම ව්‍යවස්ථා ප්‍රතිසංස්කරණ ගෙන එන බවට පොරොන්දු වී බලයට පත් වූ ජාතික ජන බලවේග (NPP) රජය, මහජන අදහස් විමසීම් සහිත එකී ප්‍රමුඛ කාර්යභාරය පසෙකලා ඇති බවටද ලංකා සභාව චෝදනා කරයි. මෑත කාලීන මැතිවරණ වේදිකාවලදී හෝ ව්‍යවස්ථා සංවාදවලදී සාකච්ඡා නොවූ මෙවැනි හදිසි, තාවකාලික සහ පුද්ගලානුබද්ධ සංශෝධනයක් ගෙන ඒම සදාචාරාත්මක මෙන්ම ව්‍යවස්ථාපිත නීත්‍යානුකූලභාවයකින් තොර බව එහි දැක්වේ.
මේ නිසා, විධායකය පාලනය කිරීම සහ පාරදෘශ්‍යභාවය සුරැකීම තම මූලික යුතුකම බව ව්‍යවස්ථාදායකය සිහි තබා ගත යුතු බවත්, මෙවැනි අදූරදර්ශී පියවරයන්ගෙන් අධිකරණයේ ස්වාධීනත්වයට සහ කීර්තිනාමයට සිදුවන හානිය පිළිබඳව අධිකරණයේ ජ්‍යෙෂ්ඨ නායකත්වය ස්වයං විමර්ශනයක යෙදිය යුතු බවත් ලංකා සභාව රජයේ ප්‍රධාන ආයතන ත්‍රිත්වයෙන්ම ඉල්ලා සිටියි.
