ආණ්ඩුක්‍රම ව්‍යවස්ථාවෙන් පවරා ඇති ශාසනික වගකීම් ඉටුකරන ලෙස රාජ්‍ය සහ ගිහි නායකත්වයට අවධාරණය කරයි
රට, ජාතිය සහ සම්බුද්ධ ශාසනය හමුවේ මතුව ඇති නූතන අභියෝගයන්ට මුහුණදීම සහ සංඝ සාමග්ගිය ගොඩනැඟීමේ අරමුණින් ශාසනාරක්ෂක සංඝ සභාව විසින් මෙහෙයවනු ලබන "මහා සඟ සමුළුව" ජූලි 27 වන සඳුදා පස්වරු 2.30 ට කොළඹ ශ්‍රී ලංකා ප්‍රදර්ශන හා සම්මේලන මධ්‍යස්ථානයේදී (SLECC) පැවැත්වීමට කටයුතු යොදා තිබේ.
"සුඛා සංඝස්ස සාමග්ගි" (සංඝයාගේ එකමුතුව සැපතකි) යන තේමාව පෙරදැරි කරගනිමින් සංවිධානය කර ඇති මෙම විශේෂ සමුළුව සඳහා දිවයින පුරා වැඩවෙසෙන මහා සංඝරත්නය සහභාගී වීමට නියමිත බව ශාසනාරක්ෂක සංඝ සභාව සඳහන් කරයි.
ශාසනාරක්ෂාව සහ ව්‍යවස්ථාපිත වගකීම්
ශ්‍රී ලාංකීය මහාවිහාර වංශික ථේරවාද භික්ෂූන් වහන්සේ සහිත සම්බුද්ධ ශාසනය ආරක්ෂා කොට පෝෂණය කිරීම සඳහා ආණ්ඩුක්‍රම ව්‍යවස්ථාවේ 9 වන වගන්තිය මඟින් රජයට පවරා ඇති වගකීම් සක්‍රීයව පවත්වාගෙන යන ලෙස බලධාරීන්ට අවධාරණය කිරීම මෙම සමුළුවේ ප්‍රධාන අරමුණක් වී තිබේ.
එමෙන්ම, ශාසනාරක්ෂාව පිළිබඳ රාජ්‍ය හා සාම්ප්‍රදායික ගිහි ප්‍රජා නායකත්වයේ වගකීම සිහිපත් කිරීමත්, භික්ෂු සමාජයේ ස්වයං වගවීම තහවුරු කිරීමත් මෙහිදී අපේක්ෂා කෙරේ.
සමාජ මාධ්‍ය ක්‍රියාකාරකම්, අන්තගාමී බලවේග, ඇතැම් රාජ්‍ය නොවන සංවිධාන සහ ඩයස්පෝරා මැදිහත්වීම් හරහා බෞද්ධ සංස්කෘතියට සහ මහා සංඝරත්නයට එල්ල වන විවේචන හමුවේ භික්ෂු සංඝයා වහන්සේලා සංවිධානාත්මකව කටයුතු කිරීමේ අවශ්‍යතාව මතුව ඇති බව ශාසනාරක්ෂක සංඝ සභාව පෙන්වා දෙයි.
භික්ෂු සමාජය හමුවේ ඇති අභ්‍යන්තර අභියෝග
වත්මන් ශාසනික අර්බුදයට බාහිර බලපෑම් මෙන්ම අභ්‍යන්තරික සාධක ද හේතු වී ඇති බව ශාසනාරක්ෂක සංඝ සභාව පිළිගනියි.
ඒ අනුව, සිංහල බෞද්ධ ජනගහනය ප්‍රමාණාත්මකව හා ගුණාත්මකව හීනවීම, සසුන්ගත වීම සඳහා දෙමාපියන් තුළ පවතින උනන්දුව අඩුවීම, ගම සහ පන්සල අතර පවතින සබඳතාව දුරස් වීම, භික්ෂු අධ්‍යාපනය යාවත්කාලීන නොවීම සහ භික්ෂු ආයතනික කළමනාකරණයේ පවතින දුර්වලතා පිළිබඳව ද මෙහිදී විශේෂ අවධානය යොමුකිරීමට නියමිතය.
දේශපාලනික නොවන මහසඟ හමුවක්
මෙම මහා සඟ සමුළුව කිසිසේත්ම ආණ්ඩු විරෝධී හෝ යම් පුද්ගල, ආයතනික හෝ දේශපාලන කණ්ඩායම් බලගැන්වීමේ අරමුණින් සංවිධානය කරන ලද්දක් නොවන බව ශාසනාරක්ෂක සංඝ සභාව අවධාරණය කරයි.
පූජ්‍ය උලපනේ සුමංගල හිමි, පූජ්‍ය ගලගොඩඅත්තේ ඤාණසාර හිමි සහ පූජ්‍ය අක්මීමන දයාරතන හිමි යන උන්වහන්සේලා විසින් මෙම වැඩසටහනේ සම්බන්ධීකරණ කටයුතු මෙහෙයවනු ලබති.
