කොරියානු සමාගමකට ව්‍යාපෘතිය පවරා රජයට රුපියල් කෝටි දෙකකට අධික පාඩුවක් සිදුකිරීමේ චෝදනාවේ විමර්ශන අවසන්
කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට පැවරීම මගින් රජයට රුපියල් කෝටි දෙකකට අධික පාඩුවක් සිදුකළේ යැයි කියන සිද්ධියට අදාළව, හිටපු ධීවර අමාත්‍ය රාජිත සේනාරත්න ට එරෙහිව ජූලි 31 වන දින අධිචෝදනා ගොනුකරන බව අල්ලස් හෝ දූෂණ චෝදනා විමර්ශන කොමිෂන් සභාව අධිකරණයට දැනුම් දුන්නේය.
මෙම නඩුව කොළඹ ප්‍රධාන මහේස්ත්‍රාත් අසංග එස්. බෝදරගම හමුවේ අද (ජූලි 28) කැඳවූ අවස්ථාවේදී අල්ලස් කොමිසම වෙනුවෙන් පෙනී සිටි සහකාර නීති අධ්‍යක්ෂිකා සුලෝචනා හෙට්ටිආරච්චි මෙම දැනුම්දීම සිදුකළාය.
පළමු සැකකරු නිදහස් - දෙවැන්නාට අධිචෝදනා
නඩුවේ පළමු සැකකරු වන උපාලි ලියනගේ නමැත්තාට එරෙහිව මෙදින චෝදනා ගොනු නොකරන බව අධිකරණය හමුවේ කරුණු දක්වමින් පැවසූ සහකාර නීති අධ්‍යක්ෂිකාව, ඒ අනුව ඔහු අදාළ නඩුවෙන් නිදහස් කරන ලෙස ඉල්ලා සිටියාය.
ඉදිරිපත් වූ කරුණු සලකා බලමින් ප්‍රධාන මහෙස්ත්‍රාත්වරයා නියෝග කළේ සිද්ධියේ පළමු සැකකරු නඩුවෙන් නිදහස් කරන ලෙසත්, දෙවන සැකකාර හිටපු අමාත්‍ය රාජිත සේනාරත්න ට එරෙහිව අධිචෝදනා ගොනුකර ඒ පිළිබඳ අධිකරණයට වාර්තා කරන ලෙසත්ය.
විමර්ශන අවසන් - මහාධිකරණයේ නඩුවට පියවර
සිද්ධිය සම්බන්ධයෙන් වැඩිදුරටත් අධිකරණයට කරුණු දැක්වූ අල්ලස් කොමිසම සඳහන් කළේ, අදාළ සිද්ධියට සම්බන්ධයෙන් සිදුකළ විමර්ශන කටයුතු මේ වන විට සම්පූර්ණයෙන්ම අවසන් කර ඇති බැවින් සැකකරුට එරෙහිව මහාධිකරණයේ අධිචෝදනා ගොනු කිරීමට නීතිමය පියවර ගනිමින් සිටින බවයි.
සංස්ථාවට සහ රජයට පාඩු සිදුකිරීමේ චෝදනා යටතේ අත්අඩංගුවට ගෙන පසුව ඇප මත මුදාහැර සිටින සැකකරුවන් දෙදෙනාම අද දින අධිකරණයේ පෙනී සිටියහ.
කිරින්ද ධීවර වරායේ වැලි කැණීමේ ව්‍යාපෘතියක් කොරියානු සමාගමකට පැවරීම හරහා රජයට රුපියල් කෝටි දෙකකට අධික මුදලක් පාඩු සිදුකළ බවට එල්ල වී ඇති චෝදනාවට අදාළ මෙම නඩුකරය නැවත 2026 දෙසැම්බර් මස 04 වන දින කැඳවීමට නියමිතය.
