බන්ධනාගාර නිලධාරීන්ගේ මැදිහත්වීම සහ නීතියේ ප්‍රමාදයන් පිළිබඳව නීතිඥ පාර්ශ්වයන්ගෙන් ප්‍රබල චෝදනා
පසුගිය ජූලි 05 සහ 06 යන දිනයන්හිදී මීගමුව බන්ධනාගාරය තුළ හටගත් දැවැන්ත ගැටුමෙන් බන්ධනාගාර නිලධාරීන් සහ රැඳවියන් ජීවිතක්ෂයට පත්වීම, තුවාල ලැබීම සහ බන්ධනාගාර දේපළවලට බරපතල හානි සිදුකිරීමේ සිද්ධියට අදාළව රැඳවියන් සිව්දෙනෙකු ප්‍රධාන සැකකරුවන් ලෙස අපරාධ පරීක්ෂණ දෙපාර්තමේන්තුව (CID) මගින් අධිකරණය හමුවේ නම් කර තිබේ.
අද (ජූලි 27) මෙම නඩුකරය මීගමුව ප්‍රධාන මහේස්ත්‍රාත් ශිලනි පෙරේරා හමුවේ නැවත කැඳවූ අවස්ථාවේදී අපරාධ පරීක්ෂණ දෙපාර්තමේන්තුව විසින් මෙම දැනුම්දීම සිදුකරන ලදී.
ඒ අනුව සුපුන් මධුසංඛ හෙවත් "හීනටියන සුපුන්", අෂාන් ප්‍රනාන්දු හෙවත් "කළු මල්ලි", සමීර සම්පත් හෙවත් "බබා" සහ ෂේන් ඩිලාන් සිල්වා යන රැඳවියන් සිව්දෙනා සැකකරුවන් ලෙස නම් කර ඇති අතර, අධිකරණ නිල මැදිරියේදී පැවැති හඳුනාගැනීමේ පෙරෙට්ටුවෙන් අනතුරුව අදාළ සැකකරුවන් අගෝස්තු මස 07 වනදා දක්වා රක්ෂිත බන්ධනාගාරගත කිරීමට මහේස්ත්‍රාත්වරිය නියෝග කළාය.
විමර්ශන ප්‍රගතිය සහ රස පරීක්ෂක වාර්තා
සිද්ධිය සම්බන්ධයෙන් වැඩිදුර වාර්තාවක් ඉදිරිපත් කළ අපරාධ පරීක්ෂණ දෙපාර්තමේන්තුව, සහකාර පොලිස් අධිකාරීවරුන් සිව්දෙනෙකුගේ අධීක්ෂණය යටතේ නිලධාරී කණ්ඩායම් කිහිපයක් ඔස්සේ පරීක්ෂණ පවත්වන බව දැනුම් දුන්නේය. මෙතෙක් සිදුකළ විමර්ශනවලදී බන්ධනාගාර නිලධාරීන් 260 දෙනෙකු, රැඳවියන් 849 දෙනෙකු, විශේෂ කාර්ය බලකායේ නිලධාරීන් 205 දෙනෙකු ඇතුළුව පුද්ගලයින් 1,395 දෙනෙකුගෙන් ප්‍රකාශ සටහන් කරගෙන ඇති බව අධිකරණයට ප්‍රකාශ විය.
එමෙන්ම සිද්ධිය වූ දින විශේෂ කාර්ය බලකාය භාවිත කළ ගිනිඅවි 301ක් සහ බන්ධනාගාර නිලධාරීන් සතුව තිබූ ගිනිඅවි 70ක් ඇතුළු නඩු භාණ්ඩ රැසක් විද්‍යාත්මක පරීක්ෂණ සඳහා රජයේ රස පරීක්ෂකවරයා වෙත යොමුකර ඇති අතර, බන්ධනාගාරයේ සවිකර තිබූ හානියට පත් DVR යන්ත්‍ර විශේෂ විමර්ශනයක් උදෙසා මොරටුව විශ්වවිද්‍යාලයේ පරිගණක වෝහාරික රසායනාගාරයට යවා තිබේ.
නීතිඥ පාර්ශ්වයන්ගේ සහ විපක්ෂයේ කරුණු දැක්වීම්
මියගිය රැඳවියන්ගේ සහ ජන අරගලයේ පුරවැසියෝ සංවිධානය වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න අධිකරණය හමුවේ කරුණු දක්වමින් කියා සිටියේ, බන්ධනාගාරය තුළ සිදුව ඇත්තේ අතිශය බරපතල සමූහ ඝාතනයක් බවයි. ජූලි 05 වනදා හටගත් මූලික ගැටුම පාලනය කර තිබූ පසුබිමක, පසුදින බන්ධනාගාර මූලස්ථානයෙන් පැමිණි නිලධාරීන් පිරිසක් අමානුෂික ලෙස රැඳවියන්ට පහරදීම නිසා මෙම තත්ත්වය උග්‍ර වූ බව හෙතෙම චෝදනා කළේය. වැඩිදුරටත් කරුණු දැක්වූ ජනාධිපති නීතිඥ මෛත්‍රී ගුණරත්න, වෙඩි තැබීමට අණදුන් නිලධාරීන් සහ ඊට සම්බන්ධ බන්ධනාගාර කාර්ය මණ්ඩලයද වහාම අත්අඩංගුවට ගෙන අපරාධ පරීක්ෂණ දෙපාර්තමේන්තුව විසින් සර්ව සාධාරණ පරීක්ෂණයක් පැවැත්විය යුතු බව අවධාරණය කළේය.
එමෙන්ම ජ්‍යෙෂ්ඨ නීතිඥ අරවින්ද හබක්කල සහ සේනක පෙරේරා ඇතුළු නීතිඥ මණ්ඩලය පෙන්වා දුන්නේ, මියගිය සංඛ්‍යාවෙන් 17 දෙනෙකුම වෙඩි වැදීමෙන් මියගොස් ඇති බව මරණ පරීක්ෂණවලදී තහවුරු වී ඇති බවයි. අදාළ 54 වන වගන්තිය යටතේ පවතින නීතිමය ක්‍රියාපටිපාටීන් නිසා බන්ධනාගාර තුළ අධික තදබදයක් සහ පීඩනයක් හටගෙන ඇති බවත්, එය මෙවැනි ඛේදනීය සිදුවීම්වලට ව්‍යුහාත්මකව බලපා ඇති බවත් නීතිඥවරු වැඩිදුරටත් අධිකරණය හමුවේ සඳහන් කළහ.
සියලු පාර්ශ්වවල කරුණු දැක්වීම් සැලකිල්ලට ගත් මීගමුව ප්‍රධාන මහේස්ත්‍රාත් ශිලනි පෙරේරා, අධිකරණය හමුවේ සැමට එකසේ යුක්තිය ඉටුකරන බව ප්‍රකාශ කළ අතර, රැඳවියන්ගේ වෛද්‍ය පරීක්ෂණ සම්බන්ධයෙන් ජූලි 28 වනදා අධිකරණය හමුවේ පෙනී සිට කරුණු දක්වන ලෙස මීගමුව බන්ධනාගාර අධිකාරීවරයාට නියෝග කළාය.
