විමර්ශන අවසන් කර වාර්තා කිරීමට අල්ලස් කොමිසමට දිනයක් හිමිවෙයි
ශ්‍රීලන්කන් ගුවන් සමාගමේ හිටපු සභාපති නිශාන්ත වික්‍රමසිංහ ට එරෙහිව එල්ල වී ඇති දූෂණ චෝදනා සම්බන්ධයෙන් වන විමර්ශන කටයුතු අවසන් කර ඒ පිළිබඳ ප්‍රගති වාර්තාව අධිකරණයට ඉදිරිපත් කරන ලෙස කොළඹ ප්‍රධාන මහෙස්ත්‍රාත් අසංග එස්. බෝදරගම අද (ජූලි 28) අල්ලස් හෝ දූෂණ චෝදනා විමර්ශන කොමිෂන් සභාවට නියෝග කළේය.
අදාළ පැමිණිල්ල අධිකරණය හමුවේ කැඳවූ අවස්ථාවේදී අල්ලස් කොමිසමේ නිලධාරීන් කරුණු දක්වමින්, මෙම සිදුවීමට අදාළ විමර්ශන අවසන් කර වාර්තා කිරීම සඳහා දිනයක් ලබාදෙන ලෙස ඉල්ලා සිටියේය. ඊට අවසර දුන් ප්‍රධාන මහෙස්ත්‍රාත්වරයා, නඩුව යළි දෙසැම්බර් මස 08 වැනිදා කැඳවීමට නියම කළේය.
එල්ල වී ඇති ප්‍රධාන චෝදනා ත්‍රිත්වය
UL319 ගුවන්වාරයේ ගමන් මග වෙනස් කිරීම:
2014 ජනවාරි 22 වනදා මැලේසියාවේ ක්වාලාලම්පූර් සිට කටුනායක දක්වා පැමිණීමට නියමිතව තිබූ UL319 දරන ගුවන්යානයේ ගමන් මාර්ගය වෙනස් කිරීම මගින් රජයට ඇමෙරිකානු ඩොලර් 4,512ක පාඩුවක් සිදුකිරීම.
මගීන් 75 දෙනෙකු පිටත් කර හැරීම:
2014 ජනවාරි 26 වනදා මාලදිවයිනේ සිට ශ්‍රී ලංකාවට පැමිණ ප්‍රංශය බලා යාමට සිටි මගීන් 75 දෙනෙකු UL563 දරන ගුවන්යානයෙන් පිටත් කර හැරීම මගින් ඇමෙරිකානු ඩොලර් 19,160ක මුදලක් රජයට පාඩු කිරීම.
මැතිවරණ ප්‍රචාරණයට රාජ්‍ය මුදල් යෙදවීම:
2014 දෙසැම්බර් 19 වනදා කටුනායක 18 කණුව ක්‍රීඩාංගණයේ පැවැති හිටපු ජනාධිපති මහින්ද රාජපක්ෂ ගේ මැතිවරණ ප්‍රචාරක කටයුතු වෙනුවෙන් රුපියල් 1,250,000ක රජයේ මුදල් අයථා ලෙස වැය කිරීම.
අල්ලස් කොමිසම මගින් අත්අඩංගුවට ගැනීමෙන් පසුව අධිකරණය හමුවට ඉදිරිපත් කෙරුණු සැකකාර නිශාන්ත වික්‍රමසිංහ මේ වන විට ඇප මත මුදාහැර සිටී.
