*නීති ප්‍රජාවේ ස්වාධීනත්වයට එල්ල වන ප්‍රහාර හමුවේ නීතිඥ සංගමය එකමුතුව සිටින බවට අවධාරණයක්
ජාතික ජන බලවේගයේ (NPP) පාර්ලිමේන්තු මන්ත්‍රී අසිත නිරෝෂණ එගොඩ විතානගේ විසින් ශ්‍රී ලංකා නීතිඥ සංගමයේ (BASL) සභාපති නීතිඥ රජීව් අමරසූරිය ඉලක්ක කරගනිමින් පාර්ලිමේන්තුවේදී සිදුකළ ප්‍රකාශයට ශ්‍රී ලංකා නීතිඥ සංගමය මෙන්ම එහි හිටපු සභාපති ජනාධිපති නීතිඥ සාලිය පීරිස් ද සිය දැඩි විරෝධය පළ කර තිබේ.
අදාළ මන්ත්‍රීවරයා විසින් පාර්ලිමේන්තුවේදී සිදුකළ 'සජිත්-රජීව් ඩීල් එකක්' පිළිබඳ චෝදනාව සම්පූර්ණයෙන්ම අසත්‍ය, පදනම් විරහිත සහ ද්වේෂසහගත චේතනාවෙන් කරන ලද්දක් බව ශ්‍රී ලංකා නීතිඥ සංගමය නිවේදනයක් නිකුත් කරමින් සඳහන් කරයි.
නීතිඥ සංගමයේ නිල නිවේදනය සහ අභියෝගය
ශ්‍රී ලංකා නීතිඥ සංගමය පෙන්වා දෙන්නේ පාර්ලිමේන්තු වරප්‍රසාදවලට මුවාවෙමින් ජනතාව නොමඟ යැවීමට මන්ත්‍රීවරයා උත්සාහ දරා ඇති බවයි. මෙම දේශපාලන ප්‍රහාරයන් හමුවේ නීතිඥ සංගමය සැලෙන්නේ නැති බවත්, ශ්‍රී ලංකාවේ සමස්ත නීති ප්‍රජාවම එකමුතුව සිටිමින් සංගමයේ ස්වාධීනත්වය සහ අඛණ්ඩතාව වෙනුවෙන් පෙනී සිටින බවත් අදාළ නිවේදනයේ අවධාරණය කර ඇත.
පාර්ලිමේන්තු වරප්‍රසාද පිටුපස සැඟවී සිදුකළ මෙම අසත්‍ය ප්‍රකාශය, හැකි නම් පාර්ලිමේන්තුවෙන් පිටතදී නැවත ප්‍රකාශ කරන ලෙස ශ්‍රී ලංකා නීතිඥ සංගමය පාර්ලිමේන්තු මන්ත්‍රී අසිත නිරෝෂණ ට සෘජු අභියෝගයක් ද එල්ල කර තිබේ.
සභාපති රජීව් අමරසූරිය සහ සාලිය පීරිස්ගේ ප්‍රතිචාර
සිද්ධිය සම්බන්ධයෙන් පෞද්ගලිකවම අදහස් දක්වමින් නීතිඥ සංගමයේ සභාපති රජීව් අමරසූරිය සටහන් කර ඇත්තේ, මන්ත්‍රීවරයාගේ මෙම වගකීම් විරහිත හැසිරීම පිළිබඳව තමන් දැඩි ලෙස කණගාටුවට පත්වන බවයි.
එමෙන්ම, නීතිඥ සංගමයේ හිටපු සභාපති ජනාධිපති නීතිඥ සාලිය පීරිස් ද සිය සමාජ මාධ්‍ය ගිණුම සටහනක් තබමින් මෙම සිදුවීම හෙළා දැක ඇත. පාර්ලිමේන්තු වරප්‍රසාදවලට මුවාවී නීතිඥ සංගමයේ සභාපතිවරයාට අපහාස කිරීමට මන්ත්‍රීවරයෙකු කටයුතු කිරීම අතිශය කනගාටුදායක තත්ත්වයක් බව පෙන්වා දෙන සාලිය පීරිස්, රටේ සැබෑ අවධානය යොමු විය යුතු වැදගත් කරුණු පිළිබඳ සාකච්ඡා මෙවැනි පහත් ක්‍රියාකලාපයන් නිසා යටපත් වීමට ඉඩ නොතැබිය යුතු බව ද පෙන්වා දෙයි.
පාර්ලිමේන්තු මන්ත්‍රීවරුන්ට හිමිවන පාර්ලිමේන්තු වරප්‍රසාද බලතල සහ වගකීම් පනත යටතේ පාර්ලිමේන්තු සභාව තුළ කියන කරුණු සම්බන්ධයෙන් අධිකරණය හමුවේ නඩු පැවරිය නොහැකි ආරක්ෂාවක් හිමිවේ. කෙසේ වෙතත්, අතීතයේ සිටම පාර්ලිමේන්තු වරප්‍රසාද අවභාවිත කරමින් විවිධ පුද්ගලයින්ට සහ වෘත්තීය ආයතන ප්‍රධානීන්ට චෝදනා එල්ල කිරීම සම්බන්ධයෙන් සමාජයීය හා නීතිමය වශයෙන් දැඩි කතාබහක් නිර්මාණය වී ඇත.
