ඉඩම නැවත පවරා නොගෙන අලුත් ආයෝජකයෙකුට බදු අයිතිය පැවරීමට නාගරික සංවර්ධන අධිකාරියෙන් තීරණයක්
කොළඹ නගරයේ ඉදිකිරීමට යෝජනා වූ විශාලතම බහුකාර්ය සංවර්ධන ව්‍යාපෘතියක් වන 'ක්‍රිෂ් ස්ක්වෙයාර්' (Krrish Square) ව්‍යාපෘතියේ ඉදිරි පැවැත්ම මේ වන විට අධිකරණ ක්‍රියාමාර්ග හමුවේ බරපතල අවිනිශ්චිතතාවකට ලක්ව තිබේ.
කොළඹ වාණිජ නගරයේ කේන්ද්‍රස්ථානයක අතිසුඛෝපභෝගී නේවාසික, හෝටල් සහ වාණිජ පරිශ්‍ර සංකීර්ණයක් ලෙස ආරම්භ වූ මෙම ව්‍යාපෘතියේ ප්‍රධාන සංවර්ධක සමාගම වන 'ක්‍රිෂ් ට්‍රාන්ස්වර්ක්ස් කොළඹ සමාගම' (Krrish Transworks Colombo Ltd) වසා දැමීමේ (Liquidation) නියෝගයක් නිකුත් වීමත් සමඟ මෙම තත්ත්වය මතුව ඇත. ඉදිකිරීම් අඩක් නිමවූ දැවැන්ත ගොඩනැගිලි රාමුව තවමත් කොළඹ නගර අහස්කුස අරා පැවතුණද, එහි අනාගතය තීරණය කිරීමේ බලය මේ වන විට වාණිජ මහාධිකරණය හමුවේ පවතින නීතිමය ක්‍රියාවලිය වෙත යොමුව තිබේ.
අධිකරණ ක්‍රියාමාර්ග සහ නාගරික සංවර්ධන අධිකාරියේ ස්ථාවරය
ප්‍රධාන ණය හිමියෙකු විසින් කරන ලද ඉල්ලීමකට අනුව අධිකරණය මගින් සමාගම ඈවර කිරීමට (Winding up) නියෝග කළ අතර, ඒ අනුව සමාගමේ සියලු වත්කම් අධිකරණය විසින් පත්කරන ලද ඈවරකරුවෙකු (Liquidator) භාරයට පත්කර ඇත.
නාගරික සංවර්ධන අධිකාරියේ (UDA) ජ්‍යෙෂ්ඨ නිලධාරීන් සඳහන් කරන්නේ, අදාළ සමාගම වෙත බදු පදනම මත ලබා දී තිබූ ඉඩම නැවත රජයට පවරා ගැනීමට දැනට අදහස් නොකරන බවයි. ඒ වෙනුවට, අඩපණ වී ඇති මෙම ව්‍යාපෘතිය සම්පූර්ණ කිරීමට හැකියාව ඇති නව ආයෝජකයෙකු සොයාගැනීම සඳහා අදාළ බදු අයිතිය (Leasehold rights) වෙළඳපොළ වෙත ඉදිරිපත් කිරීමට ඈවරකරු කටයුතු කරනු ඇතැයි බලධාරීහු බලාපොරොත්තු වෙති. ව්‍යාපෘතිය මුල සිට ආරම්භ කරනවාට වඩා එහි පවතින ආර්ථික වටිනාකම රැකගැනීම මෙම පියවරේ අරමුණ වී තිබේ.
ව්‍යාපෘතියේ ඉතිහාසය සහ වර්තමාන අභියෝගය
2012 වසරේදී අත්සන් කරන ලද මූලික ගිවිසුම ප්‍රකාරව රුපියල් බිලියන 5ක මුදලකට වසර 99ක බදු පදනම මත මෙම වටිනා ඉඩම ක්‍රිෂ් සමාගම වෙත පැවරිණි. අතිසුඛෝපභෝගී නිවාස, කාර්යාල පරිශ්‍ර, වෙළඳ සංකීර්ණ, තරු පහේ හෝටලයක් සහ ඓතිහාසික 'ට්‍රාන්ස්වර්ක්ස්' ගොඩනැගිල්ල බුටික් හෝටලයක් ලෙස ප්‍රතිසංස්කරණය කිරීම මීට ඇතුළත් විය. එම වකවානුවේදී ශ්‍රී ලංකාවේ නාගරික ඉඩම් ක්ෂේත්‍රයට පැමිණි ප්‍රධානතම ඉන්දියානු ආයෝජනයක් ලෙස මෙය සැලකුණු අතර, විදේශීය සංචාරක ආකර්ෂණය සහ රැකියා උත්පාදනය උදෙසා එය ඉහළ දායකත්වයක් සපයනු ඇතැයි අපේක්ෂා කෙරිණි.
කෙසේ වෙතත්, වසර ගණනාවක් තිස්සේ සිදුවූ ප්‍රමාදයන් සහ මූල්‍ය අර්බුද හමුවේ ඉදිකිරීම් අතරමග ඇණහිටි අතර, විශාල පරිමාණයේ යටිතල පහසුකම් ව්‍යාපෘති මුහුණදෙන මූල්‍ය සහ නීතිමය අවදානම් පිළිබඳව ද මෙමගින් ප්‍රශ්න මතුවී ඇත.
අධිකරණ ඈවර කිරීමේ ක්‍රියාවලිය සහ නව ආයෝජකයෙකු හඳුනාගැනීම සම්පූර්ණයෙන්ම නීතිමය කාලරාමුව මත රඳා පවතින බැවින්, ඉදිකිරීම් නැවත ආරම්භ වන නිශ්චිත දිනයක් ප්‍රකාශ කළ නොහැකි බව නාගරික සංවර්ධන අධිකාරිය පවසයි. ඈවර කිරීමේ ක්‍රියාවලිය හරහා වෙනත් සංවර්ධකයෙකුට බදු අයිතිය පැවරීමට නීතිමය මගක් විවෘත වී තිබුණද, මේ දක්වා ඊට සුදුසු නව ආයෝජකයෙකු ඉදිරිපත් වී ඇති බවට තොරතුරු වාර්තා වී නොමැත.
(සටහන | සම්පත් ධීරසේකර )
මුලාශ්‍රය :
Court Battles Cloud Future of Colombo's Landmark Krrish Development Project
