රුපියල් ලක්ෂ 05 බැගින් වූ ශරීර ඇප දෙකක් සහ විදේශ ගමන් තහනමක් පැනවීමට කොළඹ ප්‍රධාන මහේස්ත්‍රාත්ගෙන් නියෝග
මෝටර් රථ ප්‍රවාහන දෙපාර්තමේන්තුවේ (RMV) නීත්‍යනුකූල නොවන අන්දමින් වාහනයක් පැවරීම සහ ලියාපදිංචි කිරීම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව මගින් අත්අඩංගුවට ගන්නා ලද එම දෙපාර්තමේන්තුවේ හිටපු කළමනාකරණ සේවා නිලධාරිනියක ඇප මත මුදාහැරීමට කොළඹ ප්‍රධාන මහේස්ත්‍රාත් අසංග එස්. බෝදරගම අද (ජූලි 27) නියෝග කළේය.
ඒ අනුව සැකකාරිය රුපියල් ලක්ෂ 5 බැගින් වූ ශරීර ඇප දෙකක් මත මුදාහැරීමට නියෝග කළ මහේස්ත්‍රාත්වරයා, ඇයගේ විදේශ ගමන් තහනම් කරමින් අදාළ නියෝගය ආගමන විගමන පාලකවරයා වෙත යොමුකරන ලෙස අධිකරණ රෙජිස්ට්‍රාර්වරයාට නියම කළේය.
මෙලෙස ඇප මත මුදාහැර ඇත්තේ මෝටර් රථ ප්‍රවාහන දෙපාර්තමේන්තුවේ හිටපු කළමනාකරණ සේවා නිලධාරිනියක වන විජේසේකර ආරච්චිගේ චන්ද්‍රා විජයසේකර නමැත්තියයි.
චෝදනාව සහ අල්ලස් කොමිසමේ කරුණු දැක්වීම
ශ්‍රී ලංකා රේගුවෙන් නිසි පරිදි නිෂ්කාශනය නොකර සහ අදාළ රේගු බදු ගෙවීමෙන් තොරව නීතිවිරෝධී ලෙස මෙරටට ආනයනය කරන ලද මෝටර් රථයක් මෝටර් රථ ප්‍රවාහන දෙපාර්තමේන්තුව තුළ නිල වශයෙන් ලියාපදිංචි කිරීමට කටයුතු කිරීම සම්බන්ධයෙන් අල්ලස් කොමිසම මගින් සැකකාරිය අත්අඩංගුවට ගෙන අධිකරණයට ඉදිරිපත් කර තිබිණි.
අදාළ මෝටර් රථයේ පළමු පැවරීම සිදුකිරීම සඳහා කවුළු අංකයක් ලබාදෙමින්, එම තොරතුරු මෝටර් රථ ප්‍රවාහන දෙපාර්තමේන්තුවේ නිල පරිගණක පද්ධතියට ඇතුළත් කිරීමට මෙම සැකකාරිය පියවර ගෙන ඇති බව විමර්ශනවලදී තහවුරු වී ඇති බව අල්ලස් කොමිසමේ විමර්ශන නිලධාරීහු අධිකරණය හමුවේ පැවසූහ.
එමෙන්ම මෙම නීතිවිරෝධී වාහන ලියාපදිංචි කිරීමේ සිද්ධියට අදාළව දැනට සැකකරුවන් පස්දෙනෙකු අත්අඩංගුවට ගෙන ඇප මත මුදාහැර ඇති බවත්, අද දින ඇප නියම වූ නිලධාරිනිය මෙම සිද්ධියේ හයවන සැකකාරිය ලෙස නම් කර ඇති බවත් කොමිසම වැඩිදුරටත් අධිකරණයට දැනුම් දුන්නේය.
ඉදිරිපත් වූ කරුණු සැලකිල්ලට ගත් කොළඹ ප්‍රධාන මහේස්ත්‍රාත්වරයා සැකකාරියට දැඩි ඇප කොන්දේසි පනවමින් නඩුව පසුවට කල් තැබීය.
