*"ජාතික ආරක්ෂාව සහ සංස්කෘතිය අනතුරේ" යැයි කියමින් විපක්ෂයෙන් ආණ්ඩුවට එරෙහිව දැඩි දේශපාලන ප්‍රහාරයක්
දෙවිනුවර ඓතිහාසික ශ්‍රී උත්පලවණ්ණ ශ්‍රී විෂ්ණු මහා දේවාලයේ වාර්ෂික ඇසළ පෙරහැර මංගල්‍යයේ කාවඩි නර්තනය සහිත පෙරහැර අද (ජූලි 28) රාත්‍රියේ වීථි සංචාරය කිරීමට නියමිත අතර, ඒ සඳහා පොලීසියට අමතරව පොලිස් විශේෂ කාර්ය බළකාය (STF) යොදවමින් විශේෂ ආරක්ෂක වැඩපිළිවෙළක් ක්‍රියාත්මක කිරීමට පියවර ගෙන තිබේ.
මහජන ආරක්ෂක අමාත්‍ය ආනන්ද විජේපාල සඳහන් කළේ, සෘජු පොලිස් අධීක්ෂණය සහ විශේෂ ආරක්ෂාව යටතේ පෙරහැර සංවිධානය කර ඇති බවයි.
අර්බුදයේ පසුබිම සහ ලබාදුන් තීරණය
පෙරහැරේ කාවඩි නර්තනයට සහභාගී වන කණ්ඩායම් සීමා කිරීම සම්බන්ධයෙන් සංවිධානාත්මක අපරාධකරුවෙකු වන 'කංජිපාන් ඉම්රාන්' නැමැත්තා විසින් දෙවිනුවර දේවාලයේ බස්නායක නිලමේ තිලිණ මධුසංක වෙත තර්ජනය කළ බවට තොරතුරු වාර්තා විය. අපරාධ කල්ලි සාමාජිකයන් දෙපිරිසක් අතර ගැටුම්කාරී තත්ත්වයක් ඇතිවීමේ අවදානමක් පවතින බවට ලැබුණු බුද්ධි තොරතුරු සැලකිල්ලට ගනිමින්, කාවඩි නර්තන පෙරහැර තාවකාලිකව අවලංගු කරන ලෙස පොලිස්පති ප්‍රියන්ත වීරසූරිය විසින් මාතර දිස්ත්‍රික් ලේකම්වරයා වෙත මීට පෙර නිර්දේශ කර තිබිණි.
කෙසේ වෙතත්, ඊයේ (ජූලි 27) පස්වරුවේ මාතර දිස්ත්‍රික් ලේකම් කාර්යාලයේදී මහජන ආරක්ෂක අමාත්‍ය ආනන්ද විජේපාල ගේ ප්‍රධානත්වයෙන් පැවැති විශේෂ සාකච්ඡාවකදී, පසුගිය වසරවල සහභාගී වූ සියලුම කාවඩි කණ්ඩායම්වලට මෙවර ද නර්තනය සඳහා අවසර ලබාදීමට තීරණය විය. අතිරික්ත පොලිස් බලඇණි යොදවමින් මහජනතාවගේ ආරක්ෂාව තහවුරු කිරීමට එහිදී එකඟතාව පළ විය.
දේශපාලන වේදිකාවේ උණුසුම් විවේචන
මෙම සිද්ධිය මුල්කරගනිමින් විපක්ෂයේ දේශපාලනඥයන් ආණ්ඩුවේ නීතිය හා සාමය පවත්වාගැනීමේ හැකියාව දැඩි ලෙස ප්‍රශ්න කර සිටියි. පාදුක්ක ප්‍රදේශයේ පැවැති ජන හමුවකදී අදහස් දක්වමින් ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ පැවසූයේ, එල්ටීටීඊ ත්‍රස්තවාදී තර්ජන පැවැති අසීරුම කාලවකවානුවල පවා ආරක්ෂාව සපයමින් සංස්කෘතිකාංග පවත්වාගෙන ගියද, වත්මන් ආණ්ඩුවට අවම වශයෙන් පෙරහැරකටවත් ආරක්ෂාව දීමට නොහැකි වී ඇති බවයි.
එක්සත් ජාතික පක්ෂයේ හිටපු පාර්ලිමේන්තු මන්ත්‍රී සමන් රත්නප්‍රිය සහ හිටපු අමාත්‍ය පාඨලී චම්පික රණවක ද සඳහන් කළේ, සංස්කෘතික උත්සව පාලනය කිරීමට පාතාලයට ඉඩ නොදිය යුතු බවත්, ආණ්ඩුවට නිසි ආරක්ෂක වැඩපිළිවෙළක් නොමැති බවත්ය.
එල්ල වන විවේචනවලට පිළිතුරු දෙමින් ජාතික ජන බලවේගයේ පාර්ලිමේන්තු මන්ත්‍රී චන්දන සූරියආරච්චි සඳහන් කළේ, බුද්ධි තොරතුරක් ලැබුණු විට එය විශ්ලේෂණය කර තීරණ ගැනීම පොලීසියේ කාර්යභාරයක් වන අතර, එය ආණ්ඩුවේ අකාර්යක්ෂමතාවයක් ලෙස හුවාදැක්වීම දේශපාලන අරමුණින් සිදුකරන්නක් බවයි.
