2026 ලෝක කුසලානයෙන් පසු දිවියට නව අලුත් පිටුවක්: වසර 10ක ආදර කතාවේ අභිෂේකය ලබන සෙනසුරාදා
ක්‍රිස්ටිආනෝ රොනාල්ඩෝ නමැති ලෝක පූජිත පාපන්දු ක්‍රීඩකයා ඔහු උපත ලැබ හැදී වැඩුනු දූපතේදී ඔහුගේ පෙම්වතිය වන ජෝජීනා රොඩ්රීගෙස් සමග විවාහ වීමට නියම කරගෙන සිටිනවා.
යුවල විවාහ වීමට තීරණය කර තිබෙන්නේ පෘතුගාලයේ මෙඩීරා (Madeira) දූපතේ.
දෙදෙනාගේ මහා විවාහ මංගල්‍යය වෙනුවෙන් මේ දූපතේ අගනුවර වන ෆුන්චාල් හි ප්‍රධාන දේවස්ථානය ලබන සෙනසුරාදා දිනයට වෙන්කර ඇතැයි දේශීය වාර්තා සඳහන් කරනවා.
ෆුන්චාල් නුවර හැදී වැඩුනු පෘතුගාල පාපන්දු තරුවක් වන 41 හැවිරිදි රොනාල්ඩෝ සහ 32 හැවිරිදි නිරූපිකාවක වන ජෝජීනා ඔවුන්ගේ විවාහ උත්සවය පැවැත්වීම සඳහා දේවස්ථානය අසල තිබෙන සැවෝයි පැලස් තරු පහේ හෝටලය වෙන් කරගෙන තිබෙනවා.
මේ උත්සවය වෙනුවෙන් ලබන සිකුරාදා හා සෙනසුරාදා දිනවල හෝටලයේ මහල් දෙකක් මෙන්ම බාර් පෙදෙස් කිහිපයක් ද අනෙකුත් අමුත්තන්ට විවෘත නොවනු ඇති බවට හෝටලය දන්වා තිබෙනවා.
හිටපු එංගලන්ත මැන්චෙස්ට යුනයිටඩ් ක්‍රීඩක රොනාල්ඩෝ දැන් ක්‍රීඩා කරන්නේ සෞදි අරාබියේ.
රොනාල්ඩෝ ට ස්පාඤ්ඤ-ආජන්ටිනා ජාතික ජෝජීනා මුණගැසුනේ 2016 වසරේ. ඔහු ඇයට විවාහ යෝජනාව ඉදිරිපත් කළේ පසුගිය වසරේ අගෝස්තු මාසයේ. රොනාල්ඩෝ සහ ජෝජීනා දියමන්ති මුදු පැලඳ ස්පාඤ්ඤයේ මෙයියෝකා දූපතේදී කෙළිනැවකට ගොඩවෙන අයුරු පසුගිය සතියේදී කැමරාවට හසුව තිබුණා.
2026 ලෝක කුසලාන පාපන්දු තරගාවලියෙන් පසුව දෙදෙනා විවාහ වීමට සැලසුම් කර තිබෙන බව රොනාල්ඩෝ කලින් ප්‍රකාශ කර තිබුණා. පසුගිය මාසයේ එම කුසලානය දිනා ගත් ස්පාඤ්ඤය විසින් පෘතුගාලය තරගාවලියෙන් ඉවත් කරනු ලැබුවා.
ජයග්‍රාහී කුසලානය අතැතිව විවාහ මංගල්‍යයට පැමිණීමට අපේක්ෂා කරන බව රොනාල්ඩෝ මීට පෙර කියා තිබුණා.
තමා ඇසුරු කළ කාන්තාවන් අතරින් තමාට විවාහ වීමට අවශ්‍ය වූ එකම කාන්තාව ජෝජීනා බව රොනාල්ඩෝ පවසනවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
