ජනතාව මුහුණ දෙන අධික බදු බර සහ ජීවන වියදම් අර්බුදයට විසඳුම් ඉල්ලා කොළඹ කේන්ද්‍ර කරගනිමින් හෙට (ඔක්තෝබර් 03) විරෝධතා පාගමනක් පැවැත්වීමට ජන අරගල ව්‍යාපාරය තීරණය කර තිබේ.
අද පෙරවරුවේ නුගේගොඩදී පැවති මාධ්‍ය හමුවකදී එම ව්‍යාපාරයේ ජාතික විධායක සභික වසන්ත මුදලිගේ මේ බව අනාවරණය කළේය.
විරෝධතාව බොරැල්ල කැම්බල් පිටියෙන්
මෙම විරෝධතා පාගමන හෙට දහවල් 12.00ට බොරැල්ල කැම්බල් පිටියෙන් ආරම්භ වීමට නියමිත බව සංවිධායකයෝ පවසති.
පාර්ලිමේන්තුව නියෝජනය කරන පාර්ශ්ව ජනතාවගේ දෛනික ආර්ථික පීඩනය කෙරෙහි නිසි අවධානයක් යොමු නොකරන බවට මෙහිදී චෝදනා එල්ල විය.
සාමාන්‍ය ජනතාවගේ දෛනික පරිභෝජනය සහ පාසල් දරුවන්ගේ අධ්‍යාපන අවශ්‍යතා මූලික කරගනිමින් මෙම විරෝධතාව සංවිධානය කර ඇත.
අත්‍යවශ්‍ය ආහාර සහ අධ්‍යාපන උපකරණ
පාසල් උපකරණ සහ මූලික ආහාර ද්‍රව්‍ය මත පැටවී ඇති බදු බර හේතුවෙන් පවුල් ඒකක දැඩි අසීරුතාවකට පත්ව ඇති බව වසන්ත මුදලිගේ පෙන්වා දුන්නේය.
ඔහු ඉදිරිපත් කළ සංඛ්‍යාලේඛනවලට අනුව ආහාර ද්‍රව්‍ය කිහිපයක බදු පීඩනය මෙසේය:
* හාල්මැස්සෝ - කිලෝවකට රුපියල් 100ක පමණ බද්දක්
* කුකුල් මස්කි - ලෝවකට රුපියල් 310කට ආසන්න බද්දක්
* බිත්තර - එක් බිත්තරයක් සඳහා රුපියල් 11ක බදු බරක්
ප්‍රෝටීන් බහුල ආහාර වේලක් ලබාගැනීමට පවා මේ හේතුවෙන් සාමාන්‍ය පවුල්වලට බාධා එල්ල වී ඇති බව ඔහු පැවසිය.
''දැන් ආණ්ඩුව විපක්ෂය, IMF එක ඇතුළු සියලු පාර්ශව එක පිලකට ඇවිල්ලා ඊලග අයවැයෙන් මිසයිල, කාල තුවක්කු මේ රටේ දුප්පත් ජනතාවගේ පැත්තට එවන්න සූදානම් වෙලා ඉන්නවා. අන්න ඒ ප්‍රහාරයට මුහුණ දෙන්න ජනතාව සංවිධානය විය යුතුයි. අපි හිතනවා මහපාරෙ අරගලය හැරෙන්න ජනතාවට වෙන වසඳුමක් නැහැ කියලා. අන්න ඒ නිසා හෙට ඔක්තෝබර් 3වෙනිදා බදු බරට එරෙහිව ජන අරගල ව්‍යාපාරය පවත්වන දැවැන්ත විරෝධතා පාගමනට එන්න කියලා මේ රටේ සියලු ජනතාවට අපි ආරාධනා කරනවා. " වැඩිදුරටත් කියා සිටියේය..
ආර්ථික ප්‍රතිසංස්කරණ සහ ජනතා පීඩනය
රට තුළ ක්‍රියාත්මක වන බදු ප්‍රතිපත්ති සහ ජාත්‍යන්තර මූල්‍ය අරමුදලේ (IMF) කොන්දේසි හමුවේ ඉදිරි අයවැය මඟින්ද ජනතාවට සහන ලැබීමේ හැකියාව සීමිත බවට සංවිධායකයෝ මත පළ කරති.
රාජ්‍ය ණය ප්‍රතිව්‍යුහගතකරණය සහ ඉහළ පොලී අනුපාතික යටතේ සිදුකෙරෙන මූල්‍ය මෙහෙයුම්වල බර අවසානයේ පැටවෙන්නේ පොදු ජනතාව මත බව මෙහිදී සාකච්ඡාවට ලක්විය.
මෙම තත්ත්වයට එරෙහිව සියලු ප්‍රජා කණ්ඩායම් හෙට පැවැත්වෙන විරෝධතාව වටා එක්විය යුතු බව ජන අරගල ව්‍යාපාරය අවධාරණය කරයි.