ප්‍රබල කටාර් පිල පරදවමින් ඇරඹි ශ්‍රී ලංකා මෙහෙයුම අපරාජිතව නිමාවට
ඩේවිස් කුසලාන ටෙනිස් ආසියා/ඔෂනියා තෙවැනි කොටසේ තරගාවලියට උසස් වීමට ශ්‍රී ලංකාව සමත්ව සිටිනවා. ශ්‍රී ලංකාව සමග කටාර් දේශය ද තෙවැනි කොටසට සුදුසුකම් ලබා ගත්තා.
ශ්‍රී ලංකා ටෙනිස් සංගම් පිටියේ සිවු දිනක් තිස්සේ පැවති ඩේවිස් කුසලාන ආසියා/ඔෂනියා සිවු වැනි කොටසේ තරගාවලියේදී ශ්‍රී ලංකාව තෙවැනි කොටසට සුදුසුකම් ලැබුවේ කුවේටය 2-0කින් පරාජය කරමින්.
අප්නා පෙරේරා ලකුණු 7-5, 2-6 හා 6-2කින් කුවේට් කණ්ඩායමේ බාඩර් අලාබ්දුල්ලා පරාජය කළ තරගය පැය 2යි මිනිත්තු 39ක කාලයක් පැවැත්වුණා.
ශ්‍රී ලංකාවේ සාර්ථකත්වය සම්පූර්ණ කළේ තෙහාන් විජේමාන්න. පැයයි මිනිත්තු 36ක් තිස්සේ පැවති තීරණාත්මක දෙවැනි ඒකල තරගයේදී ඔහු කුවේටයේ එසා කබාසාඩ් පැරදවීමට සමත් වුණා.
මේ ජයග්‍රහණ සමග ශ්‍රී ලංකාව තරගාවලිය අවසන් කළේ එහි එකම අපරාජිත කණ්ඩායම ලෙසින් වීම විශේෂත්වයක්.
ශ්‍රී ලංකාව ඔවුන්ගේ ඩේවිස් කුසලාන ආසියා/ඔ්ෂනියා සිවු වැනි කොටසේ මෙහෙයුම ජයග්‍රාහීව ආරම්භ කළේ තරගාවලියේ දක්ෂතම කණ්ඩායම ලෙස ශ්‍රේණිගතව සිටි කටාර් දේශය පරදවමින්. සත්කාරක රට එම ජයග්‍රහණය ලබා ගත්තේ තෙහාන් විජේමාන්න මාර්ගයෙන්. තරගාවලියේ ආරම්භක ඒකල ඉසව්වේදී ඔහු තරගයේ පිටුපස සිට නැගිටිමින් මොසා අල්හාර්රාසි පරාජය කිරීමට සමත් වුණා.
ශ්‍රී ලංකාව හා කටාර් තෙවැනි කොටසේ තරගාවලියට සුදුසුකම් ලබද්දී ඉරාකය හා ටර්ක්මෙනිස්තානය පහළ කොටසට වැටුණා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
