පොලිසිය දැක අසුන මාරු කිරීමට තැත්කළ වෝනර්ගේ වාහනයට මත්පැන් හඳුනාගන්නා අගුලක් සවිකිරීමට නියෝග.
ඔස්ට්‍රේලියානු හිටපු පිතිකරු ඩේවිඩ් වෝනර් ට මින් ඉදිරියට බීමත්ව රිය පදවන්න බැහැ. ඒ, ඔහුගේ ශරීරයේ මත්පැන් තිබෙන විට ඇන්ජිම පණගැන්වීම වළක්වන අතුරගුලක් (interlock) ඔහුගේ කාරයට සවි කරන ලෙසට උසාවිය නියෝග කර ඇති බැවින්. මීට අමතරව, ඔහුට ඔස්ට්‍රේලියානු ඩොලර් 1,500ක දඩයක් ද ගසා තිබෙනවා.
ඔහුට මේ දඬුවම් නියම කර තිබෙන්නේ පසුගිය අප්‍රේල් මාසයේ පාස්කු ඉරිදා සිඩ්නි නුවරදී බීමත්ව රිය පැදවූ බවට වරද පිළිගැනීමෙන් පසුව. සාදයකින් පසුව වෝනර් ඔහුගේ පවුල සමග නිවස බලා කාරය පදවමින් සිටියදී සිදු කෙරුණු අහඹු ශ්වසන පරීක්ෂණයේදී 39 හැවිරිදි වෝනර්ගේ රුධිර මද්‍යසාර ප්‍රමාණය නීතියෙන් අවසර දී තිබෙන සීමාවෙන් දෙගුණයකට වඩා වැඩි වී තිබුණා.
මාර්ගය පසෙක පරීක්ෂකයින් සිටිනු දැකීමෙන් පසුව වෝනර් ඔහුගේ කාරය නවත්වා එහි සිටි කාන්තාවක සමග රියැදුරු අසුන හුවමාරු කර ගැනීමට උත්සාහ කළ අයුරු උසාවියට අසන්නට ලැබුණා.
එහිදී දුන් නියෝගයට අනුව වෝනර්, ඔහුගේ ශරීරය තුළ මද්‍යසාර ඇති බව දැනුනු විට ඔහුගේ කාරය පණගැන්වීම වළක්වන අතුරු අගුලක් සවි කරගත යුතු වනවා.
වෝනර් සිදුකළ වරද බරපතල කර තිබෙන්නේ ඔහුගේ දරුවන් ද කාරයේ සිටි නිසා බව අධිකරණ විනිසුරු ප්‍රකාශ කර තිබෙනවා.
මේ සිද්ධිය සම්බන්ධයෙන් වූ මාධ්‍ය ආවරණයේ ප්‍රතිඵලයක් වශයෙන් වෝනර්ගේ වාණිජමය අවස්ථාවන්ට සිදුවූ හානියෙන් ඔහු අමතර දඬුවමක් විඳ තිබෙන නිසා ඔහුට අනවශ්‍ය දඬුවම් නොපැනවිය යුතු බවට ඔහුගේ නීතිඥවරයා උසාවියට කියා තිබුණා.
ජාත්‍යන්තර ක්‍රිකට් ක්‍රීඩාවෙන් 2024 වසරේදී සමුගත් ඩේවිඩ් වෝනර්, වර්තමානයේ Fox Sports Australia හි නිවේදකයෙකු ලෙස කටයුතු කරන අතර ඔහු ඩාවින් නුවරදී ඔස්ට්‍රේලියාව ට එරෙහිව බංග්ලාදේශය වාර්තා කළ ෙඑතිහාසික ටෙස්ට් ජයග්‍රහණය ආවරණය කළා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
