සාමාජික සංගම්වල සහයෝගයෙන් ඉන්ෆන්ටීනෝ ධුරයෙන් ඉවත් කිරීමේ හදිසි යෝජනාවකට යුරෝපීය පාලක මණ්ඩලය සැරසෙයි
ලෝක කුසලාන පාපන්දු තරගාවලියේ හා අනෙකුත් ප්‍රධාන තරගාවලියන් හි කොටස් පෞද්ගලික ආයෝජකයින්ට විකිණීමේ සැලසුම් අත්හැර දීමට සිදුවීමෙන් පසුව ජාත්‍යන්තර පාපන්දු සම්මේලනයේ (FIFA) සභාපති ජියානි ඉන්ෆන්ටීනෝ ට යුරෝපීය පාපන්දු සංගම් සම්මේලනය (UEFA) විසින් ගෙන එනු ලබන විශ්වාස-භංග යෝජනාවකට මුහුණ දීමට සිදුවනු ඇතැයි වාර්තා වනවා.
මේ අලුත්ම තත්ත්වය මතුවන්නේ UEFA, මහාද්වීප සම්මේලන කිහිපයක් සහ FIFA තුළම සිටින ජ්‍යෙෂ්ඨ පුද්ගලයන් කිහිප දෙනෙකුගේ බලවත් විරෝධය හමුවේ යෝජිත FIFA Forward Enterprise (FFE) ව්‍යාපෘතිය ඉවත් කර ගැනීමෙන් පසුව FIFA නායකත්වය කෙරෙහි තිබෙන සියුම් පරීක්ෂාව වැඩිවෙමින් තිබියදී.
ඉන්ෆන්ටීනෝ සභාපති තනතුරෙන් ඉල්ලා අස්නොවුනහොත් ඔහුට එරෙහිව හදිසි විශ්වාස-භංග යෝජනාවක් ගෙන ඒමට UEFA සූදානමින් සිටින බව වාර්තා වනවා. යුරෝපීය පාපන්දු පාපන්දු පාලක මණ්ඩලයේ සාමාජික සංගම් 55 ම ඔහු ඉවත් කිරීමේ ක්‍රියාවලියට සහාය දැක්වීමට කැමැත්තෙන් සිටින බව පැවසෙනවා. FIFA ව්‍යවස්ථාව යටතේ, සාමාජික සංගම් 43ක සහයෝගය ඇතිව එවැනි මෝසමක් ගෙන ඒමේ හැකියාව UEFA ට තිබෙනවා.
පෞද්ගලීකරණ යෝජනාව හකුළා ගැනීමේ FIFA තීරණය UEFA විසින් සාදරයෙන් පිළිගනු ලැබූව ද, ගෝලීය පාපන්දුවේ නායකත්වය හා පාලනය පිළිබඳව ඔවුන් දැඩි ප්‍රහාරයක් එල්ල කර තිබෙනවා.
යෝජනාව ඉවත් කර ගැනීම ‘සම්පූර්ණ ක්‍රීඩාවටම ජයග්‍රහණයක්’ ලෙස විස්තර කළ UEFA, “පාපන්දුව විකිණීමට නොවේ” යනුවෙන් ද ප්‍රකාශ කළේ එම යෝජනාවට විරුද්ධ වූ ක්‍රීඩා ලෝලීන්, පාපන්දු සමාජ, ලීග, ක්‍රීඩකයින්, ජාතික සංගම්, සම්මේලන හා දේශපාලන නායකයින්ට ස්තූතිය පළ කරමින්.
වර්තමාන FIFA නායකත්වය UEFA හි විශ්වාසය නැති කරගෙන සිටිනවා පමණක් නොව පාපන්දු පවුලේ අනෙක් බොහෝ සාමාජිකයන්ගේ විශ්වාසය ද පළුදු කරගෙන ඇතැයි යුරෝපීය පාලක මණ්ඩලය පවසන්නේ ඉන්ෆන්ටීනෝ FIFA සභාපති වශයෙන් 2016 වසරේ තෝරා ගනු ලැබූ අවස්ථාවේ ඔහු ලබා දුන් විනිවිදභාවයේ පොරොන්දු දිගටම පවත්වා ගෙන යාමට අසමත්ව ඇතැයි චෝදනා කරමින්.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
