දෙවැනි දිනටත් ඉන්දීය පොලිසිය විසින් කඳුළු ගෑස් ප්‍රහාර එල්ල කර තිබේ.
බහුතරයක් පන්ජාබ් ප්‍රාන්තයෙන් පැමිණි ගොවීහු තවමත් හර්යානා ප්‍රාන්තයේ ෂම්බු දේශසීමාවේ එනම්, දිල්ලියට කිලෝමීටර් 200ක් පමණ දුරින් සිටිති.
විරෝධතා මැඩපැවැත්වීමේ අරමුණින් රේසර් කම්බි, සිමෙන්ති කුට්ටි ආදිය යොදා අගනුවර පැති තුනකින් වැටවල් වලින් වට කර ඇත.
අද (14) දිනයේ දී ගොවීන් මාර්ග බාධක ඉවත් කිරීමට පටන් ගැනීමත් සමඟ හර්යානා ප්‍රාන්ත පොලිසිය විසින් කඳුළු ගෑස් ප්‍රහාර එල්ල කළ බවයි එරට මාධ්‍ය වාර්තා කරන්නේ.
බදාදා උදෑසන වීඩියෝ දර්ශනවලින් පෙන්නුම් කළේ විරෝධතාකරුවන් මැඩ පැවැත්වීම සඳහා කැරලි මර්දන පොලිසිය සහ හමුදා භටයන් දහස් ගණනක් දිල්ලි දේශසීමාවේ යොදවා ඇති අයුරුයි.
2020 වසරේ දී සිදුවූ දේ නැවත සිදුවනු ඇතැයි ඉන්දීය රජය බියට පත්ව ඇත. වසරක් පුරා පැවති විරෝධතාවලින් පුද්ගලයින් රැසක් මිය ගිය අතර එය අවසන් වූයේ මතභේදාත්මක කෘෂිකාර්මික නීති අවලංගු කිරීමට ඇමතිවරුන් එකඟ වීමෙන් පසුව පමණි. එහෙත් වසර තුනක් ගතවී ඇතත් අනෙකුත් ඉල්ලීම් ඉටුවී නොමැති බව ගොවීහු පවසති.
