ඉන්දීය අග්‍රාමාත්‍ය නරේන්ද්‍ර මෝදි අද ඉන්දීය කොංග්‍රස් පක්ෂයට දෝෂාරෝපණ එල්ල කළේය.
තොරතුරු දැනගැනීමේ අයිතිය යටතේ ලබා ගත් තොරතුරු මත 1974 වසරේදී ඉන්දිරා ගාන්ධි මහත්මිය අග්‍රාමාත්‍යවරිය ලෙස කච්චතිව් දූපතේ අයිතිය ශ්‍රී ලංකාවට පවරා දීමට කටයුතු කර තිබෙන බවට අනාවරණය වීම හේතුවෙන් අගමැති මෝදි මෙලෙස කොංග්‍රස් පක්ෂයට දෝෂාරෝපණ එල්ල කර ඇත.
කච්චතිව් ප්‍රශ්නයට වගකිව යුත්තේ කවුරුන්දැයි පිළිබඳ සැමගේ දෑස් මේ වනවිට විවර වී ඇති බවත් ඉන්දියාවේ පැරණි පක්ෂයක් වූ කොංග්‍රස් පක්ෂය රටේ එකමුතුකම සහ අඛණ්ඩතාව දුර්වල කර ඇති බවත් මෝදි අගමැතිවරයා පැවැසුවේය.
ඉන්දිරා ගාන්ධි මහත්මිය ගත් මෙම තීරණය සම්බන්ධයෙන් ඉන්දියානුවන් කෝපයෙන් පසුවන බවත් කොංග්‍රස් පක්ෂය විශ්වාස කළ නොහැකි බවට මතයක් ඔවුන්ගේ සිත්වල ගොඩ නැගී ඇති බවත් අගමැති මෝදි ප්‍රකාශ කළේය.
රාමේෂ්වරම් සහ ශ්‍රී ලංකාව අතර පිහිටි කච්චතිව් දූපත සාම්ප්‍රදායිකව දෙරටේම ධීවරයින් විසින් භාවිත කරන ලදී. නමුත් 1974 වසරේදී එවකට හිටපු අග්‍රාමාත්‍ය ඉන්දිරා ගාන්ධි මහත්මිය විසින් කච්චතිව් දුපතේ අයිතිය ශ්‍රී ලංකාවට පවරා දෙනු ලැබිණ.
ඉන්දීය අගමැතිවරයා ඉහත ප්‍රකාශය කරනු ලැබුවේ, ඉන්දීය මහ මැතිවරණය අසන්න වෙමින් තිබියදී වීම විශේෂ කාරණයකි.
ඉන්දීය මහ මැතිවරණය අදියර හතරකින්
ඉන්දීය මහ මැතිවරණය ලබන අප්‍රේල් සහ මැයි මාසවලදී අදියර හතකින් පැවැත්වෙන බව එරට මැතිවරණ කොමිසම පවසයි.
ඡන්ද විමසීම අප්‍රේල් 19 වැනිදා ආරම්භ වී ජුනි 1 වැනිදා අවසන් වේ.
මැතිවරණ ප්‍රතිඵල ජුනි 4 වැනිදා ප්‍රකාශයට පත් කරන බව ප්‍රධාන මැතිවරණ කොමසාරිස් රජිව් කුමාර් පවසා තිබේ.
(උපුටා ගැනීම : lankadeepa.lk -විමුක්ති එස් රුද්‍රිගු)
