ගනුදෙනු වනතුරු උසස් නිලධාරීන් නොදැන සිටියේ කෙසේදැයි ප්‍රධාන මහේස්ත්‍රාත්වරයාගෙන් ප්‍රශ්න
ජාතික සංවර්ධන බැංකුවේ (NDB) අභ්‍යන්තර පොදු ලෙජර් ගිණුම් පද්ධතිය (General Ledger) ආශ්‍රිතව සිදුව ඇති බව කියන රුපියල් බිලියන 13.5කට අධික මූල්‍ය අක්‍රමිකතාවට අදාළව, එම බැංකුවේම පාරිභෝගික ගිණුම් 11කින් රුපියල් මිලියන 314.5ක මුදලක් ප්‍රතිපූර්ණය (Reimburse) කර ඇති බවට විමර්ශනවලදී අනාවරණය වී ඇතැයි අපරාධ පරීක්ෂණ දෙපාර්තමේන්තුව (CID) අද (21) කොළඹ ප්‍රධාන මහේස්ත්‍රාත් අධිකරණයට දැනුම් දුන්නේය.
කොළඹ ප්‍රධාන මහේස්ත්‍රාත් අසංග එස්. බෝදරගම හමුවේ මෙම නඩුව කැඳවූ අවස්ථාවේදී ඉදිරිපත් වූ කරුණු සලකා බැලූ මහේස්ත්‍රාත්වරයා, සාක්ෂිවලට බලපෑම් සිදුවීමේ හැකියාව සැලකිල්ලට ගනිමින් රක්ෂිත බන්ධනාගාරගත කර සිටි සැකකරුවන් ලබන සැප්තැම්බර් 4 වනදා දක්වා යළි රක්ෂිත බන්ධනාගාරගත කිරීමට නියෝග කළේය. කෙසේවෙතත්, සිද්ධියට අදාළ පස්වන සැකකරු ඇප මත මුදාහැරීමට පියවර ගෙන තිබේ.
විමර්ශන ප්‍රගතිය සහ පාරිභෝගික ගිණුම් හුවමාරුව
සිද්ධිය සම්බන්ධයෙන් අධිකරණයට වැඩිදුරටත් කරුණු වාර්තා කළ අපරාධ පරීක්ෂණ දෙපාර්තමේන්තුවේ විමර්ශන නිලධාරීන් පෙන්වා දුන්නේ, මෙම මූල්‍ය ජාවාරමට සම්බන්ධ ගිණුම් 26ක් අතරින් ගිණුම් 14කට අදාළ පුද්ගලයන්ගෙන් මේ වන විට ප්‍රකාශ සටහන් කරගෙන අවසන් බවයි.
එහිදී විවෘත අධිකරණයේදී කරුණු දැක්වූ විමර්ශන නිලධාරියා:
"ස්වාමීනි, මෙම සිද්ධියට අදාළ වංචාව වන්නේ රුපියල් බිලියන 13.5ක මුදලක්. එම මුදලට අදාළව බැංකුවේ පාරිභෝගික ගිණුම් 11කින් රුපියල් මිලියන 314.5ක මුදලක් ප්‍රතිපූර්ණය වී තිබෙනවා. ඒ පිළිබඳව දීර්ඝ විමර්ශනයක් සිදු කරනවා. විමර්ශන කටයුතු අතරතුර බැංකුව විසින් දැනුම් දුන්නා පොදු ලෙජරයේ ගිණුම් හුවමාරු වන බව. වෙනත් ගිණුම්වලින් රුපියල් මිලියන පහක් බැරවී ඇති අතර පාරිභෝගික ගිණුම්වලින් මුදල් බැරවී නැවත එම ගිණුම්වලටම යොදමින් මෙම මුදල් ප්‍රතිපූර්ණය සිදුකර තිබෙනවා."
අධිකරණයෙන් දැඩි අවධානය සහ නියෝග
මෙහිදී මහේස්ත්‍රාත්වරයා විමර්ශන නිලධාරීන්ගෙන් ප්‍රශ්න කර සිටියේ පාරිභෝගික ගිණුම්වලින් මුදල් අඩුවීම අනාවරණය වූයේ කවදාද, එය විමර්ශන නිලධාරීන්ගේ සොයාගැනීමක්ද නැතහොත් බැංකු විගණන වාර්තා මඟින් හෙළිවූවක්ද යන්නයි.
පාරිභෝගික ගිණුම් ඔස්සේ මෙවැනි මුදල් හුවමාරු සිදුවන තෙක් බැංකුවේ ඉහළ කළමනාකාරීත්වය සහ වගකිවයුතු නිලධාරීන් ඒ පිළිබඳව දැනුවත්ව නොසිටියේද යන්න පිළිබඳව ද විශේෂ විමර්ශනයක් පවත්වන ලෙස මහේස්ත්‍රාත්වරයා නියෝග කළේය. ඊට අමතරව, සැකකරුවන්ට අයත් පෞද්ගලික ගිණුම් පිළිබඳව මෙන්ම පාරිභෝගික ගිණුම් හරහා සිදුව ඇති මුදල් ප්‍රතිපූර්ණය සම්බන්ධයෙන් සම්පූර්ණ විස්තරාත්මක වාර්තාවක් කඩිනමින් අධිකරණයට ඉදිරිපත් කරන ලෙස අපරාධ පරීක්ෂණ දෙපාර්තමේන්තුවට නියම කෙරිණි.
නියාමන අධීක්ෂණය සහ පසුබිම
මෙම මූල්‍ය වංචාව සම්බන්ධයෙන් ශ්‍රී ලංකා මහ බැංකුව (CBSL) මීට පෙර නිවේදනය කර තිබුණේ බැංකුවේ පද්ධති සුරක්ෂිතභාවය සහ ද්‍රවශීලතා තත්ත්වයන් කෙරෙහි මහ බැංකුවේ දැඩි අධීක්ෂණය පවතින බවත්, අභ්‍යන්තර පාලන පද්ධති විමර්ශනය සඳහා ස්වාධීන අධිකරණ වෛද්‍ය විගණනයක් (Forensic Audit) ක්‍රියාත්මක කිරීමට උපදෙස් දී ඇති බවත්ය.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව වැඩිදුර විමර්ශන මෙහෙයවයි.
