අයිචි-නගෝයා ආසියානු ක්‍රීඩා හොකී තරගාවලියේ තරග විනිශ්චයකාර කළමනාකරුවෙකු ලෙස කටයුතු කරමින් සිටි ඉන්දියාවේ ගුරින්දර් සිං සංඝා (Gurinder Singh Sangha) තරගාවලිය අවසන් වීමට පෙර ජපානයෙන් පිටව ගොස් තිබෙනවා.
ආසියානු හොකී සම්මේලනය විසින් තරග විනිශ්චයකාර කළමනාකරුවෙකු ලෙස පත්කර තිබූ මේ ජාත්‍යන්තර හොකී විනිසුරු හා තාක්ෂණික නිලධාරියා මෙසේ ජපානයෙන් පලාගොස් තිබෙන්නේ ඔහුට එරෙහිව ලිංගික අපචාරයේ පැමිණිලි ගණනාවක් එල්ල වීමෙන් පසුව බව වාර්තා වනවා.
මැලේසියාවෙන් පැමිණ සිටි හොකී නිලධාරිනියක සමග සංඝා නොමනා ලෙස හැසිර ඇති බව පැවසෙනවා.
ඇයට උපදෙස් දෙන හා උගන්වන මුවාවෙන් අවස්ථා ගණනාවකදීම ඇය වැළඳ ගැනීමට උත්සාහ කළ ඔහු ඇයව සිපගෙන ඇතැයි ද වාර්තා වනවා. සිද්ධියෙන් පසුව ඇය මැලේසියානු තරග විනිශ්චයකාර කළමනාකරුට ඒ ගැන පැමිණිලි කර තිබෙනවා.
සංඝා ඔහු නතර වී සිටි හෝටලයේ සේවිකාවක සමගත් නුසුදුසු ආකාරයෙන් හැසිරෙමින් ඔහුගේ කාමරයේදී ඇයට අසභ්‍ය වීඩියෝ පෙන්වා තිබෙනවා.
හෝටලයේ අතවරය සහ පෙර පැමිණිලි විමර්ශනය
මේ ආසන්නතම පැමිණිල්ල සංඝාට එරෙහිව නැගුණු පළමු චෝදනාව නෙවෙයි. 2025 වසරේ ජනවාරි මාසයේ රන්චි නගරයේදී ඉන්දියා හොකී ලීගය පැවැත්වෙන අතරතුර ඔහුට එරෙහිව යොගිටා පාසි නමැති තරග විනිසුරුවරිය නිල පැමිණිල්ලක් ගොනු කළේ ඔහු තරග විනිසුරුවන්ගේ කළමනාකරු ලෙස කටයුතු කරමින් සිටියදීයි. ඉන්දියා හොකී සම්මේලනය පසුව එම පැමිණිල්ල ලැබුණු බවට ස්ථිර කරමින් සිද්ධිය සම්බන්ධයෙන් මූලික පරීක්ෂණයක් පැවැත්වීම සඳහා ත්‍රිපුද්ගල කමිටුවක් පත් කළා.
2025 ජනවාරි 20 වැනි දින රන්චි හි කණ්ඩායම නැවතී සිටි හෝටලයේ පැවති අන්‍යෝන්‍ය ක්‍රියාවකදී සංඝාගේ හැසිරීම “අනවශ්‍ය හා නුසුදුසු” වූ බවත් එයින් තමා අපහසුතාවට පත්වූ බවත් පාසි එම පැමිණිල්ලෙන් චෝදනා කර තිබුණා. ඒ සම්බන්ධයෙන් පියවර ගන්නා ලෙසට හා නිලධාරිනියන්ට ආරක්ෂිත හා ගෞරවනීය සේවා වටපිටාවක් සහතික කරන ලෙසට ඇය ඉන්දියා හොකී සම්මේලනයට උදක් බලකර සිටියා.
ඉන්දීය හොකී ක්ෂේත්‍රයේ අර්බුදය තීව්‍ර වෙයි
ජපානයෙන් මේ අලුත්ම සිදුවීම වාර්තා වන්නේ ඉන්දියානු හොකී ක්ෂේත්‍රය තුළ සිදුවන අයුතු ලෙස හැසිරීම් පිළිබඳව වැඩිවෙමින් තිබෙන පැමිණිලි සියුම් පරීක්ෂාවකට ලක්ව තිබීම මධ්‍යයේයි. මේ වසර මුලදී, සහාය සේවක මණ්ඩලයේ සාමාජිකයෙකුට එරෙහිව හිරිහැර කිරීමේ චෝදනා මතුවීමෙන් පසුව ඔහු ජාතික කඳවුරකින් ඉවත් කිරීමට ඉන්දියා හොකී බලධාරීන් පියවර ගත්තේ සිද්ධිය පිළිබඳව දැනගත් විගස ඒ සම්බන්ධයෙන් ක්‍රියාත්මක වූ බවට ප්‍රකාශ කරමින්.
ඉන්දියා හොකී සම්මේලනයේ නිලධාරියෙකුගේ ලිංගික හිරිහැරය හා බලය අනිසි ලෙස භාවිතය පිළිබඳව 2026 අප්‍රේල් මාසයේ නැගුණු චෝදනාවක් හා කණිෂ්ඨ කාන්තා කණ්ඩායමේ පුහුණුකාරිනියක සම්බන්ධයෙන් වූ 2025 වසරේ සිදුවීමක් ඇතුළු වෙනත් පැමිණිලි සම්බන්ධයෙන් ද කටයුතු කිරීමට ඉන්දියා හොකී සම්මේලනයට සිදුව තිබුණා.
මංගල කාන්තා ඉන්දීය හොකී ලීගය පැවැත්වෙන අතරතුර තරුණ ක්‍රීඩිකාවන්ට හිරිහැර කිරීමේ චෝදනා පිළිබඳව බලධාරීන්ට දැන්වීමෙන් පසුව එක් පුහුණුකරුවෙකු රැයකදී ඉවත් කෙරුණා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
