ආණ්ඩුවට සම්බන්ධ වන වෙනත් දේශපාලන පක්ෂ සහ කණ්ඩායම්වල ඇමතිවරුන් දසදෙනකු මෙසේ දිවුරුම් දෙනු ඇතැයි දැනගන්නට ඇත.
ශ්‍රී ලංකා නිදහස් පක්ෂයේ නිමල් සිරිපාල ද සිල්වා, මහින්ද අමරවීර, ස්වාධීන කණ්ඩායම නියෝජනය කරන සුසිල් ප්‍රේම ජයන්ත, ජනාධිපති නීතිඥ විජයදාස රාජපක්ෂ, ටිරාන් අලස්, නලින් ප්‍රනාන්දු, ඊපීඩීපී නායක ඩග්ලස් දේවානන්ද, සමගි ජන බලවේගය නියෝජනය කරන හරීන් ප්‍රනාන්දු, මනුෂ නානායක්කාර යන මන්ත්‍රීවරුන් මෙසේ දිවුරුම් දෙනු ඇතැයි දැනගන්නට ඇත.
නිමල් සිරිපාල ද සිල්වා සෞඛ්‍ය අමාත්‍යවරයා ලෙස ද, මහින්ද අමරවීර කෘෂිකර්ම ඇමතිවරයා ලෙස ද, සුසිල් ප්‍රේම ජයන්ත අධ්‍යාපන ඇමතිවරයා ලෙස ද විජයදාස රාජපක්ෂ අධිකරණ අමාත්‍යවරයා ලෙස ද , ටිරාන් අලස් මහජන ආරක්ෂක ඇමැතිවරයා ලෙස ද දිවුරුම් දීමට නියමිතව ඇතැයි වාර්තා වේ.
ලංකා කම්කරු කොංග්‍රසයේ ජීවන් තොන්ඩමන් ඊයේ (19) රාත්‍රී ඉන්දියාව බලා පිටත්ව ගොස් ඇති අතර ඔහු ලබන අඟහරුවාදා යලි දිවයිනට පැමිණි පසු දිව්රුම්දීමට නියමිතව ඇති පැවසේ.
ජනාධිපති කාර්යාල ආරංචිමාර්ග සඳහන් කරන පරිදි කෙහෙළිය රඹුක්වැල්ල හා වෛද්‍ය රමේෂ් පතිරණ ද අමාත්‍යවරුන් ලෙස අද දිනයේ දිව්රුම්දීමට නියමිතව ඇතැයි පැවසේ.
ආණ්ඩුවේ කැබිනට් මණ්ඩලය ජනාධිපතිවරයා අගමැතිවරයා ඇතුළුව 25 දෙනකුට සීමා කෙරෙන අතර ඉන් සිවු දෙනකු දැනටමත් දිවුරුම් දී ඇත.
ඉතිරි අමාත්‍යවරුන් ශ්‍රී ලංකා පොදුජන පෙරමුණේ මන්ත්‍රීවරුන්ගෙන් පත්කරනු ඇතැයි දැනගන්නට ඇත. ඔවුන් ඉදිරි දිනකදී දිවුරුම්දීමට නියමිතව ඇති බවද වාර්තා වේ.
මේ අතර රාජ්‍ය ඇමතිවරුන් තිස් දෙනකු පත් කිරීමට නියමිත බවද දැනගන්නට ඇත.
නව කැබිනට් අමාත්‍යවරුන්ට හිමි වැටුප නොගෙවන බව අගමැති රනිල් වික්‍රමසිංහ ඊයේ (19) පාර්ලිමේන්තුවේදී ප්‍රකාශ කළේය. අමාත්‍යවරුන්ට හිමි වරප්‍රසාද ද අඩු කිරීමට කටයුතු කරන බව ද අගමැතිවරයා කියා සිටියේය.
