වෙන්වීමක් සිදුවුවහොත් ජෝජීනාට ලැබෙන මාසික දීමනාව සහ ඩොලර් මිලියන 5.6ක මන්දිරය ගැන හෙළිදරව්වක්.
ජෝජීනා රොඩ්රීගෙස් සමග විවාහයෙන් පසුව ක්‍රිස්ටිආනෝ රොනාල්ඩෝ ඔහුගේ ජීවිතයේ නව පරිච්ඡේදයක් ආරම්භ කරද්දී එම විවාහයට අයත් මුදල්මය වගන්තියක් අනාවරණය වී තිබෙනවා.
මේ දෙදෙනාගේ විවාහ සහතිකයේ විස්තරවලට අනුව, රොනාල්ඩෝ හා ජෝජීනා විවාහ වී තිබෙන්නේ ‘දේපළවලින් වෙන්වීම’ යන රාමුව යටතේ බව වාර්තා වනවා. මේ රීතිය මගින් රොනාල්ඩෝ හා රොඩ්රීගෙස් යන දෙදෙනා ට ම ඔවුනොවුන්ගේ දේපළවල අයිතිය කිසිම බාධාවකින් තොරව ලැබෙන බවට සහතික කෙරෙනවා.
පෘතුගාල නීතියට අනුව, මෙවැනි එකඟත්වයකින් රොනාල්ඩෝ හා ජෝජීනා දෙදෙනාම ඔවුනොවුන්ගේ සියලු වත්කම්, ඉපැයූ මුදල් හා විවාහයට පෙර හෝ විවාහය අතරතුර මේ පාර්ශවයන් දෙකෙන් එකක් අත්කර ගත් ආයෝජනවල සම්පූර්ණ පාලන බලය රඳවා තබා ගන්නා බව හඟවනවා.
වෙන්වීමක් වුවත් දේපළ බෙදී නොයන පෘතුගාල නීතිය
යම් හෙයකින් අනාගත දික්කසාදයකින් මේ දෙදෙනා වෙන්වුවහොත් පවා, ඉබේ ක්‍රියාත්මක වන වත්කම් බෙදීයාමකට මේ වගන්තිය අනුව අවස්ථාවක් නැහැ.
රොනාල්ඩෝ ඔහුගේ කොන්ත්‍රාත්, දැන්වීම් සහ ඔහු සෞදි වෘත්තීය පාපන්දු ලීගයේ අල්-නසර් කණ්ඩායමට ක්‍රීඩා කිරීමෙන් ලබා ගන්නා වැටුප හා Pestana CR7 හෝටල ජාලයෙන් ලබා ගන්නා ආදායම වැනි සියලු ව්‍යාපාරවල ඉපැයීම් දිගටම ඔහුගේ අයිතියේ පමණක් තිබෙන බවට ද එම එකඟත්වයෙන් අදහස් කෙරෙනවා.
මේ යුවල දික්කසාද වීම පිණිස නඩුවක් ගොනු කළහොත් ක්‍රියාත්මක වන වගන්ති කිහිපයක් ඔවුන්ගේ විවාහ ලියාපදිංචියේ තිබෙන බව ද පෘතුගාල මාධ්‍ය වාර්තා කරනවා.
දික්කසාදයකදී ජෝජීනාට හිමිවන මාසික දීමනාව හා මැඩ්රිඩ් මන්දිරය
මෙයින් පළමු රීතියට අනුව ජෝජීනා ට රොනාල්ඩෝගෙන් යුරෝ 100,000කට ආසන්න මාසික නඩත්තු දීමනාවක් ලැබෙනවා. තවත් වගන්තියකින් සඳහන් වන ආකාරයට මෙඩ්රීඩ් නුවර තිබෙන මේ යුවලගේ සුඛෝපභෝගී මන්දිරයේ සම්පූර්ණ හිමිකාරිත්වය ජෝජීනා සතුවනවා. මේ දේපළවල වර්තමාන වටිනාකම ඩොලර් මිලියන 5.6ක් වනවා.
රොනාල්ඩෝ හා ජෝජීනාගේ විවාහයේ සාක්ෂිකරුවන් වී තිබෙන්නේ ඔහුගේ ක්‍රීඩාවේ මුල් යුගයේ පටන් සමීප මිතුරෙකු වන Miguel Paixao හා ඇයගේ සොයුරිය වන Ivana Rodriguez සහ සමීපතම ස්පාඤ්ඤ යුවලක්.
පවුලේ අයවත් නොදැන සමීපතමයින් සිව්දෙනෙකු මැද කෙරුණු රහස් විවාහය
මේ සිවු දෙනාට අමතරව දරුවන් පස් දෙනාගේ සහභාගිත්වයෙන් පමණක් රහසේ පැවැත්වුණු විවාහෝත්සවයට රොනාල්ඩෝගේ ආදරණීය මව වන Dolores Aveiro හා ඔහුගේ සහෝදර සහෝදරියන් තිදෙනා වන Hugo, Elma සහ Katia ද සහභාගි වුනේ නැහැ.
ලෝකයේ එක් වඩාත්ම ජනප්‍රිය පුද්ගලයෙකු වන රොනාල්ඩෝ ඔහුගේ විවාහ උත්සවයට පෘතුගාල ජාතික පාපන්දු කණ්ඩායමේ සගයින් හෝ අල්-නසර් කණ්ඩායමේ සගයින් හෝ වෙනත් කිසිම කීර්තිමත් පුද්ගලයෙකුට ආරාධනා කර තිබුණේ නැහැ.
රොනාල්ඩෝ හා ජෝජීනා ඔවුන්ගේ වාසගම් වෙනස් නොකිරීමට ද තීරණය කර තිබෙනවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
