බිරියන් දෙන්නාගේ දබරය දුටු ඊජිප්තු පාපන්දු පුහුණුකරු සිහිනැතිව ඇද වැටෙයි: පළමු බිරිඳ වහාම දික්කසාද කෙරේ

සුඛෝපභෝගී නිවාඩුවක් අතරතුර දෙවැනි බිරිඳ සමඟ ඇතිවූ ගැටුම නිසා ප්‍රවීණ පුහුණුකරු ක්ලාන්ත වෙයි; දීර්ඝකාලීන බිරිඳට දික්කසාදය.


පෝටෝ මරීනා නගරයේ නිවාඩුවක් ගත කරමින් සිටියදී තමාගේ බිරියන් දෙදෙනා එකිනෙකාගේ හිසකෙස් ඇදගෙන කළ සණ්ඩුව දැකීමෙන් හටගත් අධික මානසික ආතතියෙන් සිහිනැතිව ඇද වැටුනු ඊජිප්තුවේ ප්‍රධාන පාපන්දු පුහුණුකරු හොසම් හසන් (Hossam Hassan) ඉන්පසුව එක් බිරිඳක් වහාම දික්කසාද කර තිබෙනවා.

මේ පාපන්දු ප්‍රධානියා සිටියේ ඊජිප්තුවේ දර්ශනීය උතුරු වෙරළේ විනෝද වෙමින්. එක් වරම පෝටෝ මරීනා සුඛෝපභෝගී හෝටලයක් ඇතුළත පාරාදීසය මහා අවුලක් බවට හැරුනේ එහි විනෝද වෙමින් සිටි පිරිස අන්දමන්ද කරවමින්.

හෝටල් අවන්හල යුද පිටියක් කළ බිරියන්ගේ ගැටුම

ඔහුගේ දීර්ඝ කාලීන බිරිඳ හොවයිඩා අල්-ඝාබාවි (Howaida Al-Gharbawi) සහ දෙවැනි බිරිඳ ඩිනා මුස්ටාෆා (Dina “Dan Adam” Mustafa) අතර උණුසුම් වාදයක් හෝටල අවන්හලේ හටගත් අතර සැණින් එය ශාරීරික සටනක් බවට වර්ධනය වුණා.

ඥාතීන් වහාම ඊට මැදිහත් වුනේ ආරක්ෂක නිලධාරීන් ද කැඳවමින්. කාන්තාවන් දෙදෙනා ට ම කැපුම් තුවාල හා තැළීම් සිදුව තිබුණා.

ප්‍රසිද්ධියේ සිදුවූ මේ දබරය හසන් ට දරා ගැනීමට නොහැකි වූ අතර ගැටුම නතර කිරීමට උත්සාහ කිරීමේදී ඔහු ක්ලාන්තියෙන් බිම ඇද වැටුනා.

සිද්ධියෙන් පසුව මේ ඊජිප්තු පාපන්දුවේ කළමනාකරු ඔහුගේ පළමු බිරිඳ වන හොවයිඩා දික්කසාද කළා. කයිරෝ නුවර නීත්‍යානුකූල රෙජිස්ට්‍රාර් කාර්යාලයකදී ඔහු දික්කසාද ලේඛනවලට නිල වශයෙන් අත්සන් කළ බව වාර්තා වනවා.

විවාහ නීතිය, දික්කසාදය සහ හසන්ගේ පාපන්දු ගමන්මග

මේ හදිසි වෙන්වීමට පෙර හසන් දශක ගණනාවක් තිස්සේ හොවයිඩා සමග එකට කල් ගෙවා තිබෙන අතර එම යුවලට දරුවන් තිදෙනෙක් සිටිනවා.

හසන් විසින් 2015 වසරේදී ඩිනා විවාහ කරගනු ලැබුවේ ඔහු ඒ වනවිටත් හොවයිඩා සමග විවාහ වී සිටියදී. ඊජිප්තුවේ නීතියට අනුව, මුස්ලිම් පිරිමියෙකුට බිරින්දෑවරු හතර දෙනෙක් දක්වා එකවර විවාහ කර ගැනීම සඳහා නීතියෙන් අවසර ලැබී තිබෙනවා. එම අවස්ථාවේදී, වර්තමාන බිරිඳ හෝ බිරින්දෑවරුන්ට නව විවාහය පිළිබඳව නිල දැනුම් දීමක් කිරීමට රජයේ රෙජිස්ට්‍රාර්වරයා නීතියෙන් බැඳී සිටිනවා.

එකවිට එක භාර්යාවකට වැඩියෙන් තබා ගෙන සිටින ස්වාමි පුරුෂයෙක් නිවාස, මුදල්මය ආධාර හා ජීවන මට්ටමේදී ඔහුගේ සියලුම බිරින්දෑවරුන්ට එක සමානව සැලකිය යුතු බවට ද නීතියේ සඳහන්ව තිබෙනවා.

2024 වසරේ සිට ඊජිප්තුවේ ප්‍රධාන පාපන්දු පුහුණුකරු ලෙස කටයුතු කරන හොසම් හසන් පසුගියදා පැවති ලෝක කුසලාන පාපන්දු තරගාවලියේදී ඊජිප්තුව අවසන් කණ්ඩායම් 16 අතරට ගෙන යාමට සමත් වුණා.

ඇට්ලන්ටා හි පැවති තියුණු තරගයකදී ආජන්ටිනාව වෙතින් ගෝල් 3-2ක පරාජයක් ලැබ ඊජිප්තුව තරගාවලියෙන් ඉවතට විසිවුණා. හොසම් පසුව ජාතික කණ්ඩායම සමග ඔහුගේ කොන්ත්‍රාත්තුව අලුත් කර ගත්තේ වසර 2030 වනතුරු ඔහුගේ තනතුර සුරක්ෂිත කර ගනිමින්.

(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com