*ටෙස්ටොස්ටෙරෝන් හෝමෝන මට්ටම හා ක්‍රීඩාවේ සාධාරණත්වය පිළිබඳ ගෝලීය කතිකාවක් කරළියට
හිටපු ඉන්දීය ක්‍රිකට් ක්‍රීඩක මෙන්ම හිටපු පිතිකරණ පුහුණුකරු සංජේ බංගාර්ගේ දියණිය වන අනයා බංගාර් (Anaya Bangar) හට ඔස්ට්‍රේලියාවේ කාන්තා ක්‍රිකට් තරග සඳහා සහභාගී වීමට ඔස්ට්‍රේලියානු ක්‍රිකට් පාලක මණ්ඩලය (Cricket Australia) විසින් නිල අවසරය ලබාදී තිබේ. මේ අනුව ඇයට එරට සමාජ මට්ටමේ කාන්තා ක්‍රිකට් තරග සඳහා වහාම ක්‍රියාත්මක වන පරිදි එක්වීමටත්, 2027 මාර්තු මස සිට කාන්තා බිග් බෑෂ් ලීගය (WBBL) ඇතුළු ප්‍රමුඛ පෙළේ කාන්තා තරගාවලි සඳහා සුදුසුකම් සපුරාලීමටත් මග විවර වී ඇත.
ලිංග සංක්‍රාන්ති ශල්‍යකර්මයකට (Gender-affirming surgery) භාජනය වූ 25 හැවිරිදි අනයා බංගාර්, මීට පෙර මුම්බායි වයස් කාණ්ඩ කණ්ඩායම් (U-19) නියෝජනය කරමින් ක්‍රීඩා කළ දක්ෂ ක්‍රීඩකයෙකි.
ක්‍රිකට් ඔස්ට්‍රේලියා ප්‍රතිපත්තිය සහ වෛද්‍ය නිර්ණායක
ඔස්ට්‍රේලියානු ක්‍රිකට් ආයතනයේ ‘ප්‍රමුඛ පෙළ ක්‍රිකට් ක්‍රීඩාව සඳහා ලිංග සංක්‍රාන්තික සහ විවිධ ලිංගික අනන්‍යතා සහිත ක්‍රීඩක ක්‍රීඩිකාවන් ඇතුළත් කරගැනීමේ ප්‍රතිපත්තිය’ (Inclusion of Transgender and Gender Diverse Players Policy) යටතේ මෙම අවසරය ලබාදී ඇත.
කෙසේවෙතත්, ප්‍රමුඛ පෙළ කාන්තා ක්‍රිකට් ක්‍රීඩාව සඳහා එක්වීමට නම් අදාළ ක්‍රීඩිකාවකගේ රුධිරයේ ටෙස්ටොස්ටෙරෝන් හෝමෝන සාන්ද්‍රණය (Serum testosterone concentration) අවම වශයෙන් මාස 12 ක කාලයක් පුරා ලීටරයකට නැනෝමෝල් 10 ට වඩා අඩු මට්ටමක (below 10 nmol/L) පවත්වා ගත යුතු වේ. අනයා බංගාර්ගේ වෛද්‍ය වාර්තා, හෝමෝන පරීක්ෂණ සහ ශල්‍යකර්ම වාර්තා පරීක්ෂා කිරීමෙන් පසු, මෙම නියමිත කාල සීමාව 2027 මාර්තු මාසයේදී සම්පූර්ණ වන බව ක්‍රිකට් ඔස්ට්‍රේලියා ආයතනය තහවුරු කර ඇත.
එමෙන්ම 2027 මාර්තු මස සිදුකෙරෙන රුධිර පරීක්ෂණයේදී ද මෙම හෝමෝන මට්ටම නිසි පරිදි පවතින්නේ නම් පමණක් ඇයට WBBL වැනි ඉහළ පෙළ තරග සඳහා අවස්ථාව හිමිවනු ඇත.
"සුදුසුකම් ලැබීම යනු කණ්ඩායමට තේරී පත්වීම නොවේ" - අනයා බංගාර්
තමන් ලැබූ මෙම අවස්ථාව පිළිබඳව සමාජ මාධ්‍ය ඔස්සේ අදහස් දක්වමින් අනයා බංගාර් සඳහන් කර ඇත්තේ, මෙය තමන්ගේ ක්‍රීඩා දිවියේ වැදගත් සන්ධිස්ථානයක් බවයි.
"වසර ගණනාවක අවිනිශ්චිතතාවයකින් පසු මට නැවතත් ක්‍රීඩාවට පිවිසීමට මාවතක් ලැබීම සතුටක්. නමුත් මා ලබා ඇත්තේ සුදුසුකම් ලැබීමක් (Eligibility) පමණයි. එය කණ්ඩායමකට තේරී පත්වීමක් (Selection) නොවේ. මා යළිත් ශාරීරික යෝග්‍යතාවය සහ දක්ෂතා වර්ධනය කරගෙන, ක්‍රීඩා පිටියේ දස්කම් දක්වා WBBL වැනි ලීගයක කණ්ඩායමකට තේරී පත්වීමට මහන්සි විය යුතුයි," යනුවෙන් ඇය අවධාරණය කර ඇත.
ජාත්‍යන්තර ක්‍රිකට් කවුන්සිලයේ ස්ථාවරය සහ ක්‍රීඩා පිටියේ විවාදය
අනයා බංගාර් මීට පෙර ඉන්දියාවේ කාන්තා ක්‍රිකට් ක්‍රීඩාවට එක්වීම සම්බන්ධයෙන් ඉන්දීය ක්‍රිකට් පාලක මණ්ඩලයෙන් (BCCI) විමසීම් කර තිබුණද, ඊට පැහැදිලි ප්‍රතිචාරයක් ලැබී නොතිබිණි.
ජාත්‍යන්තර ක්‍රිකට් කවුන්සිලය (ICC) විසින් 2023 වසරේදී සම්මත කරන ලද රෙගුලාසිවලට අනුව, පිරිමි වැඩිවියට පත්වීම (male puberty) අත්විඳින ලද කිසිදු ලිංග සංක්‍රාන්තික කාන්තාවකට ජාත්‍යන්තර කාන්තා ක්‍රිකට් තරග සඳහා ක්‍රීඩා කිරීමට අවසර හිමි නොවේ. කෙසේවෙතත්, ඔස්ට්‍රේලියානු ක්‍රිකට් ආයතනය සිය දේශීය ලීගයන් සඳහා අනුගමනය කරන්නේ ඊට වඩා වෙනස්, හෝමෝන මට්ටම් මත පදනම් වූ ඇතුළත් කිරීමේ ප්‍රතිපත්තියකි.
කාන්තා ක්‍රීඩාවේ සාධාරණත්වය, කායික ශක්තියේ වාසිය සහ සමානාත්මතාවය පිළිබඳව ගෝලීය ක්‍රීඩා ක්ෂේත්‍රයේ දැඩි කතිකාවක් සහ විවාදයක් නිර්මාණය වී ඇති පසුබිමක මෙම තීරණය ක්‍රියාත්මක වීම විශේෂත්වයකි.
වැඩිදුර තොරතුරු සහ මූලාශ්‍ර සබැඳි:
India Today: Anaya Bangar eligible to play cricket in Australia from March 2027, CA confirms
The Times of India: Anaya Bangar gets Cricket Australia nod for elite women’s cricket
News.com.au: Trans athlete gets Cricket Australia clearance
The Noticer : ‘Transgender’ male Indian cricketer allowed to play in Australian women’s leagues
