ක්‍රීඩා ගම්මානයක් නැති අයිචි-නගෝයා ආසියානු ක්‍රීඩා උළෙලට පෙර, නුපුරුදු පරිසරය ජය ගන්නට ඉන්දියාවෙන් වෙනස්ම ආකාරයේ මානසික හා කායික සූදානමක්.
2026 ආසියානු ක්‍රීඩා උළෙල සඳහා සූදානම් වන ඉන්දියාවේ ක්‍රීඩක ක්‍රීඩිකාවන් ජපානයට යාමට පෙර අසාමාන්‍ය කටයුත්තක නිරත වෙමින් නැව් කන්ටේනර ඇතුළේ රාත්‍රිය ගත කරමින් සිටිනවා.
මීට ඉතා හොඳ හේතුවක් තිබෙනවා.
සම්ප්‍රදායානුකූල ක්‍රීඩක ගම්මානයක් Aichi Nagoya ආසියානු ක්‍රීඩා උළෙලේ නැහැ. ඒ වෙනුවට, 17000කට වැඩි ක්‍රීඩක ක්‍රීඩිකාවන් හා නිලධාරීන්ට නවාතැන් සැපයෙන්නේ හෝටල, මුහුදු සංචාරයේ යෙදෙන නැවක හා තාවකාලික කන්ටේනර ශෛලියේ කුඩා ඒකකවලයි.
එබැවින් ඉන්දියාව ඔවුන්ගේ ක්‍රීඩකයින් ජපානය ට ළඟාවීමට පෙර සිටම ඔවුන්ට එහිදී බලාාපොරොත්තු විය හැකි තත්ත්වයන් පිළිබඳව දැනුමක් ලබා දීමට තීරණය කර තිබෙනවා.
නවාතැන් ගැනීමට හැකිවන පරිදි වෙනස් කරන ලද නැව් කන්ටේනර ඉන්දියාවේ ක්‍රීඩා අධිකාරිය ඔවුන්ගේ පටියාලා සහ බෙංගලුරු නගරවල තිබෙන මධ්‍යස්ථානයන් හි ස්ථාපිත කර තිබෙන අතර ක්‍රීඩකයින් මාරුවෙන් මාරුවට එහි නිදාගෙන අවදි වීමෙන් පසුව ඔවුන්ගේ සාමාන්‍ය පුහුණු චර්යා රටාවේ දිගටම නිරත වෙනවා.
අඩි 40ක කන්ටේනර පුදුමාකාර ලෙස නවාතැන් ගැනීමේ ස්ථාන බවට වෙනස් කර ඇත්තේ එහි ඇඳන්, වායු සමීකරණය, නානකාමර, කුඩා මුළුතැන්ගෙයක් හා ගබඩා කිරීමේ ඉඩකඩ ද ඇතුළත්ව තිබෙන අයුරින්.
ක්‍රීඩකයින් කන්ටේනරවල නිදාගැනීමේ ඉන්දියාවේ අවශ්‍යතාව
සීමිත ඉඩ ප්‍රමාණයකට හුරුවීම හැම කෙනෙකු ට ම පහසු දෙයක් වන්නේ නැහැ.
එක් කන්ටේනරයක රාත්‍රීන් දෙකක් ගත කළ පොදුරාජ්‍ය මණ්ඩලීය ක්‍රීඩා ලෝකඩ පදක්කම්ලාභී කවපෙත්ත විසිකරන ක්‍රීඩිකා සීමා කලිරාමන් පළමු රැය පහන් කිරීම තමාට ඉතාමත් අසීරු වූ බව කියනවා. කෙසේ වෙතත්, දෙවැනි රාත්‍රිය වන විට ඇය එයට හුරුවීමට පටන් ගෙන තිබෙනවා.
ආසියානු ක්‍රීඩා යගුලිය දැමීමේ දෙවතාවක ශූරයා වන ටජින්දර්පාල් සිං ටූර් ට වෙනත් පැහැදිලි ප්‍රශ්නයක් තිබෙනවා. ඒ, ඔහුගේ උස අඩි හයයි අඟල් හතරක් වීමයි.
විශේෂයෙන් තමන්ගේ පුහුණු උපකරණත් සමග සිටින ශරීරයෙන් විශාල ක්‍රීඩකයින්ට ඒ ඉඩ ප්‍රමාණය ගැටළුවක් වීමට ඉඩ තිබෙන බව පිළිගන්නා ටූර්, එහෙත් මේ තත්ත්වයන් පිළිබඳව දැන් ලබන අත්දැකීම ඔවුන් ජපානය ට ගිය පසුව ප්‍රයෝජනවත් වනු ඇතැයි විශ්වාස කරනවා.
ඉන්දියාව මේ නවාතැන් පහසුකම්වලින් නතර වෙන්නේ නැහැ
මෙය පමණට වඩා එහා ගිය සූදානම් වීමක් ලෙස පෙනෙන්නට ඉඩ තිබුනත් මේ පිටුපස තිබෙන්නේ ඉතා සරල අදහසක්. තමන්ගේ ක්‍රීඩක ක්‍රීඩිකාවන් ඔවුන්ගේ ක්‍රීඩා ජීවිතවල එක් ලොකුම ඉසව්වකට පැමිණෙන විට ඔවුන් නිදාගන්නේ කොහේද හෝ ඔවුන් ආහාරයට ගන්නේ මොනවාද කියා වික්ෂිප්ත වනු දකින්න ඉන්දියාව ට අවශ්‍ය නැහැ.
2023 වසරේ චීනයේ Hangzhou නුවර පැවති පසුගිය ආසියානු ක්‍රීඩා උළෙලේදී ඉන්දියාව රන් පදක්කම් 28ක් ඇතුළුව වාර්තාගත පදක්කම් 107ක් දිනා ගත් අතර ඊටත් වඩා ඉදිරියට යාමට වෙර දරන මේ මොහොතේ නුපුරුදු නිදන කාමරයක් නිසා ක්‍රීඩකයින්ගේ සිත් අනවශ්‍ය ලෙස අවුල් නොවන බවට සහතික කළ හැකි තරමේ දුරකට ඉන්දියාව ඔවුන්ගේ සූදානම ගෙන ගොස් තිබෙනවා.
(සටහන : වර්නන් ගුණසේකර)
