ක්‍රීඩා මණ්ඩපයේ පීඩනය පිටියට එන විට තරගය එසැණින් අවසන් කරන රුමේනියානු පාපන්දු සම්මේලනයේ විප්ලවීය විනය පියවර.
රුමේනියානු පාපන්දු සම්මේලනය ෙඑතිහාසික තීරණයක් ගනිමින් යුරෝපීය පාපන්දු තරග බිමට කළු පැහැති කාඩ්පත ගෙනැවිත් තිබෙනවා. ඔවුන් මේ නව නීතිය පනවා තිබෙන්නේ යොවුන් තරග අතරතුර මව්පියන් හා නරඹන්නන්ගේ නොහොබිනා හැසිරීම වැළැක්වීමටයි.
තරුණ පාපන්දුවේ අපවාදාත්මක හා අයුතු හැසිරීමට දඬුවම් කිරීම පිණිස කළු කාඩ්පත හඳුන්වා දෙන බවට රුමේනියානු පාපන්දු සම්මේලනය ඊයේ නිවේදනය කළා. ක්‍රීඩා මණ්ඩපවලින් එන පීඩනය හා බැණ වැදීම්වලින් දරුවන් ආරක්ෂා කිරීම මේ පියවරේ ඉලක්කය වී තිබෙනවා.
දරුවන් වෙනුවෙන් BRAVO මෙහෙයුම
මෙය ක්‍රීඩා ලෝකයේ පුරෝගාමී පියවරක් වනවා. මේ පිළිබඳව රුමේනියා පාපන්දු සම්මේලය මෙසේ ප්‍රකාශ කරනවා.
“පාපන්දුව ක්‍රීඩාවක්, විනෝද වීමේ අවස්ථාවක් හා දරුවන්ට සෞඛ්‍යමය වැඩීමක් ලබා දෙන දෙයක් ලෙස රැඳී තිබිය යුතුයි. යොවුන් පාපන්දු තරගවල තිබෙන වඩාත්ම වේදනාත්මක තත්ත්වයක් වන්නේ ක්‍රීඩාංගණ මණ්ඩපවල සිට දෙමාපියන් හා නරඹන්නන් දරුවන්ට කරන කරදරය, හිරිහැරය හා පීඩනයයි. මීට එරෙහිව සටන් කිරීමේ රුමේනියානු පාපන්දු සම්මේලනයේ උත්සාහය BRAVO වේදිකාව ඔස්සේ අපි දිගටම කරගෙන යනවා.”
මේ වේදිකාව මව්පියන් පිටියේ මායිම් රේඛාවේ සිට ළමයින්ට බැණ වදිමින්, තර්ජනය කරමින්, පහර දෙමින් හා තල්ලු කරමින් සිදුකරන ‘බුලි’ කිරීම නතර කිරීම සඳහා ආරම්භ කර ඇති සමාජ මාධ්‍ය මෙහෙයුමක්.
හදිසි කමිටුව මේ නව නියාමනය සැප්තැම්බර් 11 දිනයේ අනුමත කළ බවත් මෙය මුලින් ඇතුළත් කර තිබෙන්නේ දරුවන්ගේ හා තරුණ ළමයින්ගේ තරගාවලි ක්‍රමවේදයට බවත් රුමේනියානු පාපන්දු සම්මේලනය නිවේදනයක් මගින් පැහැදිලි කරනවා.
අවුරුදු 7 සිට 16 දක්වා වයස් ඛාණ්ඩ වෙනුවෙන් ක්‍රියාත්මක වන මේ නව විනයානුකූල පියවර ගොඩනැගී තිබෙන්නේ “ක්‍රීඩා මණ්ඩපයේ සිටින මව්පියන්ගේ කීර්තියට ඇති ආශාව, පීඩනය හා ඉච්ඡා භංගත්වය හමුවේ දරුවන් ඊට ගොදුරු නොවිය යුතුයි” යන ප්‍රතිපත්තිය මතයි.
කළු කාඩ්පතින් තරගය එසැණින් අත්හිටුවයි
කළු කාඩ්පතේ වැදගත්කම වන්නේ එමගින් තරගය කොන්දේසි රහිතව නිශ්චිතව නතර කිරීමයි. මේ ගැන රුමේනියානු පාපන්දු බලධාරීන් මෙසේ විස්තර කරනවා.
“කළු කාඩ්පත යනු නරඹන්නන් හෝ මව්පියන්ගේ නොහොබිනා හැසිරීම නිසා තරගය නියත වශයෙන් අවසන් බවට තරග විනිසුරුවරයා කිසිම ව්‍යාකූලත්වයකින් තොරව නිවේදනය කරන දෘශ්‍ය සංඥාවයි. නින්දා සහගත හැසිරීමෙන් තරගය පවත්වා ගෙන යාමට බලපෑමක් ඇති කරනවා පමණක් නොව එයින් දරුවන්ට හා මුළු කණ්ඩායමට ම කෙළින්ම විපාක ගෙන ඒමට ඉඩ තිබෙනවා.”
දෙමාපියන් හා නරඹන්නන්ගේ හැසිරීම ළමයින්ගේ තරගයක ස්වභාවයට ගැළපෙනවා ද යන්න පිළිබඳව පිටියේ තරග විනිසුරුවරයා සිවු වැනි නිලධාරියා හෝ එහි සිටින වෙනත් තරග නිලධාරියෙකුගේ සහාය ඇතිව තීරණය කරනවා.
නරඹන්නන්ගේ අයුතු හැසිරීමක් පිළිබඳව තරග විනිසුරු දැන ගත් විට, ඔහු පළමුව පුහුණුකරුවන්ට ඒ බව දන්වා පිරිස අමතන ලෙසට ඔවුන්ගෙන් ඉල්ලා සිටිමින් ශබ්ද විකාශන යන්ත්‍රයෙන් අනතුරු හැඟවීමක් නිකුත් කරනවා. නොමනා හැසිරීම දිගටම පැවතෙන්නේ නම් ඔහු තරගය තාවකාලිකව අහෝසි කර කණ්ඩායම් දෙක ම ඔවුන්ගේ ඇඳුම් මාරුකරන කාමරවලට යවනවා.
තරගය නැවත ආරම්භ වූ විටත් ඒ හැසිරීම එසේම පවතින්නේ නම් තෙවැනි දැනුම් දීමත් සමග කළු කාඩ්පත නිකුත් කෙරෙනවා. තරගය අවසන් කරමින් විනිසුරුවරයා විසිල් කිරීමෙන් පසුව එය නිශ්චිතවම නතර වන අතර ඉන්පසුව තරගය තව දුරටත් කරගන යන්න බැහැ.
(සටහන : වර්නන් ගුණසේකර)'ද ලීඩර්' ක්‍රීඩා වාර්තාකරු
gunasekera33@gmail.com
