ලෝක කුසලාන පෞද්ගලීකරණ සැලසුම හමුවේ ජියානි ඉන්ෆන්ටීනෝට එරෙහිව ගෝලීය පාපන්දු නායකයන්ගේ දැඩි විරෝධයක්
ජාත්‍යන්තර පාපන්දු සම්මේලනයේ (FIFA) සභාපති ජියානි ඉන්ෆන්ටීනෝ නැවත එම තනතුරට පත් කිරීම සඳහා ‘කප්පම්’ ඉල්ලා ඇතැයි ජෝර්දාන පාපන්දු සම්මේලනයේ සභාපති අලි බින් අල් හුසේන් කුමරු ප්‍රකාශ කරනවා.
පසුගිය දෙසැම්බරයේ කටාර් හි පැවති අරාබි කුසලාන (Arab Cup) තරගාවලියේ අනුශූරයින් වෙමින් ජෝර්දාන ජාතික පාපන්දු කණ්ඩායම උපයා ගත් ත්‍යාග මුදල ඉන්ෆන්ටීනෝ කප්පමක් ආකාරයෙන් රඳවා තබාගන සිටින බවට හිටපු FIFA උපසභාපතිවරයෙකු ද වන අලි කුමරු චෝදනා කරනවා. ඉන්ෆන්ටීනෝ නැවත වරක් FIFA සභාපති ලෙස පත් කිරීමට අනුමැතිය පළ කළහොත් එය ජෝර්දාන පාපන්දු සංගමයට උදව් උපකාර කිරීමට බොහෝ දුරට බලපානු ඇතැයි ජෝර්දානය පසුගිය ජූනි මාසයේ ප්‍රථම වතාවට සහභාගි වූ ලෝක කුසලාන තරගාවලිය පැවැත්වෙන අතරතුර FIFA තමාට දැනුම් දුන් බවට අලි කුමරු පවසනවා.
අනාගත ලෝක කුසලාන පාපන්දු තරගාවලියන්හි ලාභයෙන් කොටසක් පෞද්ගලික ආයෝජකයන්ට විකිණීමේ අසාර්ථක සැලැස්මෙන් පසුව ඉන්ෆන්ටීනෝ ඔහුගේ වසර 11ක සභාපති ධූරය රැක ගැනීමේ සටනක නියැලී සිටින්නේ ගෝලීය පාපන්දු සංගම් නායකයින්ගේ දැඩි දෝෂාරෝපණයට ලක්වීම මධ්‍යයේ. ඔහුට සභාපති තනතුරෙන් ඉවත් වන ලෙසට පාපන්දු ප්‍රධානීන් බොහෝ දෙනෙක් තරයේ කියා තිබෙනවා.
“ජෝර්දානයේ අපි සදාචාරමය වටිනාකම් දිගටම ගෙන යාම ගැන ආඩම්බර වෙනවා. අපි එයාව මීට පෙරත් අනුමත කළේ නැහැ. පැහැදිලිවම දැනුත් අනුමත කරන්නේ නැහැ” යනුවෙන් අලි කුමරු කියනවා. ඉන්ෆන්ටීනෝ ප්‍රථම වතාවට සභාපති තනතුරට 2016 පෙබරවාරියේදී තෝරා ගැණුනු, ඡන්ද අපේක්ෂකයින් පස් දෙනෙකුගෙන් යුක්ත වූ FIFA සභාපති තරගයේදී අලි කුමරුට හිමිවුනේ තෙවැනි ස්ථානය.
“මේ මුළු තත්ත්වයෙන් පෙනී යන්නේ කප්පම් ඉල්ලීමක්. අපි එයට යටත් වීම ප්‍රතික්ෂේප කරනවා” යනුවෙන් ජෝර්දාන කුමාරයා සඳහන් කරනවා.
2025 FIFA අරාබි කුසලාන පාපන්දු තරගාවලියේ ජෝර්දානය මොරොක්කෝව ට පරාජය වූ අවසාන තරගයේ පරාජිත කණ්ඩායමට ඩොලර් මිලියන 4.2ක මුදලක් පිරිනැමිය යුතුව තිබුණා.
“අවසාන තරගයට පිවිසීම වෙනුවෙන් අපේ කණ්ඩායමට ලැබිය යුතු මුදල තවමත් අපට ලබා දී නැහැ. නමුත් එහෙම කරන අතරතුර FIFA තමන් සතුව බිලියන ගණනක සංචිතයක් තිබෙන බවට පුරසාරම් දොඩනවා” අලි කුමරු ප්‍රකාශ කරනවා.
“ප්‍රශ්නය තියෙන්නේ නායකත්වයේ කියලා පැහැදිලිවම පේනවා. මේ කිසිම දෙයකට හෝ අනෙක් කාරණා සම්බන්ධයෙන් අපට උදව් කිරීම FIFA මාස ගණනාවක් තිස්සේ ප්‍රතික්ෂේප කරමින් සිටිනවා.”
2011 සිට 2015 දක්වා කාලය තුළ ජාත්‍යන්තර පාපන්දු සම්මේලනයේ පාලන විධායක කමිටුවේ සේවය කිරීම පිණිස ආසියානු පාපන්දුව විසින් අලි කුමරු තෝරා ගනු ලැබූ අතර ඔහු 2015 මැයි මාසයේ පැවති මැතිවරණයේදී එකල සභාපතිව සිටි ස්ටෙප් බ්ලැටර් ට එරෙහිව සිටියා.
මෙවර ලෝක කුසලාන තරගාවලිය නිමා වී සති දෙකකට පසුව ඉන්ෆන්ටීනෝ නිව්යෝක් නගරයෙන් පිටව යද්දී ඔහු 2031 වසර දක්වා FIFA සභාපති ධූරයේ වැජඹෙන සෙයක් පෙන්නුම් කරමින් කිසිවෙකුගේ විරුද්ධත්වයක් නැතිව සිවු වැනි හා අවසාන වතාවටත් සභාපති වශයෙන් තෝරා ගැනෙන තත්ත්වයක සිටියා.
එහෙත් මීට සතියකට පෙර අනාවරණය වූ ඔහුගේ ලෝක කුසලාන පෞද්ගලීකරණ සැලසුමෙන් පසුව යුරෝපය, උතුරු අමෙරිකාව හා ආසියානු පාපන්දු නායකයින් විසින් ඉන්ෆන්ටීනෝ දැඩි ලෙස විවේචනය කර තිබෙනවා.
සාමාජික රටවල් 211ක් ඡන්දය ලබා දෙමින් ලබන වසරේ මාර්තු 18 වැනිදා මොරොක්කෝවේ පැවැත්වෙන සභාපතිවරණය සඳහා ඉදිරිපත් වන අපේක්ෂකයින් ප්‍රකාශයට පත් කිරීම සඳහා නොවැම්බර් 18 අවසාන දිනයක් FIFA විසින් නියම කර තිබෙනවා.
(සටහන : වර්නන් ගුණසේකර)
'ද ලීඩර්' ක්‍රීඩා වාර්තාකරු
gunasekera33@gmail.com
